Անկախ Արդիւնքէն

586394b36f20d33b681c5adfba62e803_L

 

586394b36f20d33b681c5adfba62e803_L

«ԱՍՊԱՐԷԶ»

 

Հայ Յեղափոխական Դաշնակցութեան՝ Երեւանի քաղաքապետական ընտրութիւններուն մասնակցութիւնը, Հայաստանի մէջ ժողովրդավարութեան ամրապնդման ուղղուած նշանակալի՛ քայլ է:

Մեր թեկնածուները բաւական վստահութեամբ կը յայտարարեն, թէ յաջողութիւն պիտի արձանագրեն Երեւանի աւագանիի ընտրութիւններուն: Մենք կը գտնենք, որ Դաշնակցութիւնը, իր մասնակցութեան ձեւով, իր երիտասարդ թեկնածուներու ներկայացումով եւ իր ընտրապայքարի մարտավարութեամբ՝ արդէն իսկ կրնայ ինքզինք յաջողած նկատել:

Արդարեւ, հակառակ այսպէս կոչուած հարցախոյզներու անբարեյոյս գնահատումներուն, հակառակ հասարակական ցանցերու մէջ վխտացող հակադաշնակցական արտայայտութիւններուն, հաւատքո՛վ ու համոզումո՛վ ընտրապայքարի դուրս գալու որոշումը թէ՛ կուսակցութեան, թէ՛ թեկնածուներուն հանդէպ յարգանք կը պարտադրէ:

Մենք յաջողած կը նկատենք ընտրապայքարին ճամբով ներկայացուած Դաշնակցութեան՝ Երեւանի զարգացման ծրագիրին ներդրումը: Յաջողած կը նկատենք երիտասարդական աւիւնով տղոց ու աղջիկներուն այցելութիւնները քաղաքամայրի տարբեր շրջաններ, անոնց բարեհամբոյր շփումները քուէարկողներու հետ, անոնց ժպտուն լաւատեսութիւնը մեր երկրի ապագային հանդէպ:

Դաշնակցութեան «Յանուն Երեւանի» կարգախօսը ունի նաեւ մէկ այլ գնահատելի երանգ, որ կը շեշտուի բոլոր թեկնածուներուն կողմէ՝ իրենց հանրային ելոյթներուն թէ դէմ առ դէմ հանդիպումներուն ընթացքին: Քաղաքապետի դաշնակցական թեկնածու Միքայէլ Մանուկեանի խօսքերով՝ «Այլ ճանապարհ չկայ, քան՝ միասնութի՛ւնը: Բոլոր խնդիրներն ունեն իրենց լուծումը, բնակիչներն ու քաղաքապետը պէտք է միասնական աշխատանքով լուծեն Երեւանի առջեւ ծառացած բազմաթիւ խն-դիրները»:

Բաւական լարուած այս քաղաքական մթնոլորտին մէջ Դաշնակցութեան մասնակցութիւնը քաղաքապետական ընտրութիւններուն՝ նաեւ կայունութեա՛ն երաշխիք է, պետականութեան ամրապնդման հեւքին լծուած քաղաքացիական յանձնառութեան դրսեւորում:

Ընտրապայքարի այս ընթացքին մէջ մենք կը տեսնենք Դաշնակցութեան յաջողութիւնը՝ անկախ անոր թեկնածուներուն ապահոված քուէներու հաշիւէն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

2 Comments

  1. Վռամ said:

    Հոսանքն ի վեր պիտի ըլլայ այս պայքարը, նկատի ունենալով որ ո՛չ միայն քաղաքացիին քուէն ստանալու ընտրապայքար է այս մէկը, այլ մանաւանդ՝ ժողովուրդը «սեւեր»ու եւ «սպիտակներ»ու բաժնող մտածելակերպին դէմ է:

*

Top