Դէպի Հակամենաշնորհային Քաղաքականութիւն

garoarmenian

ԿԱՐՕ ԱՐՄԵՆԵԱՆ

 

garoarmenian«Կենտրոն» հեռուստատեսութեան «Ուրուագիծ» յայտագիրով հանդէս կու գայ տնտեսական զարգացման եւ ներդրումների նախարար ընկ. Արծուիկ Մինասեանը: Դիմատետրի ընկերներուս եւ առհասարակ Դիմատետրի համայնքին ուշադրութեան կը յանձնեմ այս շատ կարեւոր հարցազրոյցը (www.yerakouyn.com/?p=155215), ուր առաջին անգամ ըլլալով հանգամանաւոր քննարկման կը բերուին Հայաստանի տնտեսութեան այն ճնշիչ մարտահրաւէրները, որոնք կապ ունին տնտեսութեան շուկայական կառոյցին (market structure) եւ շուկայական ուժերու վարքագիծին (market conduct) հետ: Այլ խօսքով՝ նոր կառավարութիւնը ինքզինք կը դնէ երկրի մենաշնորհային համակարգը, ըստ էութեան, լուծարելու եւ տնտեսութիւնը մրցակցային դաշտ բերելու յանձնառութեան տակ: Նախարար Մինասեան կու տայ էական գիծերը այս քաղաքականութեան: Դաշնակցական նախարարը մեծ փորձ ունի այս մարզին մէջ: ՀՅ Դաշնակցութիւնը մտեր էր դաշինքի մէջ նախորդ իշխանութեան հետ, ճի՛շդ այս պատմական առաքելութեամբ, զոր գլխաւորողը Արծուիկ Մինասեանն էր: Օրուան նախագահն ու վարչապետը հրապարակաւ խոստացած էին հանրութեան, որ իրենք պիտի իւրացնէին այս քաղաքականութիւնը՝ կարելի դարձնելով ակնկալուած տեղաշարժը այս մարզին մէջ: Մնացեալը հանրածանօթ իրականութիւն է: Նախորդ իշխանութիւնը – հակառակ իր պերճաշուք հռետորաբանութեան – անհնարին դարձուց ամէն տեղաշարժ: Այսօր կը բացուի նոր էջ, եւ այս դժուարին գործին համար՝ կիրառման նո՛ր կարելիութիւն:

Հակամենաշնորհային քաղաքականութեան գործնական եւ անմիջական թիրախը մեր երկրին համար նոր ու որակաւոր աշխատատեղերու ստեղծումն է: Թէեւ այս հարցը ուղիղ քննարկման նիւթ չդարձաւ հարցազրոյցի ընթացքին, բայց յստակ է, որ ան հիմնական ենթատեքստն էր խօսակցութեան: Նախարարութեան պատասխանատուութիւններուն մաս կը կազմէ ներդրումներու խթանումը: Ներդրումները կրնան գալ երեք դրամագլխային աղբիւրներէ. ներքին ներդրողներէն, արտաքին ներդրողներէն եւ պետական ներդրումներէն։ Ընդունուած փաստ է, որ ներդրումային քաղաքականութեան բանալին տնտեսութենէն ներս վերաներդրումային (re-investment) ծաւալներու տարերային գործընթացն է: Առողջ տնտեսութիւն մը ինքնաբերաբար կը ստեղծէ այդ տարերային հոլովոյթին կենդանի միջավայրը:

Մենաշնորհային համակարգին նիւթած աղէտներէն մէկն ալ ա՛յն է, որ տարիներու ընթացքին ան ցամքեցուցած է այդ կենսական հոլովոյթը՝ իր շահոյթը լայն չափերով դուրս բերելով երկրէն: «Գաղթող» այս դրամագլուխը, իր կարգին, պատճառ եղած է, որ գաղթէ նաեւ երկրին աշխատուժը: Հետեւաբար՝ մեր այսօրուան արտագա՛ղթը:

Կառավարութեան հակամենաշնորհային քաղաքականութեան ամբողջացուցիչ բաղադրիչը՝ վերաներդրումային դաշտի աշխուժացո՛ւմն է: Աւելի՛ն. մենաշնորհային դաշտի լուծարման գործընթացը եւ վերաներդրումային դաշտի խթանումը պէտք է ձեւաւորուին իբրեւ մէկ ամբողջական փաթեթ (policy framework), որպէսզի կարելի ըլլայ երկրի ձեռներէցութիւնը տնտեսութեան մէջ ընդգրկուած պահել: Արտաքին ներդրողները շահագրգռող իրական ուժը ներքին ներդրողներու աշխոյժ գործունէութիւնը միայն կրնայ ըլլալ (բնականաբար մրցակցային պայմաններու մէջ): Այլապէս, արտաքին ներդրողը պիտի ակնկալէ առանձնաշնորհեալ պայմաններ իր ներդրումին դիմաց՝ ստեղծելով մենաշնորհային նոր խաւ մը տնտեսութեան մէջ:

Ես վստահ եմ, որ այս բոլորը մեր նոր տնտեսական քաղաքականութեան մաս պիտի կազմեն, եւ Հայաստան պիտի նուաճէ գերազանցութեան նոր ու փայլուն հանգրուան մը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top