Դժբախտ Զուգադիպութիւն. Թուրք Ամերիկացին Յարձակողական Քննադատութիւն Կը Կատարէ Պուրտէյնին՝ Վերջինիս Անձասպանութեան Նախօրեակին

Harout-Sassounian

 

ՅԱՐՈՒԹ ՍԱՍՈՒՆԵԱՆ

 

Harout-SassounianԸնկերներէս մէկը ինծի ղրկած էր Նիւ Եորք ապրող թուրք ամերիկացի Իպրահիմ Քուրթուլուսի ծաւալուն նամակին պատճէնը՝ ուղղուած CNN-ի հարիւրաւոր աշխատակիցներուն: Նամակին մէջ ան խստօրէն քննադատած էր Էնթընի Պուրտէյնը, Քրիս Քոմօն եւ ուրիշներ՝ Հայոց Ցեղասպանութեան ճանաչման համար: Քուրթուլուսի ելեկտրոնային նամակի թեման վերնագրուած է՝ «Երբ CNN-ի Քրիս Քոմօն եւ «յատկապէս» Էնթընի Պուրտէյնը կ՛օրինականացնեն ռէյսիզմը (ցեղապաշտութիւնը)»։

Դժբախտ զուգադիպութեամբ մը թրքական նամակը յղուած է 5 Յունիս 2018ին, Պուրտէյնի՝ անձնասպանութիւն գործելէն միայն երեք օր առաջ…: Նկատի ունենալով, որ վերջին օրերուն մեծ թիւով հայեր եւ օտարներ գրած էին՝ անհիմն կասկածներ յայտնելով, թէ Պուրտէյնի մահուան պատճառը Ատրպէյճանը կամ Թուրքիան են, կ՛ուզեմ յստակացնել, որ ես չեմ հաւատար նման դաւադրութիւններու: Դժբախտաբար, Պուրտէյն, որ տարիներ շարունակ թմրանիւթեր օգտագործած էր, մոլի խմող էր եւ տառապած է լուրջ ընկճախտէ, անցեալ շաբաթ անձնասպանութիւն գործեց պանդոկի իր սենեակին մէջ, Ֆրանսա կատարած այցելութեան ընթացքին։

Աւելի՛ն. անոնք, որոնք կը քարոզեն այս դաւադրութիւնները, վնաս կը հասցնեն հայկական շահերուն։ Էնթընի Պուրտէյն, որ «Անծանօթ Վայրեր» խորագիրով ճամբորդական եւ խոհարարական յայտնի յայտագիր մը ունէր CNN պատկերասփիւռի ընկերութեան մէջ, յայտնուած էր Ատրպէյճանի «սեւ ցուցակ»ին մէջ, անցեալ տարի Հայաստան կատարած այցելութենէն ետք Արցախ մեկնած ըլլալուն պատճառով: Պատկերասփիւռի հաղորդումը անցեալ ամիս ցուցադրուեցաւ CNN-էն, մեծ հրճուանք պատճառելով հայերուն եւ յառաջ բերելով ատրպէյճանցիներու եւ թուրքերու վրդովումը: Ենթադրելով, որ Ատրպէյճանը սպաննած է Պուրտէյնը՝ հայերը պարզապէս օտարները կը տարհամոզեն Արցախ այցելելէ…

Քուրթուլուս քննադատած է CNN-ի Քրիս Քոմօն՝ վերջինիս իր յատագիրին ընթացքին քոնկրեսական Էտըմ Շիֆի հետ (դեմոկրատ, Քալիֆորնիա) հարցազրոյց կատարելուն համար:  Քուրթուլուս Շիֆը ներկայացուցած էր իբրեւ «ռէյսիսթ»՝ Հայոց  Ցեղասպանութեան ճանաչման աջակցելուն համար եւ զայն համեմատած՝ Քու-քլաքս-քլանի Տէյվիտ Տուքի հետ: Այնուհետեւ Քուրթուլուս քննադատած էր քոնկրեսական Նենսի Փելոսին (դեմոկրատ, Քալիֆորնիա)՝ 2016ին կատարած իր յայտարարութեան մէջ Հայոց Ցեղասպանութիւնը ճանչնալուն համար: Քուրթուլուս ծիծաղելիօրէն պնդած է, որ Ցեղասպանութեան ժամանակ հայերը հաւանաբար մահացած են «ծերութենէն», այլ ոչ թէ սպաննուած են…

Քուրթուլուս նաեւ իր զայրոյթը թափած է Էմի Կուտմընի վրայ, որ կը վարէ «Ժողովրդավարութիւնը Հիմա» մրցանակակիր ռատիօ-պատկերասփիւռի լուրերու ծրագիրը, որ կը սփռուի Հիւսիսային Ամերիկայի 900 հանրային հեռարձակման կայաններէ՝ իր յայտագիրին ընթացքին Հայոց Ցեղասպանութեան ճանաչման համար։

Քուրթուլուս ոչ միայն հերքած է Հայոց Ցեղասպանութեան իրողութիւնը՝ զայն անուանելով «կեղծիք», այլ նաեւ մեղադրած է հայերը՝ «թուրքերու դէմ ոչնչացման արշաւ» կազմակերպելնուն համար…: Ան նաեւ կեղծաւորու-թեամն պնդած է, որ «հայերու դէմ համակարգուած բնաջնջման արշաւը ոչ միայն անհաւանական էր, այլ նաեւ անկարելի…»։

Այնուհետեւ Քուրթուլուս քննադատած է Էնթընի Պուրտէյնը՝ Սերժ Թանքեանի ուղեկցութեամբ Հայաստան եւ Արցախ կատարած այցելութիւններուն համար: Քուրթուլուս Թանքեանը ներկայացուցած է իբրեւ «հայ-ամերիկեան ռոք խումբի (System of a Down) անդամ, որուն հիմնական նենգ նպատակն է աշխարհի երիտասարդ երկրպագուներու ուղեղներու լուացումը՝ «Հայոց Ցեղասպանութիւնը» ընդունելու համար»: Այնուհետեւ Քուրթուլուս մեղադրած է Պուրտէյնը՝ «այդ ատելութեան ամբողջ քարոզչութիւնը իր դրուագին մէջ (https://www.youtube.com/watch ?v=A3oEJjTbDpo) կրկնելուն համար»։

Վիրճինիա նահանգի Շարլոթվիլ քաղաքի «սպիտակ գերակայութեան» հետեւորդներուն հետ Պուրտէյնը համեմատելէ ետք, Քուրթուլուս կը հարցնէ. «Ի՞նչ է տարբերութիւնը»: Դժբախտաբար, Քուրթուլուս զրպարտած է բոլոր անոնք, որոնք պաշտպանած են Հայոց Ցեղասպանութեան հաւաստիութիւնը: Ուրիշները մեղաւոր չեն, որ Օսմանեան Թուրքիոյ կառավարութիւնը կազմակերպած էր հայ ժողովուրդի բնաջնջումը: Եթէ ասոր հետեւանքով թուրք ժողովուրդը սարսափելի վարկ ձեռք ձգած է, ապա այս պատճառով հայ զոհերը մեղադրելը սխալ է: Քուրթուլուսի փաստարկը համարժէք է անոր, որ դատապարտեն բոլոր անոնց, որոնք կը խօսին Հրէական Ողջակիզման մասին, քանի որ այդ մէկը կրնայ վնասել գերմանացիներու վարկին…

Այնուհետեւ Քուրթուլուս անարգած է Հայոց Ցեղասպանութեան մասին գրած բոլոր մտաւորականները, ներառեալ՝ դեսպան Հենրի Մորկընթաուը, որ իր՝ «Ազգի Մը Սպանութիւնը» գիրքին մէջ գրած է ականատեսի իր վկայութիւնները: Ասոր փոխարէն, Քուրթուլուս գովերգած է այսպէս կոչուած «մտաւորականները», որոնք թրքական կառավարութեան ֆինանսաւորումով Ցեղասպանութիւնը հերքողներ են։

Քուրթուլուս իր նամակը աւարտած է Պուրտէյնի հասցէին ուղղուած յաւելեալ վիրաւորանքներով. «Եթէ ես ապրէի աւելի նուազ ցեղապաշտական երկրի մը մէջ, Էնթընի Պուրտէյն անյապաղօրէն կը կորսնցնէր իր աշխատանքը: Սակայն խնդիրը կապուած չէ միայն ատելութեամբ լեցուն մոլեռանդներու, ինչպիսին է Էնթընի Պուրտէյնը. ինչո՞ւ (CNNի) նախագահ Ճեֆ Ցուքըր, որ նոյնպէս ստացած է մեր հաղորդագրութիւնները, կը թույլատրէ Պուրտէյնի արատաւոր ռէյսիզմը»։

Քուրթուլուս մեղադրած է նաեւ CNN-ի այն աշխատակիցները, որոնք չեն բողոքած «Էնթընի Պուրտէյնի անպատասխանատուութեան, ատելութեան եւ կաշառակերութեան փաստերուն դէմ…: Ինչպէ՞ս կրնային CNN-ի լրագրողները հանդուրժել Էնթընի Պուրտէյնի նախապաշարումները, ինչպէս նաեւ փաստերու կեղծումը»։

Քուրթուլուսի բազմաթիւ կեղծիքներուն եւ խեղաթիւրումներուն դէմ հակադրուելու փոխարէն ես պարզապէս մեջբերում կ՛ընեմ Թուրքիոյ Հանրապետութեան հիմնադիր Քեմալ Աթաթուրքէն, որ 1 Օգոստոս 1926ին Los Angeles Examiner թերթին մէջ հրապարակուած հարցազրոյցով խոստովանած է. «Նախկին Երիտթուրքերու կուսակցութեան այս մնացորդները, որոնք պէտք է պատասխան տան կեանքին համար մեր միլիոնաւոր քրիստոնեայ հպատակներուն, որոնց, զանգուածաբար, դաժանաբար քշեցին իրենց տուներէն եւ կոտորեցին, չեն ենթարկուիր հանրապետական իշխանութեան: Անոնք մինչեւ այսօր ապրած են թալանով, կողոպուտով, կաշառակերութեամբ եւ թշնամաբար վերաբերած են որեւէ գաղափարի կամ առաջարկութեան՝ լծուելու համար օգտակար աշխատանքի եւ վաստակելու իրենց ապրուստը՝ իրենց ճակատի արդար քրտինքով»։

Քանի որ ես Քուրթուլուսի ելեկտրոնային նամակին պատճէնը ստացած եմ CNN-ի ելեկտրոնային հրապարակման հարիւրաւոր հասցէներու ամբողջական ցանկին հետ, ուր տեղ գտած անուններուն ան ուղարկած էր իր ելեկտրոնային նամակը, ես իմ յօդուածը կ՛ուղարկեմ նոյն ելեկտրոնային հրապարակման հասցէներով, որպէսզի Քուրթուլուս չխաբէ CNN-ի լրագրողները։

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top