Առաջնորդ Մուշեղ Արք. Մարտիրոսեան Վերամուտին Առիթով Այցելեց Ազգ. Շամլեան Վարժարան

0000Prelate Visits Chamlian1

ԿԼԵՆՏԷՅԼ.- Չորեքշաբթի, 12 Սեպտեմբերին, Արեւմտեան թեմի առաջնորդ Մուշեղ արք. Մարտիրոսեան վերամուտին առիթով այցելեց Ազգ. Վ. եւ Ա. Շամլեան վարժարան եւ իր օրհնութիւնն ու յաջող տարուան մը բարեմաղթութիւնները փոխանցեց։ Սրբազանին կ՛ընկերանային Կոմիտաս Ա. քհնյ. Թորոսեան եւ Մովսէս քհնյ. Շաննագեան, որոնք վարժարանին կրօնի դասատուներն են։

Վարժարանի մուտքին, առաջնորդ սրբազանը դիմաւորուեցաւ տնօրէնուհի դոկտ. Թալին Քարկոտորեանի, փոխտնօրէնուհի Ռիթա Գաբրիէլեանի եւ ուսումնական մարմինի ներկայացուցիչներուն կողմէ։

Կարճ հանդիպումէ եւ հիւրասիրութենէ ետք, առաջնորդը հերթաբար այցելեց մանկապարտէզի, նախակրթարանի եւ միջնակարգի դասարանները, ուր աշակերտներ բարի գալուստի խօսքեր արտասանեցին եւ կոկիկ յայտագիր մը ներկայացուցին։

Առաջնորդը օրհնեց աշակերտները եւ մտերմիկ զրոյց մը ունեցաւ մանկապարտէզի աշակերտներուն հետ, ինչպէս նաեւ ընդառաջելով ուսուցիչներու փափաքին՝ մանկական պատմութիւն մը կարդաց աշակերտներուն, որոնք հետաքրքրութեամբ հետեւեցան եւ հարցումներ ուղղեցին իրեն։

Այնուհետեւ, սրբազանը հանդիպեցաւ նախակրթարանի 5րդ կարգի աշակերտներուն, որոնք ջերմ խօսքերով շնորհակալութիւն յայտնեցին այս այցելութեան համար։ Իր կարգին, առաջնորդը գոհունակութիւն եւ գնահատանք արտայայտեց՝ ի տես եւ ի լուր աշակերտներուն ուշիմութեան, կարգապահութեան եւ անոնց հաւատքին, հայ լեզուին եւ մշակոյթին հանդէպ հաւատարմութեան ուխտի վերանորոգման։

7րդ կարգի աշակերտները, Հայաստանի Հանրապետութեան 100ամեակին առթիւ, վարժարանէն ներս Սարդարապատի յուշակոթողի որմանկարին դիմաց ներկայացուցին «Սարդարապատ» երգը, որմէ ետք առաջնորդ սրբազանը խրախուսեց աշակերտները Սարդարապատի հերոսական ոգիով վերանորոգուիլ եւ յաջողութիւն մաղթեց անոնց ապագայ երթին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top