Դանդաղ Եւ Կայուն Քայլերով

0711davitishkhanian

0711davitishkhanian

«ԱՍՊԱՐԷԶ»

 

Արցախի ներքին կայունութիւնը գերակայ ռազմավարական խնդիր եղած է միշտ ու այդ ռազմավարական խնդիրի ամէնէն ուժեղ ջատագովներէն է Հայ Յեղափոխական Դաշնակցութիւնը: Ստորեւ կը ներկայացնենք «Թերթ»ի թղթակից Նելլի Նազարեանի՝ ՀՅԴ Արցախի Կեդրոնական կոմիտէի ներկայացուցիչ, Ազգային ժողովի ՀՅԴ խմբակցութեան պատգամաւոր Դաւիթ Իշխանեանի հետ ունեցած զրոյցը, ուր Իշխանեան կը յստակացնէ կուսակցութեան պաշտպանած քաղաքական դիրքորոշումը արցախեան վերջին իրադարձութեանց լոյսին տակ:

«Արցախի ՀՅԴ ԿԿի ներկայացուցիչ, Արցախի ԱԺ ՀՅԴ խմբակցութեան պատգամաւոր Դաւիթ Իշխանեանը չի կարծում, որ ճիշդ ժամանակն է՝ Արցախում սահմանադրական բարեփոխումներ սկսելու, թէեւ, ըստ նրա, որոշակի տրամադրութիւններ այդ ուղղութեամբ նկատելի են, եւ վաղ թէ ուշ գործընթացը սկսուելու է:

«Թերթ»ի հետ զրոյցում Դաւիթ Իշխանեանը նշեց, որ տարբեր շերտերի կողմից տարբեր պահանջներ են դրւում, ընդհուպ մինչեւ նախագահի հրաժարականի պահանջ:

«Իհարկէ, իմ կարծիքով՝ չկայ նման ընդհանուր պահանջ, եւ չեն հասունացել հանրային տրամադրութիւններ՝ նախագահի հրաժարականը պահանջելու: Բայց, բնականաբար, կադրային փոփոխութիւնների եւ բարեփոխումների մասին յայտարարուել է երկրի նախագահի կողմից: Յունիսի սկզբներին ականատես եղանք ուժային ղեկավարների հրաժարականի պահանջին, եւ հրաժարականները եղան, նաեւ նախագահի կողմից ցուցաբերուած նախաձեռնութեամբ փոփոխութիւններ եղան: Այդուհանդերձ, կարծում եմ, որ ինչպէս հրապարակային ներկայացրել ենք, մի քանի հանգրուանով այդ բարեփոխումները տեղի կ՛ունենան, եւ կարծում ենք՝ առաջին հանգրուանն արդէն իսկ յաղթահարել ենք», ասաց նա:

Ըստ Դաւիթ Իշխանեանի՝ ընդհանուր առմամբ առաջին փուլում տեղի են ունեցել կադրային փոփոխութիւններ, որի արդիւնքում նաեւ ակնկալիք կայ համակարգային եւ որոշ գործելաոճի փոփոխութեան: «Դրա համար ժամանակ է պէտք, եւ ժամանակն աշխատում է այդ ուղղութեամբ, բայց ինչ վերաբերում է Սահմանադրութեան փոփոխութեանը, որպէս այդպիսին՝ Սահմանադրութեան փոփոխութեան քննարկումներ չկան», ասաց նա:

Միաժամանակ, Դաւիթ Իշխանեանը յիշեցրեց ՀՅԴ տեսակէտը, որ դեռեւս 2017 թուին ԱՀ Սահմանադրութեան փոփոխութեան քուէարկութեան նախօրեակին ՀՅԴ Արցախի կառոյցը դէմ էր գնացել գործող Սահմանադրութեանը՝ դիտարկելով ժողովրդավարական սկզբունքներին եւ նպատակներին որոշակի արգելակող Սահմանադրութիւն: Նա ընդգծեց, որ ՀՅԴն խորհրդարանական համակարգին էր կողմ:

«Այդուհանդերձ, մենք ականատես եղանք, որ Սահմանադրութիւնը դարձաւ իրականութիւն, եւ մենք ստիպուած էինք համակերպուել դրա հետ՝ բնականաբար, ակնկալելով որոշակի փոփոխութիւնների, նաեւ նախաձեռնութիւնների ցուցաբերում: Կարծում եմ դա տեղի կ՛ունենայ, եւ այդ ամէնը նոյնպէս ժամանակի խնդիր է, բայց այսօր ուղղակիօրէն նախաձեռնել սահմանադրական փոփոխութիւններ եւ ակնկալել, որ մենք անմիջապէս կը յաջողենք, դեռեւս հասունացած չէ այդ քաղաքական պահանջը, բայց ըստ իս՝ այս զարգացումները հէնց տանելու են դրան, եւ տրամաբանական աւարտը լինելու են Սահմանադրական փոփոխութիւնները, եւ, գուցէ, նաեւ մեզ յաջողուի կառավարման համակարգի փոփոխութիւն ընդունել: Այս իսկ առումով մենք կ՛ունենանք, վերջապէս, նոր մօտեցումներ եւ ինչու չէ նաեւ ՀՀի հետ մէկ քաղաքական մակարդակում կը գտնուենք», ասաց նա:

ԱՀ ԱԺ ՀՅԴ պատգամաւորը նշեց, որ, իհարկէ, կոնսուլտացիաներ (խորհրդակցութիւնները-Խմբ.) սկսել ցանկացած պահին կարելի է նախաձեռնել եւ հասունացնել: «Այդ առումով կարծում եմ, որ արգելակող հանգամանքներ չկան, միակ արգելակող հանգամանքը, որպէսզի բարձրաձայնուի, վերջին 1 ու կէս, 2 ամսուայ ընթացում Արցախում ստեղծուած ներքաղաքական իրավիճակն է, որի պայմանները մեզ դեռեւս զերծ են պահում այդ կարգի քայլեր ձեռնարկելուց, քանի որ դա կարող է այլ կերպ ընկալուել եւ հանրութեան մօտ ստեղծել ներքին քաղաքական նոր զարգացումների հիմք, իսկ մենք ընդհանրապէս կողմնակից ենք դանդաղ եւ կայուն քայլերով առաջնորդուելուն», ասաց նա:

 

ՆԵԼԼԻ ՆԱԶԱՐԵԱՆ

«Թերթ»

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top