Նախագահ Էրտողանի Թագադրութիւնը՝ Թագաւորական Կարգով

0713erdo

0713erdo

 

ՊՈԼԻՍ, «Ակօս».- 24 Յունիսի նախագահական եւ խորհրդարանական ընտրութիւնները սովորական եւ հերթական ընտրութիւններէ շատ աւելի տարբեր իմաստ ունէին, քանի որ այդ ընտրութեամբ կարեւոր շեղում մը կ՛արձանագրուի Թուրքիոյ հանրապետութեան հիմնադրումէն ցայսօր որդեգրուած վարչաձեւին մէջ:

1923ին, երբ Թուրքիա ամբողջ աշխարհին յայտարարեց հանրապետութեան վերածուելու որոշումը, խորհրդարանը ունեցաւ ժողովուրդի ձայներուն ամպիոնը ըլլալու յաւակնութիւնը: Իսկ ներկայ դրութեամբ, ժողովուրդը կարծես իր ձայները փոխանցած ըլլայ մենատէրի մը, որ մէկ կողմէ պիտի վայելէ հանրապետութեան նախագահի կոչում եւ իրաւասութիւններ, բայց միւս կողմէ պիտի ցուցաբերէ թագաւորութեան շրջանի յատուկ զանազան երեւոյթներ: Արդարեւ, նախագահի երդման արարողութիւնը արդարացուց այս տպաւորութիւնը, քանի որ արարողակարգը անցաւ ամբողջովին թագաւորութեան շրջանին համապատասխանող ձեւակերպութիւններով: Էրտողան դիմաւորուեցաւ թագաւորական փողերախումբով, շնորհեց նոր մետաղեայ դրամներ բոլոր մասնակիցներուն եւ այդ տրամադրութիւններուն մէջ ստացաւ շնորհաւորութիւնները:

Ստեղծուած մթնոլորտին լրիւ համապատասխան եղանակով ալ, երկրի փոքրամասնութիւնները փութացին իրենց շնորհաւորանքները յայտնելու նոր գահակալին: Այստեղ ուշագրաւ էր Հայ առաքելական եկեղեցւոյ անունով Սահակ արք. Մաշալեանի եւ Հայ կաթողիկէ համայնքին վիճակաւոր արհիապատիւ հայր Լեւոն Զէքիեանի ուղերձները: Երկու առաջնորդներն ալ յատուկ կերպով կ՛ընդգծէին նախագահին արքայական իշխանութիւնը եւ օրինակներ կը թուէին անցեալի բարեխնամ թագաւորներու վարքերէն: Այս դիտելով՝ կարելի է ըսել, թէ եկեղեցականները արդէն իսկ նկատած են Էրտողանի հակումները եւ կ՛ուզեն այդ հակումները շեշտելով՝ գոհացում տալ իր ակնկալութիւններուն: Պէտք է նշել նաեւ, որ Սահակ եպս. Մաշալեան իր շնորհաւորական նամակին մէջ կը զգուշացնէ նաեւ նորընտիր նախագահը՝ երկրի բոլոր ժողովուրդներուն հանդէպ արդար եւ օրինաւոր ըլլալու խնդիրին մէջ: Ան բաց սիրտով կը պարզէ, թէ հանրապետութեան շրջանին կառավարութիւնները դիտումնաւոր կերպով խոչընդոտած են փոքրամասնութիւններու զարգացումին ծառայող բոլոր գործերը, ձեւով մը ուզած են անոնց թիւը նուազեցնել երկրին մէջ եւ նոյնիսկ հասցնել վերջնակէտի: Այս դիտել տալով՝ Մաշալեան սրբազան մտահոգութիւն կը յայտնէ երկրի երիտասարդներուն՝ երկրէն հեռանալու ցանկութեան գծով, եւ կը պահանջէ, որ նորընտիր նախագահը սատար հանդիսանայ երկրի ժողովուրդներուն միջեւ հաւասարութեան հաստատման:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top