Յիսուսի Այլակերպութեան Տօնը Փասատինայի Ս. Սարգիս Եկեղեցւոյ Մէջ

0000Transfiguration at St. Sarkis2

 

0000Transfiguration at St. Sarkis2

ՓԱՍԱՏԻՆԱ.- Կիրակի, 8 Յուլիսին, Յիսուս Քրիստոսի Այլակերպութեան՝ Վարդավառի տօնին առիթով, Արեւմտեան թեմի առաջնորդ Մուշեղ արք. Մարտիրոսեան Ս. պատարագ մատուցանեց եւ իր պատգամը ուղղեց Փասատինայի Ս. Սարգիս եկեղեցւոյ մէջ: Առաջնորդական փոխանորդ Թորգոմ եպս. Տօնոյեան պատարագեց եւ քարոզեց Քրեսենթա Հովիտի Հայց. առաքելական եկեղեցւոյ մէջ։

Ս. Սարգիս եկեղեցւոյ պատարագին, Ս. սեղանին սպասարկեց եկեղեցւոյ հոգեւոր հովիւը՝ Պօղոս քհնյ. Պալթայեան։ Արարողութեան ներկայ էին Ազգային վարչութեան անդամներէն Աւօ Քէշիշեան, եկեղեցւոյ գլխաւոր բարերար տէր եւ տիկին Սարգիս եւ Սիւզան Կիտցինեաններ, եկեղեցւոյ ժողովականութեան անդամներ եւ հաւատացեալներու բազմութիւն մը։

Իր պատգամի սկզբնաւորութեան, առաջնորդ սրբազանը փառք տուաւ Աստուծոյ, որ «անգամ մը եւս ի մի խմբուած կը տօնենք մեր տիրոջ՝ Յիսուս Քրիստոսի Այլակերպութեան տօնը, որուն խորհուրդն ու պատգամը լաւագոյն առիթն են իմանալի աչքերով տեսնելու ու հոգեւորապէս զգալու Տիրոջ պայծառակերպութիւնը, եւ ըստ այնմ՝ մեր կեանքերը բարեփոխելու»։ Սրբազանը յուզումով նշեց, որ 42 տարի առաջ, նոյն այս տօնին էր, երբ իբրեւ նորընծայ կուսակրօն քահանայ իր անդրանիկ պատարագը մատուցանեց։

0000Transfiguration at St. Sarkis1

Առաջնորդը իր պատգամը սկսաւ շարականի բառերուն հետեւողութեամբ աղօթելով. «Ո՛վ Տէր, կ՛աղաչենք, որ մեզ ալ բարձրացնես զգալի եւ տեսանելի Թաբօր լեռնէն աւելի վեր, հասնելու համար երկնքի բարձրութիւնը ունեցող Քու իմանալի եւ լուսաւոր խորաններուդ»։ Ան անդրադարձաւ Թաբօր լերան վրայ տեղի ունեցած՝ Յիսուսի հրաշափառ այլակերպութեան դրուագին, եւ նկատել տուաւ, թէ ինչպէս որ այդ պահուն Յիսուսի մարդկային բնութեան կողքին՝ աստուածային բնութիւնն ալ յայտնուեցաւ, այնպէս ալ մենք պարտինք զգալ Աստուծոյ ներկայութիւնը մեր կեանքին մէջ եւ ամէնուր։ «Այս խորհուրդը մենք ազգովին իւրացուցած ենք մեր պատմութեան ընթացքին, երբ Ս. Գրիգոր Լուսաւորիչ աստուածգիտութեան լոյսին հրաւիրեց հայ ժողովուրդը, եւ ազգային աւանդութիւնները պատշաճեցուց քրիստոնէականին հետ», շարունակեց առաջնորդը՝ նշելով, որ օր մը առաջ Ուխտի տապանակին տօնն էր, իսկ Այլակերպութեան տօնը նաեւ Ջրհեղեղի խորհուրդը յիշելու տօն է, եւ այդ իսկ պատճառով, հայկական աւանդութեան համաձայն՝ այդ օր իրարու վրայ ջուր կը սրսկենք եւ աղաւնի կը թռցնենք՝ իբրեւ հոգեկան մաքրութեան, խաղաղութեան, վերանորոգութեան ու պայծառօրէն լուսաւորուելու խորհրդանիշ։

Առաջնորդը Այլակերպութեան խորհուրդը երեք կէտերու մէջ ամփոփեց. առաջին՝ տեսնել Քրիստոսի աստուածային ու մարդկային բնութիւնը, երկրորդ՝ Ս. Հոգիի շնորհքներն ու օրհնութիւնները զգենունք՝ Աստուծոյ հետ հաղորդակցութեամբ, եւ երրորդ՝ ընդունինք, որ Յիսուս տէրն է կեանքին ու մահուան, ուստի՝ «Այլակերպութեան տօնը հրաւէր է իւրաքանչիւրիս՝ խնդրելու Աստուծմէ, որ մեզ ալ բարձրացնէ երկնքի բարձրութիւնը ունեցող իր իմանալի եւ լուսաւոր խորանները, ուր միայն լոյս, յոյս, սէր եւ իր ներկայութիւնը պիտի գտնենք», եզրափակեց առաջնորդը:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top