Մարտունի Քաղաքի Հնավայրին Մէջ Երեք Նոր Տապանաքարեր Յայտնաբերուած Են

0613mardouni

0613mardouni

 

«Պատմամշակութային արգելոց-թանգարաններու եւ պատմական միջավայրի պահպանութեան ծառայութիւն» Գեղարքունիքի մարզային ծառայութեան նախաձեռնութեամբ, Մարտունիի քաղաքապետարանի եւ Հայ առաքելական եկեղեցւոյ Գեղարքունեաց թեմին մասնակցութեամբ, պատմութեան յուշարձանի տարածքին վրայ, հողի շերտէն մաքրուած են 12 տապանաքարեր եւ կանգնեցուած են 7 գեղաքանդակ խաչքարեր:

Ըստ Խոսրով Խլղաթեանի՝ խաչքար-տապանաքարերու մաքրման եւ կանգնեցման աշխատանքներուն մասնակցած են Հայաստանի մշակոյթի նախարարութեան «Պատմամշակութային արգելոց-թանգարաններու եւ պատմական միջավայրի պահպանութեան ծառայութիւն» Գեղարքունիքի մարզային ծառայութեան պետ Գոռ Գասպարեան, Գեղարքունեաց թեմի առաջնորդական տեղապահ Կիրակոս վրդ. Դաւթեան, Մարտունիի քաղաքապետ Արմէն Աւետիսեան եւ Մարտունիի քաղաքապետարանի աշխատակիցներ: Քանի մը խաչքարեր մեծ չափերու պատճառով՝ բարձրացուած են եւ կանգնեցուած վերամբարձ կռունկի օգնութեամբ:

«Մարտունի քաղաքէն դէպի հարաւ եւ Մարտունի-Գետափ ճանապարհի արեւելեան կողմը գտնուող բնակավայրը խոր հնադարէն աշխոյժօրէն բնակեցուած եղած է մինչեւ Ք. Ե. 18րդ դարը, որուն մասին կը վկայեն խաչքարերու կամ տապանաքարերու վրայ պահպանուած արձանագրութիւնները:

Բնակավայրը լքուած է մահմետական ցեղերու աւերիչ ասպատակութիւններուն հետեւանքով: Տարածքին վրայ կը պահպանուին շուրջ հինգ տասնեակ յուշարձաններ եւ տապանաքարեր, որոնք կը թուագրուին Ք. Ա. 9-18րդ դարերուն, սակայն որոշ յուշարձաններ, որոնք չունին արձանագրութիւններ, իրենց ոճով կը յիշեցնեն աւելի վաղ ժամանակները: Այդ յուշարձանները ընդգրկուած են պետական պահպանութեան ցուցակին վրայ: Մեր կատարած աշխատանքներուն մէջ կարեւորը այն եղաւ, որ կանգնեցուած 7 խաչքարերէն 3ը ընդգրկուած չէին պետական պահպանութեան ցուցակին վրայ: Անոնք արդէն պիտի ստանան պետական արձանագրութիւն եւ ուսումնասիրութեան նիւթ դառնան մասնագէտներու համար: Չի բացառուիր, որ հնագիտական ուսումնասիրութիւններու պարագային, այստեղ՝ հողի շերտին տակ գտնուող նոր ու կարեւոր յուշարձաններ յայտնաբերուին», կը պատմէ Գեղարքունիքի մարզի պատմական միջավայրի պահպանութեան ծառայութեան պետ Գոռ Գասպարեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top