Ամերիկա Կը Քննէ Հայաստանին Տրամադրուող Աջակցութեան Չափի Փոփոխութեան Կարելիութիւնը. Դեսպան Միլզ

0719Mils color

0719Mils color

 

ԵՐԵՒԱՆ.- «Ազատութիւն» ձայնասփիւռի կայանը Յուլիս 18ին հաղորդեց, թէ Հայաստանի մօտ Միացեալ Նահանգներու դեսպան Ռիչըրտ Միլզ յայտնած է, թէ ներկայ հանգրուանին Հայաստանի մէջ ամերիկեան նոր եւ մեծածաւալ ներդրումներու մասին խօսելու համար տակաւին շատ կանուխ է։

Ան աւելցուցած է, որ իրենք ամերիկեան գործարար շրջանակներէ բազմաթիւ հարցումներ կը ստանան՝ Հայաստանի մէջ տնտեսական կարելիութիւններուն վերաբերեալ, սակայն ներդրումներով հետաքրքրուողները տակաւին կը հետեւին, տեսնելու համար, թէ ի՛նչ ընթացք պիտի ստանայ զեղծարարութեանց դէմ Հայաստանի նոր իշխանութիւններուն շղթայազերծած պայքարը, եւ թէ պայքարը պիտի իրականացուի՞ արդեօք օրէնքի եւ իրաւունքի պահանջներուն համապատասխան:

Դեսպանը ընդգծած է, որ հաւանական ներդրողներուն համար նաեւ շատ կարեւոր է այն, որ վարչապետ Նիկոլ Փաշինեանի գլխաւորած կառավարութիւնը ինչպէ՛ս պիտի լուծէ տնտեսական ոլորտին մէջ առկայ խնդրայարոյց հարցերը, իբրեւ օրինակ յիշելով Ջերմուկի յարակից Ամուլսարի մէջ ամերիկաբրիտանական «Լիդիան» ընկերութեան կողմէ ոսկիի հանքավայրին շահագործման խնդիրը։

Դեսպան Միլզ կը նշէ, թէ նախապէս, ներդրումներ ներգրաւելու մէջ Հայաստանի դիմագրաւած ամենամեծ խոչընդոտները զեղծարարութիւնն ու գործարարներու համար անհաւասար պայմաններու ապահովումն էր՝ աւելցնելով սակայն, որ այժմ վստահութիւն կը ներշնչեն Հայաստանի նոր կառավարութեան գործողութիւնն ու յանձնառութիւնը՝ օրէնքի գերակայութեան պահպանման ու Հայաստանի մէջ ներդրումային լաւ միջավայր ստեղծելու առումով։

«Ազատութիւն»ը հետաքրքրուած է նաեւ Միացեալ Նահանգներու կառավարութեան կողմէ Հայաստանին յաւելեալ աջակցութիւն տրամադրելու հարցով, որուն ի պատասխան՝ դեսպանը ըսած է. «Միացեալ Նահանգներու կառավարութիւնը կը քննէ, թէ ինչպէ՛ս կրնայ աջակցիլ Հայաստանի նոր կառավարութեան: Կը քննենք հնարաւոր ուղիները, ներառեալ աջակցութեան չափերու փոփոխութեան հնարաւորութիւնը՝ Միացեալ Նահանգներու միջազգային զարգացման գործակալութեան եւ ամերիկեան պետական այլ կառոյցներու միջոցով»։

Նշենք, որ Հայաստանի անկախութենէն ի վեր, Միացեալ Նահանգներու միջազգային զարգացման գործակալութեան միջոցով Հայաստանին տրամադրուած է մօտաւորապէս մէկ միլիառ տոլար աջակցութիւն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top