Սուրիա Իր Ամբողջական Հակակշիռին Տակ Առաւ Դամասկոսի Շրջակայքը

0523syr

0523syr

ԴԱՄԱՍԿՈՍ, «Ա.Էֆ.Փէ.».- Երկուշաբթի, Մայիս 21ին, Սուրիոյ բանակի հրամանատարութիւնը յայտարարեց, թէ մայրաքաղաք Դամասկոսի շրջակայքի գիւղերն ու աւանները իր ամբողջական հակակշիռին տակ առած է, 2011ին սկսած քաղաքացիական պատերազմէն ի վեր առաջին անգամն ըլլալով։

«Իսլամական պետութիւն» ահաբեկչական կազմակերպութեան զինեալներուն դէմ Հաճար Ասուատի եւ Եարմուքի գաղթակայանին մէջ արձանագրուած յաղթանակներէն ետք, ամբողջացած է Ղութայի արեւելեան եւ արեւմտեան շրջաններուն մաքրագործումը ահաբեկչական խմբաւորումներէն:

Հրամանատարութիւնը շեշտեց, որ Դամասկոսի եւ անոր շրջակայքի ապահովութեան վերականգնումով՝ սուրիական բանակը աւելի վճռակամութեամբ պիտի շարունակէ իր մարտերը, մինչեւ որ երկիրը ամբողջութեամբ ազատագրուի ահաբեկիչներէն:

Աւելի կանուխ, բանակի հրամանատարութիւնը յայտարարած էր, որ սուրիական բանակը ազատագրած է Հոմսի հիւսիսային եւ Համայի հարաւային շրջաններու աւելի քան 65 գիւղեր, որոնք տարիներով զինեալ ահաբեկչական խմբաւորումներուն տիրապետութեան տակ կը մնային: Այս ձեռքբերումը կարեւոր է այն առումով, որ նշեալ տարածքը երթեւեկութեան համար յոյժ կարեւոր է։

Միւս կողմէ, Երեքշաբթի, Մայիս 22ին, Ռուսիոյ պաշտպանութեան նախարարութիւնը հաղորդեց, թէ ռուսական հակաօդային պաշտպանութեան ուժերը վար առած են անօդաչու թռչող սարք մը, որ կը յառաջանար դէպի Լաթաքիոյ նահանգի Հմէյմիմի ռազմական օդակայանը: Նախարարութեան յայտարարութեան մէջ կ՛ըսուի. «Հմէյմիմի հակաօդային պաշտպանութեան համակարգերը վար առին օդակայանին մօտեցող փոքր օդանաւ մը, առանց որեւէ վնաս կրելու: Յարձակող կողմը ցարդ անյայտ կը մնայ»:

Յիշենք, որ Սեպտեմբեր 2015էն ի վեր, Սուրիոյ համաձայնութեամբ՝ Ռուսիա մաս կը կազմէ ահաբեկչութեան դէմ սուրիական բանակին մղած պատերազմին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top