Ներկայացուեցաւ Հայ Եկեղեցւոյ Հնագոյն Թեմի՝ Ատրպատականի Հայոց Պատմութիւնը

0000Chif Fresno2
0000Chif Fresno6

Առաջնորդ սրբազանը

ՖՐԵԶՆՕ.- Երեքշաբթի, 31 Յուլիս 2018ի երեկոյեան ժամը 7ին, կազմակերպութեամբ Ֆրեզնոյի «Ասպարէզ» ակումբի Մշակութային յանձնախումբին եւ Ֆրեզնոյի Հայկական թանգարանին, իւրայատուկ բանախօսութիւն եւ ձեռնարկ մը տեղի ունեցաւ «Կարօ եւ Ալիս Կիւրեղեան» Հայ մշակութային կեդրոնի սրահին մէջ, ներկայութեամբ մշակութասէր ֆրեզնոյահայերու:

Ձեռնարկը նպատակ ունէր Ատրպատականի Հայոց թեմի առաջնորդ Գրիգոր եպս. Չիֆթճեանի հեղինակած եւ լոյս ընծայած՝ «Ուղեւորութիւն Ատրպատականի Հայոց Թեմում՝ Հայկական Յուշարձանների Հետքերով» գիրքին ներկայացումը կատարել, միաժամանակ անդրադառնալով Հայ եկեղեցւոյ հնագոյն թեմի անցեալի եւ ներկայի պատմութեան:

Ներկաներու շարքին էին Ֆրեզնոյի հոգեւոր հովիւ Տաճատ վրդ. Աշըգեան, Ֆրեզնոյի մօտ Հայաստանի Հանրապետութեան պատուոյ հիւպատոս Պերճ Աբգարեան, Ֆրեզնոյի համալսարանի հայագիտութեան ամպիոնի վարիչ Պարլօ Տէր Մկրտիչեան, Ֆրեզնոյի Հայկական թանգարանի տնօրէն Վարուժան Տէր Սիմոնեան, Ս. Երրորդութիւն Մայր եկեղեցւոյ երեսփոխանական եւ հոգաբարձական կազմերը, աշխարհահռչակ սոփրանօ Իզապէլ Պայրագտարեան եւ գաղութի զանազան մարմիններու ներկայացուցիչ անդամներ:

0000Chif Fresno5

Վարուժան Տէր Սիմոնեան

Այս առիթով, Թաւրիզէն ժամաներ էր Ատրպատականի Հայոց թեմի առաջնորդը՝ իբրեւ գլխաւոր բանախօս սոյն ձեռնարկին: Բացման խօսքը կատարեց կազմակերպիչ յանձնախումբի անդամ Վահագն Արսլանեան: Ներկայ բազմութիւնը իրազեկելով առիթին մասին, ան վեր առաւ Ատրպատականի Հայոց թեմի կարեւոր տարածաշրջան ըլլալու հանգամանքը մեր պատմութեան նշանակալից անցքերու իբրեւ վայր, ապա հպանցիկ կերպով անդրադարձաւ հրատարակուած գիրքի շնորհահանդէսի առիթին:

Թաւրիզահայ Համազասպ եւ Սեդա Ոսկանեաններու մեկենասութեամբ հրատարակուած 530 էջ ծաւալով գիրքին մասին համապարփակօրէն արտայայտուեցաւ Ֆրեզնոյի Հայկական թանգարանի տնօրէն եւ կազմակերպիչ յանձնախումբի անդամ Վարուժան Տէր Սիմոնեան: Պատմութեան անցքերէն սկսելով, ան հասաւ մինչեւ Ատրպատականի Հայոց թեմի ներկան եւ մշակութային ժառանգութիւններու նորագոյն ցանկագրման եւ տեղագրման աշխատանքին, որուն միայն առաջին փուլին աւարտը կը նշուէր սոյն գիրքի հրատարակութեամբ եւ կազմակերպուած շնորհահանդէսով:

0000Chif Fresno4

Վահանգն Արսլանեան

Ան յատկապէս անդրադարձաւ սրբազան հօր ջանքերուն, որ գործակցութեամբ Ազգային իշխանութեան՝ կը յաջողի նոր խանդավառութիւն յառաջացնել թէ՛ թեմին մէջ եւ թէ արտասահմանի ակադեմական շրջանակներէ ներս: Վարուժան Տէր Սիմոնեան ընդգծեց անցեալ տարի Թաւրիզի մէջ կայացած հայագիտական առաջին գիտաժողովին ներկայացուցած կարեւորութիւնը՝ յայտարարելով, որ երկրորդը տեղի պիտի ունենայ յառաջիկայ Սեպտեմբերին:

Ապա խօսքը տրուեցաւ Ատրպատականի Հայոց առաջնորդին, որպէսզի սահիկներու միջոցաւ առաւել կենդանացնէ այն, ինչը գիրի ու գիրքի ճամբով յաջողեր էր պատմութեան դատողութեան յանձնել:

Ատրպատականի առաջնորդը նախ իր շնորհակալութիւնը յայտնեց կազմակերպիչ յանձնախումբին եւ բոլոր ներկաներուն, որոնք հետաքրքրուելով Հայ եկեղեցւոյ հնագոյն թեմի եւ իրենց սեփական պատմութեան հետքերով, հաւաքուեր էին՝ վերապրելու համար հայ ժողովուրդին անցեալը:

Սրբազան հայրը անգլերէնով ընդհանուր ներածական կատարեց թեմի կառոյցին եւ պատմութեան յատկանշական դէպքերուն մասին, ապա իր հետախուզական արշաւին մանրամասնութիւնները ներկայացուց՝ սահիկներու ճամբով ցոյց տալով տեղագրական աշխատանքին դժուարութիւնները, ու երբեմն արկածախնդրական ճամբորդութիւնները դէպի հեռաւոր, հայաթափուած եւ անմարդաբնակ գաւառներ ու գիւղեր:

0000Chif Fresno1

Հանդիսականները կը հետեւին Ատրպատականի Հայոց թեմի պատմութեան անցքերուն

Հետաքրքրական բաժիններէն էին վերանորոգման աշխատանքները, որոնք յատկապէս պատմական մեծ արժէք ունեցող վանքերու եւ եկեղեցիներու վրայ կը կատարուին Իրանի Իսլամական հանրապետութեան կողմէ, ինչպէս Ս. Թադէի վանքին, նոյնպէս նաեւ Ս. Ստեփանոս Նախավկայի եւ Ծոր-Ծորի մէջ:

Սահիկներու նոր եւ ճոխացուած հաւաքածոն այնքան ազդեցութիւն գործեց ներկայ բազմութեան վրայ, որ անոնք միտքով փոխադրուեցան հայոց պատմութեան ակունքները՝ հայոց քրիստոնէական հաւատքին խորը՝ Ս. Թադէոս առաքեալի քարոզչութիւնը եւ Սանդուխտ կոյսի նահատակութիւնը անոր հօր՝ Սանատրուկ արքայի հրահանգով:

Հանդիսութիւնը եզրափակուեցաւ ցուցադրութեամբ կարճ ֆիլմի մը, որ կը ներկայացնէր Ս. Ստեփանոս Նախավկայ վանքին հակիրճ պատմութիւնը՝ պատրաստւած օտար այցելուներու համար:

0000Chif Fresno3

Մակագրման պահէն տեսարան մը

Շնորհահանդէսի աւարտին, սրբազան հայրը իր թեմին տարբեր շրջաններուն մէջ գտնուող սրբավայրերը ներկայացնող մեծադիր նկարները նուիրեց հոգեւոր հովիւին, Հայաստանի հիւպատոսին, Հայագիտութեան ամպիոնի վարիչին եւ կազմակերպիչ յանձնախումբի նուիրեալ անդամներուն:

Հիւրասիրութեան ընթացքին, ներկայ ժողովուրդէն անոնք, որոնք փափաք յայտնեցին, սրբազան հայրը ուրախութեամբ մակագրեց իր գիրքէն օրինակներ, որպէսզի Ատրպատականը իր անցեալով ու ներկայով շօշափելի ըլլայ մշակութասէր անձերու ձեռքերուն մէջ:

 

(Թղթակցութիւնը՝ Ատրպատական Ազգային առաջնորդարանէն, Թաւրիզ)

0000Chif Fresno2

Հոգեւոր հովիւը, Հայաստանի հիւպատոսը, հայագիտութեան ամպիոնի վարիչը եւ կազմակերպիչները

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top