Պոլսոյ Ատեանը «Հայոց Ցեղասպանութիւն» Արտայայտութիւնը Յանցանք Չի Նկատեց

0601bolis

0601bolis

ՊՈԼԻՍ, «Ակօս».- Ինչպէս օրին հաղորդած էինք, այս տարի, Ապրիլ 24ին, Հայոց Ցեղասպանութեան զոհերու յիշատակման ձօնուած միջոցառումներուն ընթացքին Պոլսոյ ոստիկանութիւնը միջամտած եւ մամլոյ յայտարարութեան ընթերցման արգելք եղած էր՝ «Ցեղասպանութիւն» բառի գործածութիւնը պատճառաբանելով: Առաւել, նոյն ժամանակ, Մարդու իրաւունքներու միութեան երեք անդամներ ձերբակալուած էին, որովհետեւ անոնց կրած պաստառին վրայ գրուած էր «Հայոց Ցեղասպանութիւնը ճանչցի՛ր, ներողութի՛ւն խնդրէ եւ հատուցէ՛»։

Պոլսոյ դատախազութեան մամլոյ յանցանքներու գրասենեակը այս մասին քննարկութիւնները աւարտեց եւ Մայիս 30ին յայտարարեց, թէ կատարուածը կը մնայ խօսքի ազատութեան սահմաններուն մէջ: Դատախազութեան որոշումին մէջ ակնարկութիւններ կատարուած են Եւրոպայի Մարդկային իրաւանց ատեանին կողմէ այս մասին հրապարակուած վճիռներուն եւ շեշտուած է, թէ որքա՛ն ալ «ցեղասպանութիւն» բառը ոմանց համար անհանդուրժելի թուի, ընդհանուր գնահատումով՝ անիկա «թուրք ազգը հրապարակաւ նուաստացնելու» միտում մը չի հետապնդեր: Այս պատճառով ալ, դատախազը յայտնեց, որ կասկածեալներուն դէմ հետապնդումի հիմքեր չկան։

«Մարմարա» կ՛աւելցնէ, թէ դատախազութեան այդ որոշումէն ետք, Մարդու իրաւունքներու միութիւնը հրապարակեց յայտարարութիւն մը՝ նշելով, որ վճիռը կարեւոր է դիտարկել քաղաքական կամքի դրսեւորման տեսանկիւնէն։ «Կը տեսնէք, թէ միջազգային համաձայնագիրները անտեսելով՝ Թուրքիա ո՛ւր հասած է միտքի ու խօսքի ազատութեան տեսանկիւնէն։ Հարիւրաւոր մարդիկ այլախոհութեան պատճառով բանտերու մէջ են։ Մեզի համար կարեւոր է, որ դատախազութեան այս որոշումը քաղաքական կամքի տեսանկիւնէ դիտարկուի։ Այսուհետեւ, ամէն Ապրիլ 24ի, մենք մեր քով պիտի պահենք այս վճիռը, որպէսզի զայն ցոյց տանք այն պաշտօնեաներուն, որոնք պիտի փորձեն արգելք հանդիսանալ մեր գործողութիւններուն», ըսուած է յայտարարութեան մէջ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top