Միացեալ Նահանգներու Եւ Թուրքիոյ Միջեւ՝ Բարձրաստիճան Բանակցութիւններ

0810us-turkey

0810us-turkey

ՈՒԱՇԻՆԿԹԸՆ, «Ժամանակ».- Թուրքիոյ եւ Ամերիկայի Միացեալ Նահանգներու պատուիրակութիւններուն միջեւ (Չորեքշաբթի, 8 Օգոստոսին) Ուաշինկթընի մէջ տեղի ունեցան բանակցութիւններ: Թուրք-ամերիկեան յարաբերութիւններուն մէջ գոյութիւն ունեցող լարուածութիւնները յաղթահարելու եւ բնականոնացում ապահովելու առաջադրութեամբ՝ տեղի կ՛ունենան այս բանակցութիւնները: Հանրային կարծիքի վառ հետաքրքրութեան մթնոլորտին մէջ, կողմերու բարձրաստիճան պատուիրակութիւնները սեղանի վրայ դրին առկայ հարցերը:

Թրքական պատուիրակութիւնը գլխաւորեց արտաքին գործոց փոխնախարար Սետաթ Էօնալ: Ամերիկեան պատուիրակութեան գլուխը կը գտնուէր Միացեալ Նահանգներու արտաքին գործոց փոխնախարար Ճան Սուլիվըն: Թրքական պատուիրակութեան մաս կը կազմէին երեք նախարարութիւններէ երեքական ներկայացուցիչներ, որոնց միացաւ նաեւ Ուաշինկթնի մօտ Թուրքիոյ դեսպան Սերտար Քըլըչ:

Թրքական պատուիրակութիւնը առաջին հերթին այցելեց Միացեալ Նահանգներու արտաքին գործոց նախարարութիւն, ուր ծաւալած քննարկումները տեւեցին շուրջ 50 վայրկեան:

Պատուիրակութիւնը աւելի ուշ ուղղուեցաւ դէպի Միացեալ Նահանգներու գանձային (ելեւմուտքի) նախարարութիւն, ուր շուրջ մէկուկէս ժամուան բանակցութիւններ ծաւալեցան:

Հանդիպումներէն ետք թրքական պատուիրակութիւնը որեւէ յայտարարութիւն չկատարեց: Միացեալ Նահանգներու արտաքին գործոց նախարարութիւնը այս կապակցութեամբ հանդէս եկաւ կարճ յայտարարութեամբ մը, որով տեղեկացուեցաւ, որ թուրք իրաւասուներու հետ յաւելեալ հանդիպումներ կատարուած են եւ քննարկումները կը շարունակուին: Օրակարգի վրայ եկած են երկկողմ յարաբերութիւններուն վերաբերեալ բազմաթիւ հարցեր:

Ըստ տեղական մամուլին փոխանցած հաղորդումներուն՝ թրքական եւ ամերիկեան պատուիրակութիւնները բանակցութիւններ կը վարեն՝ իրաւական տեսակէտէ ոչ-պարտադիր շրջանակային փաստաթուղթի մը վրայ: Եթէ կողմերուն միջեւ գոյանայ սկզբնական համաձայնութիւն մը, ապա վերջին խօսքը պիտի վիճակուի երկու երկիրներու ղեկավարներուն:

Միւս կողմէ, կը հաղորդուի, որ ամերիկեան զանգուածային լրատուութեան միջոցները եւս արձագանգ հանդիսանան այս բանակցութիւններուն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top