Բացայայտուեցաւ Անհիմն Յայտարարութիւններ Կատարող Հակահայ Գրող Մը Եւս

Harout-Sassounian

ՅԱՐՈՒԹ ՍԱՍՈՒՆԵԱՆ

 

Harout-SassounianԱյնպէս կը թուի, թէ շաբաթ մը չ՛անցնիր առանց հանդիպելու խորհրդաւոր մէկ այլ գրողի, որ պատուիրուած յօդուած չգրէ Ատրպէյճանի մասին եւ չվարկաբեկէ Հայաստանի եւ շարք մը հայերու հեղինակութիւնը։

Այսօրինակ վերջին գրողը Փիթըր Թէյզն է, որ 11 Յունիս 2018ին, «Եորէյժա Ռիվիու» (Eurasia Review) կայքին վրայ տեղադրած է «Ռուսիոյ Օտար Գործակալները Ամերիկայի մէջ. Թրամփի Կապերը Հայ Լոպիիստներու Հետ» խորագիրը կրող յօդուածը։

Այս խիստ կողմնակալ յօդուածը կը դիմէ չափազանցութիւններու եւ չհիմնաւորուած մեղադրանքներու՝ Հայաստանը եւ անհատ հայեր կապելու Ռուսիոյ, եւ որ առաւել զարմանալի է՝ նախագահ Տանըլտ Թրամփի հետ…

Նախ, Թէյզ կը խեղաթիւրէ իրանահայ Գէորգ Վարդանեանի գովասանքի արժանի գործողութիւնները Երկրորդ Համաշխարհային պատերազմի ընթացքին՝ զայն անուանելով «խորհրդահայ ամէնէն արդիւնաւէտ լրտեսներէն մէկը»: Իրականութեան մէջ, Վարդանեան վիթխարի ծառայութիւն մատուցած է ամբողջ աշխարհին՝ խափանելով Ստալինի, Չըրչըլի եւ Ռուզվելթի սպանութեան հիթլերեան ծրագրերը՝ 1943ին, Թեհրանի խորհրդաժողովին իբրեւ դաշնակիցներ անոնց հանդիպման ատեն: Թէյզ կը նուազեցնէ իր սեփական վարկանիշը՝ նշելով, որ «Սի.Այ.Էյ.»ի (CIA) տնօրէն Սթենսֆիլտ Թըրնըր եւ գործակալութեան բարձրաստիճան պաշտօնեաները վստահած են Վարդանեանին: Ինչո՞ւ անոնք պիտի վստահէին Վարդանեանին, եթէ ան վատ մարդ ըլլար…: Անհաւատալիօրէն, Թէյզ նոյնիսկ կը պնդէ՝ թէ ան կը կասկածի Վարդանեանէն, քանի որ վերջինս կը խօսէր հայերէն…

Այնուհետեւ Թէյզ կը քննադատէ երկու ռուս լրագրողները՝ Մարգարիտա Սիմոնեանը եւ Գայեանէ Չիչակեանը, որոնք կ՛աշխատին «Ռուսիան Այսօր» հեռատեսիլի ընկերութեան մէջ: Անոնց միակ մեղքը այն է, որ «բարետես» կիներ են, եւ առանց որեւէ ապացոյցի Թէյզ զանոնք կը  մեղադրէ՝ «շատ այլ ազդեցիկ «ռուս» գործակալներու պէս էթնիկ հայ ըլլալնուն մէջ»։

Յաջորդը Ռուսիոյ Պետական Տումայի փոխխօսնակ Արթուր Չիլինկարովն է, որուն վրայ Թէյզ կը յարձակի հայ ըլլալուն համար: Չիլինկարովի մեղքը այն է, որ Մոսկուայի մէկ ճաշկերոյթի սրահին մէջ ան նստած եղած է նախագահ Վլատիմիր Փութինի կողքի սեղանին: Չիլինկարով մեծարուած է Խորհրդային Միութեան եւ Ռուսիոյ կողմէ իբրեւ բեւեռախո՛յզ իր սխրանքներուն համար, այլ ոչ թէ հայ ըլլալուն պատճառով, ինչպէս կը յայտարարէ Թէյզ…

Հաւանաբար, Թէյզի յօդուածին ամէնէն անյաջող հատուածը կեղծ  պնդումն է ամերիկահայ լրագրող Էմիլ Սանամեանի՝ «օտար գործակալ» ըլլալուն մասին: Այս ամբողջութեամբ կեղծ մեղադրանք է: Սանամեան ինծի ըսաւ, որ ինք ո՛չ հիմա, ոչ ալ անցեալին Միացեալ Նահանգներու արդարադատութեան բաժանմունքին մէջ արձանագրուած է իբրեւ «օտարերկրացի գործակալ»: Յոյսով եմ, որ Սանամեան դատի կու տայ Փիթըր Թէյզը եւ անոր կայքը՝ իր հեղինակութեան վնաս հասցնելուն համար: Հայկական ամէն ինչի նկատմամբ Թէյզի կոյր ատելութեան աստիճանը ցոյց տալով, յօդուածը կը մեղադրէ Սանամեանը՝ «Ամերիկացիները Արցախի համար» կազմակերպութեան համար աշխատելուն մէջ, կազմակերպութիւն մը, որ «ստեղծուած է օրինականացնելու պատերազմական յանցագործութիւնները եւ ռուսական զօրքերու աջակցութեամբ հայերու կողմէ ապօրինի գրաւումը, որ իրականացուած է անողոքաբար (Ուքրանիայէն եւ Վրաստանէն շատ առաջ, Ռուսիոյ իշխանութիւնը օգտագործեց հայ զինուորները՝ ինքնիշխան Ատրպէյճանի տարածքը գրաւելու, ձերբակալութիւններ իրականացնելու եւ Ատրպէյճանի արեւմտամէտ ուղղութիւնը խափանելու համար): Այս նախադասութեան մէջ ոչ մէկ ճիշդ բառ կայ: Ռուսական իշխանութիւնները չեն օգտագործած հայ զինուորները: Հայերը իրենք զիրենք ազատագրած են Ատրպէյճանի ճնշող ռեժիմէն, որ տասնամեակներ շարունակ զանգուածային ոճիրներ կը գործէր Արցախի հայերուն դէմ…։

Իրականութեան մէջ, ռուս զինուորները աջակցած են Ատրպէյճանի եւ սպաննած՝ Արցախի բազմաթիւ անմեղ բնակիչներ: Աւելին, «Ամերիկացիները Արցախի համար»ը եղած է ոչ-շահութաբեր կազմակերպութիւն մը, որ ֆինանսաւորուած է ամերիկահայերու կողմէ:

Սանամեան ինծի յայտնեց, որ այնտող աշխատած է իբրեւ անվճար աշխատող: Բացի այս, երբ Սանամեան աշխատած է Ուաշինկթընի մէջ Լեռնային Ղարաբաղի Հանրապետութեան գրասենեակը, այդ կազմակերպութիւնը տակաւին չէր գրանցուած որպէս «օտարերկրեայ գործակալ» Միացեալ Նահանգներու արդարադատութեան բաժանմունքին մէջ: Առաւել՝ Թէյզ կեղծ պաշտօն յօրինած է՝ պնդելով, որ «Սանամեան իբրեւԼՂՀ հասարակայնութեան հետ կապերու գրասենեակի տնօրէն, պատասխանատու էր տեղեկատուական պատերազմներու եւ քարոզչութեան համար»։

Թէյզի յօդուածին մէջ կան նաեւ շարք մը այլ անճշդութիւններ, որոնք ցոյց կու տան անոր գիտելիքներու պակասը՝ հայկական հարցերու վերաբերեալ: Օրինակ՝ Թէյզ կը գրէ, որ Հայաստան անկախացած է «Խորհրդային Ռուսիայէն»՝ Խորհրդային Միութեան փոխարէն: Երկրորդ անհեթեթութիւնը՝ Թէյզի մեկնաբանութիւնը Սերժ Սարգսեանի լուսանկարին վերաբերեալ, ուր Սարգսեան կ՛երեւի Թրամփի եւ անոր տիկնոջ հետ, Նիւ Եորքի ՄԱԿի շէնքին մէջ: Թէյզ այդ լուսանկարը կը վերագրէ ամերիկահայ համայնքի լոպիիստական ջանքերուն: Սակայն, լոպիինկի անհրաժեշտութիւն երբեք չկար: Եթէ Թէյզ քիչ մը հետազօտութիւն կատարէր, ապա պիտի յայտնաբերէր մէկ այլ լուսանկար, ուր Ատրպէյճանի նախագահ Իլհամ Ալիեւն էր նախագահ Թրամփի եւ անոր տիկնոջ հետ ՄԱԿի մէջ, ինչպէս նաեւ կային բազմաթիւ այլ պետութիւններու ղեկավարներու հետ լուսանկարներ: Մէկ այլ դիտաւորեալ խեղաթիւրում Թէյզի կողմէ. Սանամեանի կինը՝ Լոնտոնի քաղաքային համալսարանի Cass Business School-ի շրջանաւարտը, 2012ին եղած է համալսարանի գլխաւոր «նուիրատուներէն եւ հովանաւորներէն» մէկը: Թէյզ չի նշեր, որ Սանամեանի կինը դասուած է աւելի փոքր՝ 1000 տոլարէն նուազ դասակարգին մէջ, բան մը, որ զայն չի դարձներ գլխաւոր նուիրատու։

Թէյզի յաջորդ յարձակումը հայերու վրայ՝ անոնց ենթադրեալ կապն է նախագահ Թրամփի հետ: Ահա հոս է, որ Թէյզ ինքն իրեն թոյլ կու տայ արտաբերելու իր ամէնէն անհեթեթ մեղադրանքը: Իրականութեան մէջ, դժուար թէ գոյութիւն ունենայ հայ մը, զոր ճանչնայ նախագահ Թրամփ, ուստի Թէյզ կը հնարէ երեւակայական կապեր: Թէյզ նոյնիսկ կը համարձակի խեղաթիւրել «Հայերը Պէտք Է Կապ Հաստատեն Թրամփի Հետ՝ Քոնկրեսին Մէջ Իրենց Հանրապետական Կողմնակիցներուն Միջոցով» վերնագրով 2016ին գրած յօդուածս: Եթէ Թէյզ ազնիւ լրագրող ըլլար, ան մէջբերում կ՛ընէր իմ յօդուածէս, որուն մէջ կ՛ըսուի. «Նորընտիր նախագահին հետ հայ-ամերիկեան կապեր գործնականին մէջ գոյութիւն չունին»։

Թէյզ նաեւ կը խեղաթիւրէ Ամերիկայի Հայ Դատի յանձնախումբի գործադիր տնօրէն Արամ Համբարեանի յայտարարութիւնը, որուն միջոցաւ ան կ՛առաջարկէ աշխատիլ նորընտիր նախագահին հետ: Այդ նախադասութեան մէջ չկայ որեւէ նշում՝ ամերիկահայերու եւ Թրամփի միջեւ գոյութիւն ունեցող կապերու մասին: Այլ բան չունենալով ներկայացնելու, Թէյզ կ՛օգտագործէ Էնտի Սուրապեանի բոլորովին անյայտ անունը՝ իբրեւ «ուրիշ հայ մը՝ քաղաքական գործիչ, Թրամփի Սպիտակ տան խորքը»: Սուրապեան կը նկարագրուի իբրեւ «Սթիւ Պենընի քաղաքական խորհրդական Թրամփի վարչակարգին մէջ եւ քարոզչութեան վեթերան»: Ի դժբախտութիւն Թէյզի՝ ո՛չ Պենւն, ոչ ալ Սուրապեան կը շարունակեն աշխատիլ Սպիտակ տան մէջ։

Թէյզ այնուհետեւ կը նշէ Քիթ Նահիկեանի անունը՝ իբրեւ «ամենայն հաւանականութեամբ, Հայկական Սփիւռքի ամէնէն ազդեցիկ եւ բարձրաստիճան անդամ եւ արձանագրուած լոպիիստ, կապուած Թրամփի քարոզարշաւին հետ… որ կոչուած էր գլխաւորելու Թրամփի անցումային խումբը, 2017ին»: Ասիկա ուշադրութիւն շեղող եւս մէկ հնարք է: Նահիկեան կապ չունի հայ համայնքին հետ: Երկու տարի առաջ ես անոր ելեկտրոնային նամակ մը ուղարկած էի եւ մինչ օրս կը սպասեմ անոր պատասխանին: Ահա՛ թէ որքան մօտ է Նահիկեան հայ համայնքին։

Թէյզ վաղահասօրէն կ՛ակնարկէ քոնկրեսական Տենի Թարխանեանի (հանրապետական, Նեւատա)՝ իբրեւ «հայկական լոպիի անդամ, նախագահ Թրամփի մօտ մուտք ունենալու հնարաւորութեան» մասին: Եթէ Թարխանեան Նոյեմբերին յաղթէ, միայն այն ատեն կրնանք որոշել, թէ ան իր կապերով որքա՞ն մօտիկ պիտի ըլլայ Սպիտակ տան։

Անհաւատալիօրէն, Թէյզ կը նշէ Քիմ Քարտաշեանը՝ իբրեւ «տնային-փոռնօ-թուիթըր լոպիիստ», որ բազմաթիւ առիթներով հանդիպած է Թրամփի հետ, վերջին անգամ Մայիս 2018ին»՝ յաջողութեամբ նախագահ Թրամփի կողմէ ներում ապահովելով ցմահ դատապարտուած  բանտարկեալ (ոչ հայ) տարեց կնոջ մը համար: Թէյզ աւելի համոզիչ կ՛ըլլար, եթէ Քարտաշեան խնդրանք ներկայացուցած ըլլար Թրամփին՝ հայկական որեւէ հարցի վերաբերեալ: Սակայն չէ եղած որեւէ կապ՝ իբրեւ «հայ լոպիիստ» Քարտաշեանի եւ նախագահ Թրամփի միջեւ։

Թէյզ կեղծօրէն կ՛եզրափակէ իր անհիմն եւ ամօթալի յօդուածը՝ նշելով. «Այս լայն ու խոր կապերը ներկայ անփորձ նախագահին եւ անոր քարոզարշաւին հետ, կը ստեղծեն ազգային անվտանգութեան հաւանական հետեւանքներ եւ արժանի են մեծ ուշադրութեան՝ երաշխաւորելու, որ Փութինի շարունակուող միջամտութիւնը հայրենի Միացեալ Նահանգներու մէջ, կը փշրուին եւ ձախողութեան կը մատնուին»։

Չեմ կարծեր, որ Թրամփ Փութինի հետ կապեր հաստատելու համար ամերիկահայերու կարիքը ունի: Հակառակ Թէյզի անհիմն մեղադրանքներուն՝ նախագահ Թրամփ երկար ժամանակ ուղիղ կապ ունեցած է Քրեմլինի հետ եւ ոեւէ մէկուն օգնութեան կարիքը չունի։

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top