Ծերակուտական Էնթընի Փորթանթինօ Կը Պատուէ ՀՄԸՄը

0811homenetmen1

0811homenetmen1

ՍԱՔՐԱՄԵՆԹՕ.- Նահանգային ծերակուտական Էնթընի Փորթանթինօ Հինգշաբթի, 9 Յունիս 2018ին, ՀՄԸՄի 100ամեակին առիթով Քալիֆորնիոյ նահանգային ծերակոյտին ներկայացուց ՀՄԸՄը՝ փոխանցելով հետեւեալ պատգամը.

«Հայ Մարմնակրթական Ընդհանուր Միութիւնը՝ ՀՄԸՄ, հիմնուած է 1918ին ու մինչեւ օրս դաստիարակած է աւելի քան 800,000 պատանիներ՝ աշխարհի 5 ցամաքամասերուն վրայ:

2018 թուականը յատկանշական է այս կազմակերպութեան համար, որովհետեւ կը զուգադիպի իր հիմնադրութեան 100ամեակին:

ՀՄԸՄի Արեւմտեան Միացեալ Նահանգներու շրջանի առաջին մասնաճիւղը հիմնուեցաւ 1968ին, Լոս Անճելըսի մէջ: Այսօր, ՀՄԸՄը դարձած է Միացեալ Նահանգներու մեծագոյն հայկական մարզական եւ սկաուտական կազմակերպութիւնը, որ կը համախմբէ ամերիկահայ երիտասարդութիւնը՝ ներշնչելով մարմնակրթական եւ ընկերային առողջ դաստիարակութիւն ու կ՛ամրապնդէ նոր սերունդին կապերը հայկական ժառանգութեան եւ մշակոյթին հետ:

ՀՄԸՄի սկաուտները ամէն տարի Քալիֆորնիոյ նահանգային խորհրդարանին մէջ, Հայոց Ցեղասպանութեան ոգեկոչման օրը, դրօշակի արարողութիւն կը կատարեն: Այս կազմակերպութիւնը անցնող 100ամեակին մի՛շտ կառչած մնաց «Բարձրացիր, Բարձրացուր» նշանաբանին՝ պատրաստելով տիպար քաղաքացիներ եւ կերտելով անոնց անզուգական նկարագիրը»:

0811homenetmen

Ծերակուտականը նաեւ դրուատեց «Հրաշք» նախաձեռնութիւնը. «Իբրեւ համընդգրկուն եւ համագաղութային երիտասարդական կազմակերպութիւն՝ ՀՄԸՄի Արեւմտեան Ամերիկայի Շրջանային վարչութեան նախաձեռնութեամբ հիմնուեցաւ ՀՄԸՄի «Հրաշք» միաւորը, որ կը համախմբէ յատուկ կարիքներ ունեցող մարզիկներ, որպէսզի իրենց մասնակցութիւնը բերեն տարբեր մարզախաղերու: Անձնապէս ներկայ գտնուեցայ իրենց փակման հանդիսութեան եւ ականատես դարձայ տողանցող 30 ծնողներուն եւ կարիքաւոր երեխաներուն, որոնք ցնծութեան եւ մանաւանդ յուզումի ալիք ստեղծեցին ներկաներու հոգիներուն մէջ»:

Ծերակուտական Փորթանթինօ իր խօսքի աւարտին ողջունեց ներկայ ՀՄԸՄական հիւրերը՝ ՀՄԸՄի Արեւմտեան Ամերիկայի Շրջանային վարչութեան ատենապետ Մանուէլ Մարսէլեանը եւ Շրջանային վարչութեան անդամ Արմանտ Գիլիճեանը, Ուոլնաթ Քրիքի «Կարս» մասնաճիւղի վարչութենէն՝ Արամազդ Մասիսը եւ Հիւսիսային Քալիֆորնիոյ մասնաճիւղերէն ներկայ գտնուող սկաուտները, ապա անոնց նուիրեց նահանգային Ծերակոյտի հռչակագիրը, որ կը կրէ ծերակուտական Էնթընի Փորթանթինոյի, Քեւըն տէ Լէոնի եւ Սքաթ Ուիլքի ստորագրութիւնները:

Ամերիկահայութեան հետ մօտիկ յարաբերութիւններ ունեցող ծերակուտական Փորթանթինոյի ներկայացումը ՀՄԸՄի մասին ջերմ ծափողջոյններով ընդունուեցաւ ներկաներուն կողմէ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top