Առաջնորդը Ընդունեց Կլենտէյլի «Էտվենթիսթ» Հիւանդանոցի Նոր Նախագահին Այցելութիւնը

0811adventist

0811adventist

ԼԱ ՔՐԱՍԵՆԹԱ.- Առաջնորդ Մուշեղ արք. Մարտիրոսեան Երեքշաբթի, 7 Օգոստոսի առաւօտուն, Ազգային առաջնորդարանի իր գրասենեակին մէջ ընդունեց այցելութիւնը Կլենտէյլի «Էտվենթիսթ» հիւանդանոցի նոր նշանակուած նախագահին՝ Ալիս Իսայիի, որուն կ՛ընկերանար հիւանդանոցի փոխնախագահ Ռամելա Մարգարեան։

Փոխադարձ ծանօթացումէ ետք, հանդիպումը վերածուեցաւ մտերմիկ զրոյցի։ Առաջնորդ սրբազանը ողջունեց հիւրերը եւ շնորհաւորեց Իսային՝ իր նոր պաշտօնին առիթով։ Հիւր նախագահը եւ օգնականը շնորհակալութիւն յայտնեցին ընդունելութեան համար, ապա հակիրճ կերպով անդրադարձան իրենց նոր ծրագիրներուն եւ գաղութին հետ գործակցութեան հեռանկարներուն։

Առաջնորդ սրբազանը անդրադարձաւ այն կապերուն ու գործակցութեան, որ տարիներու ընթացքին յարաճուն կերպով զարգացած են հիւանդանոցին ու Ազգային առաջնորդարանին միջեւ։ Ան յիշեց, որ ինք անձամբ կամ հոգեւոր հովիւներու միջոցով յաճախ ներկայութիւն եղած է հիւանդանոցէն ներս, մասնաւորաբար՝ տօնական օրերու։ Հիւանդանոցի յարկին տակ կատարուած են խաղողօրհնէքի եւ այլ աւանդական արարողութիւններ, ինչպէս նաեւ այցելութիւններ տրուած են հայ հիւանդներու, հոգեւոր ծառայութիւններ մատուցելու նպատակով։ Առաջնորդ սրբազանը գնահատանքով արտայայտուեցաւ հիւանդանոցի բժշկական ու վարչական անձնակազմին մասին, ուր կարեւոր տեղ կը գրաւեն մեր համայնքի զաւակները, որոնք միշտ բարի տրամադրութեամբ հիւրընկալած են զինք ու մեր հոգեւոր հայրերը։

Հիւր նախագահը պատրաստակամութիւն յայտնեց նոր տարածք տալու Ազգ. առաջնորդարանին ու հիւանդանոցին միջեւ գործակցութեան՝ նշելով, որ բոլորիս նպատակն է տարբեր միջոցներով ծառայել ժողովուրդին։

Աւարտին, առաջնորդը օրհնեց նոր նշանակուած նախագահն ու փոխնախագահը եւ յաջողութիւն մաղթեց բոլոր գործակիցներու առաքելութեան, ապա իր կարգին պատրաստակամութիւն յայտնեց ընդառաջելու յաւելեալ գործակցութեան առաջարկին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top