«ԱԶԱՏՈՒԹԵԱՆ» ՀԱՐՑԱԶՐՈՅՑԸ ՀԱՅԱՍՏԱՆԻ ԱՐՏԱՔԻՆ ՓՈԽՆԱԽԱՐԱՐ ՌՈՒԲԷՆ ՌՈՒԲԻՆԵԱՆԻ ՀԵՏ

0612roupenroupinian

«Բանակցային Ֆորմատը Փոխելու Փորձ Չի Արւում»

 

ՌՈՒԶԱՆՆԱ ՍՏԵՓԱՆԵԱՆ

0612roupenroupinian

 

Ռուբէն Ռուբինեանը պատասխանում է «Ազատութեան» հարցերին:

 

ՌՈՒԶԱՆՆԱ ՍՏԵՓԱՆԵԱՆ.- Պարոն Ռուբինեան, գերեզման այցելելու վերաբերեալ ադրբեջանական կողմի խնդրանքի բաւարարումը Հայաստանի նոր իշխանութեան մարտավարութեան շրջանակներո՞ւմ է:

ՌՈՒԲԷՆ ՌՈՒԲԻՆԵԱՆ.- Բոլոր հետաքրքրուածները, ովքեր կը տեսնեն այս պատմութիւնը, յստակ կը տեսնեն, որ կայ մի կողմ, որը կողմ է լարուածութեան թուլացմանը, կողմ է կառուցողական մթնոլորտում բանակցութիւններ վարելուն: Կը տեսնեն եւ միւս կողմին, որն անընդհատ դիմում է սադրանքների, օգտագործում է ռազմաշունչ հռետորաբանութիւն, այսինքն՝ կայ իրավիճակ, որտեղ ամէն ինչ պարզ է:

 

ՌՈՒԶԱՆՆԱ ՍՏԵՓԱՆԵԱՆ.- Ադրբեջանը դա ներկայացնում է այլ տեսանկիւնից, ասելով, որ ոչ մի մարդասիրական քայլ էլ տեղի չի ունեցել, այլ իրենք են տարածքներ գրաւել:

ՌՈՒԲԷՆ ՌՈՒԲԻՆԵԱՆ.- Դա ընդամէնը ցոյց է տալիս ադրբեջանական կողմի ադեկվատութեան (պատշաճութեան-Խմբ.) եւ կառուցողականութեան պակասը:

 

ՌՈՒԶԱՆՆԱ ՍՏԵՓԱՆԵԱՆ.- Երբ Նիկոլ Փաշինեանն Ազգային ժողովում ներկայացնում էր կառավարութեան ծրագիը, դարձեալ անդրադարձաւ իր այն յայտարարութեանը, թէ ինքը Լեռնային Ղարաբաղի խնդրի հետ կապուած՝ բանակցելու է միայն Հայաստանի անունից. Ղարաբաղի անունից բանակցել չի կարող, որովհետեւ դրա համար չունի ոչ իրաւական, ոչ էլ բարոյական իրաւունք: Նա անգամ բերեց Սերժ Սարգսեանի եւ Ռոբերտ Քոչարեանի օրինակները, նշելով, որ նրանք ԼՂից էին, կապեր ունէին Ղարաբաղի հետ, իսկ իր դէպքում նման հիմք չկայ՝ բանակցելու Լեռնային Ղարաբաղի անունից: Սա նոր իրողութիւ՞ն է: Եթէ Նիկոլ Փաշինեանը Ղարաբաղի անունից չի բանակցելու, այդ դէպքում բանակցութիւնների թեման ո՞րն է լինելու:

ՌՈՒԲԷՆ ՌՈՒԲԻՆԵԱՆ.- Ես ուզում եմ նշել, որ մեզ համար հիմա կարեւորագոյն առաջնահերթութիւն է բանակցութիւնների դինամիկան (շարժաբանութիւնը-Խմբ.) պահպանելը: Արցախի մասնակցութեան մասով, ինչպէս գիտենք, կառավարութեան ծրագրում յստակ նշուած է, որ Արցախը պէտք է որոշիչ ձայն եւ մասնակցութիւն ունենայ բանակցութիւններում: Ինչո՞ւ է սա ասւում, որովհետեւ տրամաբանական չէ, որ հակամարտութեան հիմնական կողմը չի մասնակցում իր ճակատագրին վերաբերող հարցերի քննարկմանը: Սակայն, պէտք է նշել, որ սա ոչ թէ նոր իրողութիւն է կամ բանակցային ֆորմատի (ձեւաչափի-Խմբ.) փոփոխութեան փորձ, ապակառուցողական փորձ, այլ սա ընդամէնը հարց է, որը, կարծում ենք, պէտք է քննարկուի: Բայց, միեւնոյն ժամանակ, պարոն Փաշինեանը մի քանի անգամ յայտարարել է, որ պատրաստ է հանդիպել եւ բանակցել Իլհամ Ալիեւի հետ:

Փաշինեանը չի ասել, որ ինքը չի բանակցելու Լեռենային Ղարաբաղի անունից: Նա նշում է այն փաստարկները, որոնց հիման վրայ, մեր կարծիքով, բանակցութիւնների արդիւնաւէտութեան բարձրացման համար, Արցախը պէտք է ներգրաւուած լինի բանակցութիւններում:

 

ՌՈՒԶԱՆՆԱ ՍՏԵՓԱՆԵԱՆ.- Ադրբեջանի առջեւ այդպիսի պայման դրուելո՞ւ է, թէ քանի դեռ Լեռնային Ղարաբաղը ներգրաւուած չէ բանակցութիւններում, ապա Հայաստանի վարչապետը չի բանակցելու:

ՌՈՒԲԷՆ ՌՈՒԲԻՆԵԱՆ.- Ինչպէս նշեցի՝ այս փուլում մեզ համար կարեւորը դինամիկան պահպանելն է, բայց մեր ընդհանուր տրամաբանութեան մէջ մտնում է հետեւեալ գիտակցումը, որ Արցախը բանակցային գործընթացում պէտք է ունենայ որոշիչ ձայն, եթէ մենք ուզում ենք բարձրացնել բանակցութիւնների արդիւնաւէտութիւնը:

 

ՌՈՒԶԱՆՆԱ ՍՏԵՓԱՆԵԱՆ.- Կարո՞ղ ենք ասել, որ այսօրուայ իշխանութեան մօտեցումները Լեռնային Ղարաբաղի հարցում համընկնում են նախկին իշխանութեան մօտեցումների հետ, եւ էական տարբերութիւներ չկան:

ՌՈՒԲԷՆ ՌՈՒԲԻՆԵԱՆ.- Եթէ խօսքը ռադիկալ (արմատական-Խմբ.) փոփոխութիւնների մասին է, բնականաբար, ոչ, մեծ տարբերութիւններ չկան:

 

ՌՈՒԶԱՆՆԱ ՍՏԵՓԱՆԵԱՆ.- Յաջորդ շաբաթ Նիկոլ Փաշինեանը մեկնելու է Մոսկուա, որտեղ նախատեսւում է նրա հանդիպումը ՌԴ նախագահ Պուտինի հետ: Ըստ ադրբեջանական ԶԼՄների, Մոսկուա է մեկնելու նաեւ Իլհամ Ալիեւը: Հնարաւո՞ր է, որ Մոսկուայում Փաշինեան-Ալիեւ հանդիպում տեղի ունենայ:

ՌՈՒԲԷՆ ՌՈՒԲԻՆԵԱՆ.- Այս պահի դրութեամբ ոչ մի պայմանաւորուածութիւն չկայ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top