«ԵՐԿԻՐ»Ի ԶՐՈՅՑԸ ՀՅԴ ՀԱՅԱՍՏԱՆԻ ԳԵՐԱԳՈՅՆ ՄԱՐՄՆԻ ՆԵՐԿԱՅԱՑՈՒՑԻՉ ԱՐՍԷՆ ՀԱՄԲԱՐՁՈՒՄԵԱՆԻ ՀԵՏ

0914arsen

0914arsen

«Սխալ Քայլերն Ու Ընթացքը Անխուսափելիօրէն Շեղելու Են Ճիշդ Ճանապարհից»

 

Վարեց՝ ԱՐԱԶ ԳԱՅՄԱԳԱՄԵԱՆ

 

«Երկիր»ի զրուցակիցն է ՀՅ Դաշնակցութեան Հայաստանի Գերագոյն մարմնի ներկայացուցիչ Արսէն Համբարձումեանը:

 

ԱՐԱԶ ԳԱՅՄԱԳԱՄԵԱՆ.-Պարոն Համբարձումեան, Սեպտեմբերի 23ին տեղի են ունենալու Երեւանի աւագանու արտահերթ ընտրութիւնները, որին այս անգամ մասնակցում է նաեւ Դաշնակցութիւնը: Ի՞նչ փոփոխութիւնների, բարելաւման ակնկալիքով է կուսակցութիւնը մասնակցում ընտրութիւններին: Ըստ ձեզ՝ մեր երկրին ի՞նչ զարգացումներ են սպասում:

ԱՐՍԷՆ ՀԱՄԲԱՐՁՈՒՄԵԱՆ.- Մեր երկիրը վճռորոշ, բեկումնային փոփոխութիւնների փուլ է թեւակոխել: Անցեալի էջը փակուած է, ներկան՝ յուսադրող ու դրական իրողութիւնների եւ միտումների կողքին ունի նաեւ մտահոգիչ ու անընդունելի երեւոյթներ, ապագան բազում մարտահրաւէրներ է խոստանում: Հաւաքական իմաստութիւն է պահանջւում սպասուող մարտահրաւէրներին դիմակայելու, ժողովրդի սպասումներն ու ակնկալիքները արդարացնելու, երկիրը զարգացման ճիշդ ընթացքի մէջ դնելու համար:

Առաջիկայ ընտրական գործընթացները այս առումով չափազանց կարեւոր նշանակութիւն ունեն: Նոր իրողութիւնների պայմաններում մայրաքաղաքի, ինչպէս նաեւ առաջիկայում մի շարք քաղաքային համայնքներում կայանալիք ընտրութիւնները լուրջ մարտահրաւէր են ոչ միայն իշխանութիւնների, այլեւ բոլոր քաղաքական ուժերի եւ առհասարակ ողջ հասարակութեան համար:

Այս առումով առանձնայատուկ կարեւորութիւն ունեն յատկապէս Երեւանի աւագանու արտահերթ ընտրութիւնները, որոնք, ըստ էութեան, կարող են կանխորոշել ոչ միայն մայրաքաղաքի, այլեւ Հայաստանի զարգացման հեռանկարը: Ազատ, արդար եւ մրցակցային ընտրութիւնների անցկացման ճանապարհը բնականոն քաղաքական զարգացումների միակ երաշխիքն է: Միւս բոլոր ճանապարհները տանում են փակուղի:

 

ԱԶԱՏ ԳԱՅՄԱԳԱՄԵԱՆ.- Արդեօք իւրայինների եւ ոչ իւրայինների բաժանելու յայտարարութիւնները փակուղային իրավիճակ չե՞ն ստեղծում:

ԱՐՍԷՆ ՀԱՄԲԱՐՁՈՒՄԵԱՆ.- Տարբեր քաղաքական ուժեր ընտրապայքարի են դուրս եկել, սակայն ընտրարշաւի մեկնարկը այս առումով ամենեւին էլ յուսադրող չէ: Հասարակութեանը բարիկադներով տարանջատելը, քաղաքական ուժերին սեւ ու սպիտակի բաժանելը, թուացեալ հակայեղափոխականների դէմ «դուխով» յեղափոխականի պատմուճանով հանդէս գալը, իւրայինների մէջ թշնամիներ փնտռելը քաղաքական պայքարի լաւագոյն եղանակը չէ: Ու պէտք չէ անընդհատ փորձել Ռ. Քոչարեանին կամ էլ հակայեղափոխութիւնը սրա նրա «գրպանը գցել»: Ազնիւ չէ եւ գործընկերներին վայել չէ: Քաղաքապետական ընտրութիւնները պէտք չէ ընկալել եւ ներկայացնել որպէս վարչապետի կամ վարչապետի ֆաւորիտ (նախընտրեալ-Խմբ.) թեկնածուի իւրօրինակ վստահութեան հանրաքուէ: Իսկ եթէ նպատակը քաղաքական մենիշխանութիւն ստեղծելն է ու ամբողջական վերահսկողութիւն սահմանելը, ապա ի՞նչ արժէք ունէր վերջին ամիսների պայքարը: Սխալ քայլերն ու ընթացքը անխուսափելիօրէն շեղելու են ճիշդ ճանապարհից: Ընտրապայքարը պէտք է մնայ դասական ընտրարշաւի տրամաբանութեան մէջ, «միասին՝ յանուն» սկզբունքով, այլ ոչ թէ ուղեկցուի իրավիճակը անհարկի լարելու փորձերով ու բուն օրակարգից շեղող յեղափոխական հռետորաբանութեամբ:

 

ԱՐԱԶ ԳԱՅՄԱԳԱՄԵԱՆ.- Իսկ ի՞նչ կ՛ասէք ԱԱԾ տնօրէնի եւ ՀՔԾ պետի՝ մեծ հնչեղութիւն ստացած հեռախօսազրոյցի ձայնագրութեան եւ դրա հրապարակման մասին:

ԱՐՍԷՆ ՀԱՄԲԱՐՁՈՒՄԵԱՆ.- Նրանց հեռախօսազրոյցի թէ գաղտնալսման փաստն ինքնին, թէ խօսակցութեան բովանդակութիւնը, մեղմ ասած, խիստ մտահոգիչ է: Միանշանակ է, որ հարցը քաղաքականից եւ բարոյականից բացի ունի նաեւ անվտանգութեան ասպեկտ (երեւոյթ-Խմբ.) եւ համապատասխան մարմինների խնդիրն է լրջօրէն զբաղուել դրանով: Նախադէպը չունեցող այս երեւոյթը առաջացնում է բազմաթիւ հարցեր, որոնք պատասխան են ակնկալում:

Գաղտնալսուած եւ հանրութեան սեփականութիւնը դարձած հեռախօսազրոյցը, ըստ էութեան, ոչ թէ երկու բարձրաստիճան պաշտօնեաներին բնորոշ խօսակցութիւն էր, այլ փողոցի մակարդակի «տղայական զրոյց», որը պատիւ չի բերում: ԱԱԾ տնօրէնի եւ ՀՔԾ պետի համատեղ ասուլիսում ներկայացրած պարզաբանումներն էլ, մեղմ ասած, համոզիչ չէին: Աւելին, ինքնաարդարացման նկատառումներից ելնելով նախաքննական գաղտնիքներ հրապարակելը անթոյլատրելի է եւ պէտք է գնահատականի արժանանայ:

Տպաւորութիւնն այնպիսին է, որ իրենց իրաւասութիւնների եւ լիազօրութիւնների շրջանակներում ինքնուրոյն որոշումներ կայացնելու փոխարէն իրաւապահ մարմինները կարեւոր նշանակութիւն ունեցող հարցերի վերաբերեալ որոշումները ոչ վաղ անցեալի նման կայացնում են հրահանգներով ու քաղաքական նկատառումներից ելնելով: Ստիպուած ենք արձանագրել, որ Մարտի 1ի դէպքերի կապակցութեամբ յարուցուած քրէական գործերի առնչութեամբ մեր մտահոգութիւնները տեղին էին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top