Վաստակաշատ Քանդակագործ Զաւէն Խտըշեան Մահացաւ

0000ZAVEN

 

0000ZAVEN

Երեքշաբթի, 13 Սեպտեմբերին, իր մահկանացուն կնքեց լիբանանահայ բազմավաստակ քանդակագործ Զաւէն Խտըշեան:

Զաւէն Խտըշեան ծնած է Պէյրութ: Նախնական կրթութիւնը ստացած է Ազգային Սահակեան վարժարանին մէջ, իսկ երկրորդական կրթութիւնը՝ Համազգայինի Ն. Փալանճեան ճեմարանի:

1952ին կը յաճախէ ԱԼՊԱ գեղարուեստի դպրոցը: Կը սկսի գեղանկարչութեամբ, սակայն շուտով կ՛անդրադառնայ, որ պէտք է քանդակագործութեամբ զբաղի եւ այդպէս ալ ըրաւ, մինչեւ տարի մը առաջ: 1954ին կրթութեան նախարարութենէն կը ստանայ կրթանպաստ ու կը մեկնի Փարիզ՝ ուսումը կատարելագործելու համար Փարիզի Աքատեմի տէ պոզարի մէջ, մասնագիտանալով դիմաքանդակի ու կոթողական արուեստին մէջ: 1958ին կը վերադառնայ Լիբանան եւ կը սկսի դասաւանդելու ԱԼՊԱի մէջ, իսկ 1965էն սկսեալ Լիբանանեան գեղարուեստի համալսարանին, քանդակագործութեան բաժինին եւ ճարտարապետութեան ճիւղին, աւելի ուշ՝ Քասլիքի համալսարանին մէջ:

Փարիզ կեցութեան ընթացքին «Նոր Սերունդ»ի մէջ ունեցած է ազգային գործունէութիւն:

Շահած է Ա. եւ Բ. մրցանակներ:

Հեղինակն է Պիքֆայայի Ապրիլեան եղեռնի յուշարձանին, ինչպէս նաեւ Ս. Շարպելի արձանին՝ Անայա, վանքի մուտքին, Ժըպրան Խալիլ Ժըպրանի կիսանդրիին՝ Ռիատ Սոլհ հրապարակի պարտէզին մէջ, Ս. Վրացեանի կիսանդրիին՝ Ն. Փալանճեան ճեմարանի պարտէզին մէջ, Զարեհ Ա. վեհափառ հայրապետի քանդակին՝ Հալէպի մէջ: Արժանացած է Համազգայինի շքանշանին՝ Համազգայինի Կեդրոնական վարչութեան կողմէ:

Ունեցած է բազմաթիւ անհատական ցուցահանդէսներ եւ միշտ իր մասնակցութիւնը բերած է հաւաքական ցուցահանդէսներու:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top