Պահպանել, Զարգացնել Եւ Տարածել Հայ Մշակոյթը

0712anidance2

ՆՈՒԱՐԴ ՉԱԼԵԱՆ

 

Համազգային Հայ Կրթական եւ Մշակութային Միութեան կանոնագիրի յօդուածներէն մէկը հետեւեալն է. «Համազգայինի նպատակն է՝ պահպանել, զարգացնել ու տարածել հայ մշակոյթը՝ Հայաստանի ու համայն հայութեան գոյատեւման առաքելութեամբ»:

Համազգայինի «Անի» պարախումբը անգամ մը եւս կենդանի օրինակը եղաւ այս առաքելութեան: Հեռաւոր Պրազիլէն հրաւէր ստացաւ «Հայ Երիտասարդաց Ֆետայիներ Ոտնագնդակի Ակումբ» անունով մարզական կազմակերպութենէն:

Կազմակերպութիւն մը, որուն անդամները մեծամասնութեամբ օտարներ են եւ իրենց խումբը երկրի առաջին դասակարգի խումբ է: Այս կազմակերպութիւնը մարզական կեանքի կողքին, ունի նաեւ մշակութային բաժին մը: Ամէն Կիրակի յետմիջօրէին, ձայնասփիւռէն մէկ ժամ յայտագիր ունին փորթուկալերէնով եւ հայերէնով, կը խօսին մշակութային նիւթի մը մասին, որուն կը յաջորդէ հայերէն երգերու եւ երաժշտութեան ձայնասփռումը:

Վերոյիշեալ կազմակերպութեան նախագահը Սարգիս Գարամիքեան կրտսերն է. ան «Ֆէյսպուք»ի միջոցաւ ծանօթացած է «Անի» պարախումբի իրագործումներուն եւ տարիներէ իվեր կ՛աշխատի խումբը Պրազիլ հրաւիրել, վերջապէս յաջողեցաւ, եւ «Անի» պարախումբը, իր ղեկավարներուն՝ Սիւզի Բարսեղեան Դարբինեանի եւ Եղիա Հաշօլեանի առաջնորդութեամբ քսանհինգ հոգիով 11 Յունիսին մեկնեցաւ Պրազիլ, ուր շատ ջերմ ընդունելութեան արժանացաւ:

Պարախումբի առաջին ելոյթը տեղի ունեցաւ Սանթոս քաղաքին մէջ, երկրորդը Սան Փաուլոյի «Կամմարօ» սրահին մէջ եւ երրորդը Մայրիփորա քաղաքին մէջ, որ Սան Փաուլոյի արուարձաններէն մէկն է:

Երեք ելոյթներն ալ բացառիկ յաջողութիւն ունեցան եւ բարձր գնահատանքի արժանացան: Պարախումբին ղեկավարները ոչ միայն մեծ բծախնդրութեամբ պատրաստած էին յայտագիրը, այլ նաեւ անգլերէնով Համազգայինի եւ «Անի» պարախումբի պատմականը, Լոռեցի Սագոյի եւ Սարդարապատի բացատրողականը պատրաստած էին: Այս պատմականը եւ բացատրողականը փորթուկալերէնի թարգմանեցին եւ երիտասարդ մը հայկական տարազ հագած՝ յայտագիրին ընթացքին կարդաց պատճէնը: Այսպէս, ներկաները ոչ միայն ըմբոշխնեցին գերազանց մակարդակի հայկական պարերը, այլ նաեւ ծանօթացան Համազգայինին, հայ գիւղին եւ մանաւանդ Սարդարապատի հերոսամարտին, տեսան հայ ժողովուրդի աննկարագրելի տառապանքը, եւ, միւս կողմէ, հայ ժողովուրդի հերոսութիւնը եւ գոյատեւելու աննկուն կամքը:

Մայրիփորա քաղաքի սրահը նոր վերանորոգուած էր: Քաղաքապետը հեռատեսիլի ծանուցումներէ տեսած եւ լսած էր «Անի» պարախումբին մասին եւ դիմած էր Սարգիս Գարամիքեանին, որպէսզի սրահին պաշտօնական բացումը տեղի ունենայ «Անի» պարախումբի համերգով:

Այսպէս, Մայրիփորա քաղաքի գլխաւոր սրահի վերաբացումը տեղի ունեցաւ «Անի» պարախումբի ելոյթով:

Համերգին բոլոր ներկաները հրաւիրեալներ էին՝ քաղաքական դէմքեր, արուեստագէտներ եւ մտաւորականներ, իկչպէս նաեւ պալէյի դպրոցներէ աշակերտութիւն: Սրահին բոլոր նստարանները գրաւուած էին, առաւել պատերուն կողքին աթոռներ շարուած էին, իսկ պալէյի դպրոցներու աշակերտութիւնը նստած էր գետինը՝ հրաւիրեալներու առաջին կարգին եւ բեմին միջեւ: Հոս եւս մէկուկէս ժամ մեծամասնութեամբ օտար ժողովուրդ մեծ հետաքրքրութեամբ հետեւեցաւ համերգին եւ ծանօթացաւ հայ ժողովուրդի մշակոյթին եւ էջ մըն ալ սորվեցաւ հայոց պատմութենէն:

Համերգէն ետք, խուռներամ ժողովուրդը եւ պարարուեստի ուսանողները շրջապատեցին Համազգայինի արուեստագէտները։ Ներկաները կ՛ուզէին նկարուիլ Համազգայինի արուեստագէտներուն հետ, անոնց  ստորագրութիւնը առնել, խօսիլ այնպէս, ինչպէս երիտասարդները միջազգային համբաւ ունեցող աստղերու հետ կը վարուին:

Այսպէս, երեք համերգներով Պրազիլի մէջ հանդէս եկաւ «Անի» պարախումբը եւ կախարդեց ներկաները իր բացառիկ ելոյթներով, սքանչելի տարազներով՝ պատրաստուած Ճէյն Հաշօլեանի կողմէ:

Խումբը 20 Յունիսին վերադարձաւ Լոս Անճելըս, բացառիկ տպաւորութիւն ձգելով տեղացի ժողովուրդին վրայ. անիկա ոչ միայն հայկական պար հրամցուց ներկաներուն, այլ նաեւ ծանօթացուց հայ մշակոյթը, միշտ հաւատարիմ մնալով իր համբաւին:

Պարախումբին ղեկավարները Սիւզի Բարսեղեան Դարբինեան եւ Եղիա Հաշօլեան տեսակցութիւններ ունեցան տեղացի թղթակիցներու հետ: Խանդավարութիւնը այնքան մեծ էր, որ խոստումներ եղան դարձեալ Պրազիլ այցելելու: Հակառակ անոր, որ «Անի» պարախումբը բազմաթիւ անգամներ զանազան երկիրներու եւ նահանգներու մէջ ելոյթներ ունեցած է, սակայն այս այցելութիւնը նոր փորձառութիւն մըն էր թէ՛ ղեկավարներուն եւ թէ պարողներուն համար:

Հոգեկան մեծ գոհունակութեամբ վերադարձաւ պարախումբը. անիկա միշտ պատրաստ է ընդունելու զանազան գաղութներէ հրաւէրներ:

Ուժ, կորով, եւ յաջողութեան լաւագոյն մաղթանքներ: Վարձքը կատար բոլորին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top