Սէյրան Օհանեան Հարցաքննուեցաւ Բանակին Մէջ Տեղի Ունեցած Չարաշահումներուն Գործով

RA Defense Minister Seyran Ohanyan answers question of journalists

RA Defense Minister Seyran Ohanyan answers question of journalists

 

ԵՐԵՒԱՆ.- Հայաստանի պաշտպանութեան նախկին նախարար Սէյրան Օհանեան երեք օր առաջ, իբրեւ վկայ հարցաքննուեցաւ իր ղեկավարման տարիներուն բանակին մէջ տեղի ունեցած չարաշահումներուն գործով: Այս մասին, ըստ  «Ազատութեան», փոխանցեց Օհանեան:

Պատասխանելով հարցումին, թէ ինչի՛ շուրջ էր հարցաքննութիւնը՝ պաշտպանութեան նախկին նախարարը պատասխանեց. «Նախաքննական ընթացակարգերէն մեկնելով՝ այդ հարցին ես չեմ կրնար պատասխանել: Անիկա կ՛առնչուէր բանակի գործունէութեան»:

Պետական եկամուտներու կոմիտէն շաբաթ մը առաջ յայտարարած էր, որ 2014-2017ի ընթացքին պաշտպանութեան նախարարութեան մէջ գնումներու եւ բանակաշինութեան ոլորտներուն մէջ տեղի ունեցած չարաշահումներուն վերաբերեալ քրէական գործով մեղադրանք առաջադրուած է բարձրաստիճան երկու զինուորականներու նկատմամբ. անոնք տակաւին չեն կալանաւորուած:

Յայտարարութեան մէջ նաեւ կը նշուէր, որ բանակին մէջ չարաշահումներու գործով հարցաքննութեան կանչուած են պաշտպանութեան նախարարութեան նախկին ու ներկայ բարձրաստիճան պաշտօնեաներ, նաեւ այդ տարիներուն պաշտպանութեան նախարարութիւնը ղեկավարած Սէյրան Օհանեան: Նախկին նախարարի հարցաքննութեան վերաբերեալ նոյնպէս ՊԵԿէն մանրամասնութիւններ չեն հաղորդուած:

Ապրիլեան պատերազմի օրերուն պաշտպանութեան նախարարութիւնը ղեկավարած Սէյրան Օհանեան Երեքշաբթի, 19 Յունի-սին օր տեղի ունեցած զրոյցին ընթացքին վստահեցուց, թէ ինք տեղեակ չէ եղած, որ քառօրեայ պատերազմի ատեն բանակին ուղարկուած օգնութեան մէկ մասը ո՛չ թէ առաջնագիծ գացած է, այլ Մանուէլ Գրիգորեանի ա-ռանձնատուն: Օհանեան պնդեց, որ Ղարաբաղի իշխանութիւնները պէտք է պարզաբանեն, թէ ինչ ճանապարհով կրնար իւրացուիլ բանակի ունեցուածքը:

Ղարաբաղեան կողմը Օհանեանի յայտարարութիւնը «անհասկնալի» որակած էր:

Չորեքշաբթի օր տեղի ունեցած զրոյցին ընթացքին, Սէյրան Օհանեան վստահեցուց, թէ ինք մեղադրանքներու սլաքը ղարաբաղեան իշխանութիւններուն վրայ ուղղելու նպատակ չէր ունեցած. «Այդտեղ պատասխանատուութիւն պէտք է կրեն այն անձերը, որոնք իրականութեան մէջ տեղեակ եղած են այդ ամէն ինչէն կամ տեղեակ չեն եղած»:

Շարունակելով պարզաբանել իր յայտարարութիւնները՝ պաշտպանութեան նախկին նախարարը նշեց. «Պէտք է պարզել, որ նշուած նիւթական միջոցները իրենք ուրկէ՞ ստացած են. արդեօք Արցախէ՞ն կամ Հայաստանի Հանրապետութենէն: Արդեօք ճանապարհէ՞ն վերադարձուած են կամ Արցախի մէջ իրենք ստացած են զանոնք վերադարձուած, որովհետեւ այդ ինքնաշարժները չէին կրնար պաշտպանութեան նախարարութեան պատկանիլ, եթէ հաշուառուած ըլլային, անոնք պէտք էր ըլլային պաշտպանութեան նախարարութեան մօտ»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top