Փոմփէօ Կը Շարունակէ Իր Հակաիրանեան Քարոզչութիւնը

0712pompeo

 

0712pompeoՈՒԱՇԻՆԿԹԸՆ, «Ռոյթըրզ».- Միացեալ Նահանգներու արտաքին գործոց նախարար Մայք Փոմփէօ յայտնեց. «Ամերիկեան քաղաքականութեան նպատակը շրջանի երկիրներուն դէմ իրանեան սպառնալիքները չէզոքացնելն է: Ուաշինկթըն յանձնառու է Ծոցի մէջ նաւարկման ուղիներու պահպանման, որպէսզի քարիւղ հոսի դէպի աշխարհի բոլոր կողմերը»:

Անտեսելով այն իրողութիւնը, որ ամերիկեան աջակցութիւնը վայելող Սէուտական Արաբիոյ եւ Ծոցի արաբական այլ երկիրներու ուժերը նախայարձակ կողմն են եւ կը շարունակեն ռմբակոծել Եմէնը՝ ան աւեցուց. «Եմէնէն արձակուող հրթիռները կը սպառնան Ծոցի շրջանի ապահովութեան, եւ Ուաշինկթընի քաղաքականութիւնը կը նպատակադրէ չէզոքացնել այդ վտանգը: Մենք շրջանին մէջ մեր գործընկերներուն հետ աշխատանք կը տանինք դէմ դնելու Իրանի չարամիտ գործունէութեան՝ ըլլայ այդ Եմէնի մէջ «Անսարուլլա»ի թէ Սուրիոյ մէջ «Հըզպալլա»ի աջակցութիւնը»:

Ամերիկեան դիւանագիտութեան պետը պատկերասփռուած հարցազրոյցի մը ընթացքին աւելցուց. «Գլխաւոր հարցը, որուն վրայ կեդրոնացած ենք, Իրանին եկամուտ ապահովելուն արգելք հանդիսանալն է: Պատժամիջոցները իրանցի ժողովուրդը թիրախ չեն դարձներ, այլ նպատակ ունին իրանեան վարչակարգը համոզել, որ իր վարմունքը վա՛տ է: Թեհրանի այդ կեցուածքը շատ սուղ պիտի արժէ իրանեան վարչակարգին. Իրանն ու անոր զինեալ խմբաւորումները պէտք է հեռանան Սուրիայէն, որովհետեւ անոնց ներկայութեան համար արդարացուցիչ որեւէ պատճառ չկայ»:

«Այսօր հարաւային Սուրիոյ մէջ շատ դժուար կացութիւն կը տիրէ եւ պէտք է հասնիլ քաղաքական լուծումի մը, որ նկատի առնէ սուրիացիներու բազմազանութիւնը: Ուաշինկթընի նպատակը քաղաքական լուծումի հասնելու պայմաններուն պատրաստումն է», ըսաւ ան:

Միացեալ Նահանգներու արտաքին գործոց նախարարը նաեւ յայտարարեց. «Իրանեան քարիւղ ստանալու արգելքը պիտի սկսի գործադրուելու Նոյեմբեր 4ին, եւ անկէ ետք իրանեան քարիւղ ստանալը ամերիկեան պատժամիջոցներու խախտում պիտի նկատուի»:

Փոմփէօ նաեւ նշեց, որ նախագահ Տանըլտ Թրամփի եւ Ռուսիոյ նախագահ Վլատիմիր Փութինի միջեւ «բանակցութիւններու գլխաւոր նիւթը պիտի ըլլայ Սուրիոյ եւ Ուքրանիոյ իրավիճակը»: Ան աւելցուց, թէ իր երկիրը կ՛ուզէ, որ «ռուսերը սուրիացիներուն եւ իրանցիներուն ստիպեն պահպանե՛լ քաղաքական համաձայնութիւնները»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top