Ս. ԱՍՏՈՒԱԾԱԾՆԱՅ ՎԵՐԱՓՈԽՄԱՆ ՏՕՆԻՆ ԱՌԻԹՈՎ՝ Խաղողօրհնէքի Արարողութիւն Կլենտէյլի «Էտվենթիսթ» Հիւանդանոցին Մէջ

0811adventist1

0811adventist1

Ս. Աստուածածնայ Վերափոխման տօնին առիթով եւ համաձայն տարիներու բարի աւանդութեան, Չորեքշաբթի, 8 Օգոստոսի առաւօտուն, տօնին յատուկ արարողութիւն եւ խաղողօրհնէք տեղի ունեցան Կլենտէյլի «Էտվենթիսթ» հիւանդանոցի մատրան մէջ։ Առաջնորդ Մուշեղ արք. Մարտիրոսեանի տնօրինումով, արարողութիւնը կատարեցին Վազգէն Ա. քհնյ. Աթմաճեան, Կոմիտաս Ա. քհնյ. Թորոսեան, Արտակ քհնյ. Տէմիրճեան եւ Մովսէս քհնյ. Շաննաքեան։

Հիւանդանոցի նոր նշանակեալ նախագահը՝ Ալիս Իսայի, ողջունեց հիւր քահանայ հայրերը, շնորհակալութիւն յայտնեց, որ մեր հոգեւորականները ամէն տարի այս արարողութիւնը կը կատարեն հիւանդանոցին մէջ եւ գոհունակութիւն յայտնեց, որ այս տարի ինք առիթը ունեցաւ առաջին անգամ ըլլալով մասնակից դառնալու այս արարողութեան։ Ան նաեւ նշեց, որ այս աղօթքները հոգեկան մխիթարութիւն կը պարգեւեն հիւանդանոցի խմանքը վայելողներուն ու անոնց հոգածութեան նուիրուած ծառայողներուն։

Հիւանդանոցի հոգեւոր ծառայութեան պատասխանատու չեփլըն Ալիս Զուլի կատարեց բացման աղօթքը եւ նշեց, որ այս արարողութիւնը նուիրուած է Աստուածամօր, «որուն կը դիմենք աղօթքով եւ որ ծնունդ տուաւ Յիսուս Քրիստոսի, առաջին պտուղին, իսկ այսօր, Զայն յիշելով՝ մենք կը կատարենք երկրի պտուղին օրհնութիւնը»։

Վազգէն քահանան ողջունեց ներկաները եւ հրաւիրեց Մովսէս քահանան՝ արտասանելու իր քարոզը։ Ան իր կարգին ողջունեց ներկաները, փոխանցեց առաջնորդ հօր օրհնութիւնները եւ բարի մաղթանքները, ապա ըսաւ, որ աղօթքի այս պահուն, հրաւիրուած ենք վերանորոգելու մեր առաքելութեան ուխտը՝ իբրեւ հոգիներու եւ մարմիններու դարման բերող ծառայողներ, իբրեւ Աստուծոյ հաւատարիմ զաւակներ։ Ան կանգ առաւ սիրոյ կարեւորութեան վրայ՝ ընդգծելով, որ սէրը բոլորիս համար պէտք է ըլլայ առաջնահերթութիւն, պէտք է հասկնա՛նք սիրոյ կարեւորութիւնը եւ կիրարկենք զայն։

Ապա տեղի ունեցաւ խաղողի օրհնութեան արարողութիւնը, որմէ ետք, աղօթքի պահը վերջ գտաւ հաստատութեան հոգեւոր ծառայողներէն՝ չեփլըն Էլիաս Մոլինայի աղօթքով։ Այնուհետեւ, հոգեւոր հայրերը այցելեցին հիւանդանոցի սենեակները եւ օրհնուած խաղողը բաժնեցին հիւանդներուն։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top