Սուրիոյ Վարչապետը Դամասկոսի Միջազգային Ցուցահանդէսի Բացման Ընթացքին Այցելեց Հայաստանի Տաղաւարը

0000DAMAS

0000DAMAS

Դամասկոսի 60րդ միջազգային ցուցահանդէսի բացման ընթացքին Սուրիոյ վարչապետ Իմատ Խամիս այցելեց Հայաստանի տաղաւարը, ուր ընդունուեցաւ Սուրիոյ մօտ Հայաստանի դեսպան Արշակ Փոլատեանի կողմէ:

«Պիզնես Արմենիա»ի հանրային կապերու բաժինէն յայտնեցին, որ 6-15 Սեպտեմբեր Հայաստան միասնական տաղաւարով կը մասնակցի Դամասկոսի 60րդ միջազգային ցուցահանդէսին:

Հայկական տաղաւարին մէջ ներկայացուած են մեքենաշինութեան, շինանիւթերու արտադրութեան, դեղագործութեան, ուտելիքի արդիւնաբերութեան ոլորտներու 33 ընկերութիւններու արտադրանքի նմուշներ ու ծանօթացման գրքոյկներ:

Վարչապետ Իմատ Խամիս ողջունեց բարեկամ Հայաստանի մասնակցութիւնը՝ յոյս յայտնելով, որ ցուցահանդէսը նոր խթան կ՛ըլլայ հայ-սուրիական առեւտրատնտեսական համագործակցութեան խորացման համար: Դեսպան Արշակ Փոլատեան, իր կարգին նշեց, որ Հայաստանի արտադրողները պատրաստ են իրենց առաւելագոյն ջանքերը գործադրելու՝ փոխշահաւէտ համագործակցութեան համար:

Հայաստան այս առիթով նաեւ պարգեւատրուեցաւ: Պարգեւը դեսպան Արշակ Փոլատեանին յանձնեց Սուրիոյ տնտեսութեան նախարար Մոհամետ Սամեր Խալիլ:

Նշենք, որ Դամասկոսի 60րդ միջազգային ցուցահանդէսին կը մասնակցին 1700 ընկերութիւններ՝ 48 երկիրներէ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top