ԵԱՀԿ ԽՎն Պիտի Շարունակէ Աջակցիլ Հայաստանի Ժողովրդավարութեան Զարգացման

0914dzeretelly

ԵԱՀԿի Խորհրդարանական վեհաժողովի նախագահ Կէորկի Ծերեթելի, ամփոփելով Հայաստան կատարած իր երկօրեայ այցելութիւնը՝ ողջունեց երկրին մէջ ընտրական բարեփոխումներ իրականացնելուն ուղղուած ջանքերը: Այս մասին կը տեղեկացնեն ԵԱՀԿ ԽՎ գրասենեակէն:

Ծերեթելի վերահաստատեց ԵԱՀԿ եւ ԽՎ յանձնառութիւնը՝ աջակցելու Հայաստանի շարունակական ժողովրդավարութեան զարգացման:

«Այս տարի Հայաստանի մէջ, կառավարութեան փոփոխութենէն ետք, հայկական քաղաքական համակարգը կ՛անցնի նոր փորձաշրջան: Ուրախ եմ տեսնելու միասին կառուցողական աշխատանք տանելու քաղաքական ուժերու պատրաստակամութիւնը, իսկ ընտրական գործընթացներու ծրագրուած բարեփոխումներու պարագային, լայն հաւանութիւնը կրկնակիօրէն կարեւոր է: Այս գործընթացին ամբողջ պատասխանատուութիւնը Հայաստանի ժողովուրդին եւ իշխանութիւններուն ձեռքն է», ըսաւ Ծերեթելի՝ աւելցնելով, որ ԵԱՀԿն եւ Խորհրդարանական վեհաժողովը պիտի շարունակեն աջակցիլ այդ գործընթացին յանուն լաւագոյն արդիւնքի:

Այցին ծիրին մէջ ան ԵԱՀԿի ԽՎ գլխաւոր քարտուղար Ռոպերթօ Մոնտտլայի հետ հանդիպեցաւ Հայաստանի նախագահ Արմէն Սարգսեանի, Ազգային ժողովի նախագահ Արա Բաբլոյեանի, արտաքին գործոց նախարար Զօհրաբ Մնացականեանի, խորհրդարանական ուժերու, քաղաքական հասարակութեան ներկայացուցիչներու եւ ԵՊՀ ուսանողներու հետ:

Այցելութիւններուն ընթացքին քննարկուեցան շարք մը հարցեր, ինչպէս՝ տնտեսական զարգացում, ընտրական բարեփոխումներ, կաշառակերութեան դէմ պայքար, տարածաշրջանային յարաբերութիւններ եւ ԵԱՀԿի մէջ Հայաստանի աշխատանքը:

Ծերեթելի վերահաստատեց Խորհրդարանական վեհաժողովի աջակցութիւնը Լեռնային Ղարաբաղի հակամարտութեան կարգաւորման գործընթացին ԵԱՀԿ Մինսկի խումբի եւ անոր համանախագահներու աշխատանքին: Ան ընդգծեց, որ այս հարցով յստակ արդիւնքներ եւ յառաջընթաց արձանագրելու պատասխանատուութիւնը կ՛իյնայ կողմերուն քաղաքական ղեկավարութեան վրայ:

«Ես՝ ըլլալով Հարաւային Կովկասի տարածաշրջանէն կը հասկնամ այն մարտահրաւէրները եւ զգայունութիւնները, որոնք կ՛ազդեն Հայաստանի վրայ: Յոյսով եմ, որ իշխանութիւնները պիտի օգտագործեն ԵԱՀԿի ամբողջ մեքենակառոյցը, զոր կառոյցը կ՛առաջարկէ՝ օգնելու երկրին լիարժէք կերպով բաւարարելու ժողովուրդի ակնկալիքները», ըսաւ ԵԱՀԿի ԽՎ նախագահը:

Տարածաշրջանին մէջ վեհաժողովի աշխատանքներուն նպաստելու համար կ՛ակնկալուի, որ Հարաւային Կովկասի մէջ յետագային նշանակեն ԵԱՀԿի Կորհրդարանական վեհաժողովի նոր յատուկ ներկայացուցիչ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top