Մանուէլը Համակարգի Ծնունդ Է

0619manouelgrigorian

ԱՐԱՄ ԱԲՐԱՀԱՄԵԱՆ

0619manouelgrigorian

Մանուէլ Գրիգորեան

Ֆիզիկական օրէնքները չէզոք են բոլոր տեսակի բարոյական, քաղաքական, «տղայական» եւ կենցաղային գնահատականների հանդէպ: Ձգողականութեան ուժը նոյն ձեւով գործում է Երեւանում եւ Գլենդելում, ազդում է լաւ եւ վատ մարդկանց, հարուստների եւ աղքատների, չարագործների եւ բարեգործների վրայ: Մօտաւորապէս նոյն ձեւով ես պատկերացնում եմ պետութեան օրէնքները: Եթէ, օրինակ, ապօրինի զէնք պահելը դատապարտելի է գեներալ Մանուէլի դէպքում, ապա դա նոյնքան դատապարտելի է ՊՊԾ գնդի վրայ յարձակուողների, ինչպէս նաեւ Դօն Պիպոյի, Ծառուկեանի, Ալեքսանեանի, Ռուբէն Հայրապետեանի թիկնապահների ու ցանկացած այլ քաղաքացու պարագայում: Լաւ մարդ-վատ մարդ, ազգի նուիրեալ-ազգի տականք, մարդակեր-մարդասէր, ապստամբ-ոչ ապստամբ, «ինչ անըմ ենք, ազգի հմար ենք անըմ» տիպի արտայայտութիւններն ու դատողութիւնները թէեւ կարող են հետաքրքրական թուալ, բայց չեն կարող ազդել օրէնքի կիրառման վրայ: Եթէ լինի այդ գիտակցութիւնը, ապա մենք իսկապէս կ՛ապրենք «նոր Հայաստանում»: Եթէ լինեն ինչ-ինչ պատճառներով պայմանաւորուած «բացառութիւններ», ապա մենք կը շարունակենք ապրել «հին Հայաստանում», որտեղ կը լինի անպատժելիների «կաստա», որի ամենավառ ներկայացուցիչն է Մանուէլ Գրիգորեանը: Կադրերը եւ տեղեկութիւնները, որոնք տարածել է ԱԱԾն, շոկային են, բայց մի կողմ դնելով արդարացի ցասումը՝ պէտք է հասկանալ, թէ ինչպէս է այդ անձը հասել նման պաթոլոգիկ վիճակի, որովհետեւ այդ տեսակի ագահութիւնը, սրբութիւններ ու բարոյական արգելքներ չունենալը չի կարող լինել «ի ծնէ», դա տասնամեակների ընթացքում «ազգի հմար» ինչ-որ բաներ անողների համար «բացառութիւններ» անելու հետեւանք է: Ինչպէ՞ս եղաւ, որ դեռեւս պատերազմի ժամանակ ՀՀՇն յայտարարեց, որ ունի ռազմականացուած թեւ, կարո՞ղ է արդեօք կուսակցութիւնը ռազմականացուած թեւ ունենալ: Ինչպէ՞ս եղաւ, որ 1994 թուականից սկսած երկրապահներին թոյլատրուեց ամէն ինչ, այդ թւում՝ մարդկանց ծեծել ու ստորացնել, տրուեցին «բիզնեսներ», որոնք նրանք վարում էին ամենեւին ոչ բիզնես-օրէնքներով: Ինչպէ՞ս եղաւ, որ երկրապահները ակտիւ մասնակցութիւն ունեցան 1996 թուականի ընտրութիւնների ընթացքում եւ դրանից յետոյ տեղի ունեցած բռնութիւններին: Ինչպէ՞ս եղաւ, որ Հոկտեմբերի 27ից յետոյ բոլորը սպասում էին ընդդէմ Քոչարեանի երկրապահների յայտարարութեանը, իսկ այնուհետեւ Մանուէլ Գրիգորեանը դարձաւ պաշտպանութեան փոխնախարար: Ինչպէ՞ս պատահեց, որ 2008 թուականին ընդդիմադիր զանգուածը «Ման-վել, Ման-վել» էր վանկարկում՝ յոյս ունենալով, որ ամենազօր գեներալը կ՛անցնի ընդդիմութեան կողմը: Վերջապէս, ինչպէ՞ս պատահեց, որ Էջմիածնում համընդհանուր ատելութեան արժանացած մարդը դարձել է Ազգային ժողովի պատգամաւոր: Այդ աստիճանի անպատժելի կրիմինալը հէնց այնպէս չի ծնւում:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top