ՍՓԻՒՌՔԻ  ՆԱԽԱՐԱՐԻՆ ԽՕՍՔԸ՝ ՀԱՅԱՍՏԱՆԻ ԱՆԿԱԽՈՒԹԵԱՆ ՏՕՆԻՆ ԱՌԹԻՒ

0921mkhitar

0921mkhitar

«Հայրենիքին Անհրաժեշտ Է Համայն Հայութեան Ներուժը»

 

Սիրելի՛ հայրենակիցներ,

Ջերմօրէն շնորհաւորում եմ մեզ բոլորիս Հայաստանի անկախութեան 27րդ տարեդարձի առթիւ:

Անկախ պետականութիւնն աւելի քան 5 հարիւրամեակ նուիրական երազանք էր հայ ժողովրդի իւրաքանչիւր զաւակի համար: Երազանք, որ մեր հերոսական նախնիների շնորհիւ իրականութիւն դարձաւ մէկ դար առաջ, եւ այս տարի աշխարհասփիւռ հայութիւնը մեծ շուքով տօնում է Սարդարապատի եւ Բաշ Ապարանի հերոսամարտերով կերտուած Հայոց պետականութեան 100ամեայ յոբելեանը:

Յանուն Հայրենիքի մղուած հերոսամարտերում մեր նախնիները յաղթանակեցին, քանզի գործեցին յստակ գիտակցութեամբ՝ հայոց պետականութիւնն է մեր ազգային ինքնութեան պահպանման եւ յարատեւման միակ գրաւականն ու երաշխիքը: Միայն անկախ պետականութիւն ունենալով, հայրենի պետութեան շուրջ համախմբուելով՝ հայը կարող է թեւեր տալ համազգային երազանքներին ու նպատակներին: Մեր նախնիները յաղթանակեցին, քանզի ստեղծուած աշխարհաքաղաքական պայմաններում միակ ելքը սեփական ձեռքերով սեփական ճակատագիրը կերտելն էր:

Նոյն տեսլականն էր առաջնորդում մեր պապերին ու հայրերին նախորդ դարի 90ականներին, երբ իրենց կեանքի գնով մեզ վերադարձրին անկախ հայրենիքում ապրելու եւ արարելու մեր իրաւունքն ու արժանապատուութիւնը՝ այն ամրագրելով համաժողովրդական հանրաքուէի «այո»ով:

Նոյն համաժողովրդական կամքն ու վճռականութիւնը 27 տարի անց իրականութիւն դարձրեց ոչ բռնի, թաւշեայ, ժողովրդական յեղափոխութիւնը՝ այս անգամ սեփական հայրենիքում ժողովրդի սեփական իշխանութիւնը վերահաստատելու նպատակով:

Այսօր Հայաստանում լուրջ բարեփոխումների ժամանակաշրջան է: Հայրենի պետութիւնն ընթանում է ազատ, ժողովրդավար, իրաւական պետութիւն դառնալու ճանապարհով: Շօշափելի արդիւնք ունենալու համար հայրենիքին անհրաժեշտ է համայն հայութեան ներուժը՝ արդիական գաղափարների, տաղանդի, կարողութիւնների ներդրման ձեւով:

Ուրեմն, եկէ՛ք մեր ներդրումն ունենանք հայրենիքի զարգացման գործում՝ նաեւ ապրելով եւ արարելով հայրենիքում: Եկէ՛ք մեր ողջ ներուժն օգտագործենք ի նպաստ Հայաստանի եւ Արցախի, եկէ՛ք էլ աւելի ամրապնդենք կապն առ հայրենիք, եկէ՛ք դառնանք էլ աւելի հայակենտրոն՝ միասին կերտելով մեր երազանքի Հայաստանը: Հզօր Հայաստանի կերտմանը զուգահեռ մենք պէտք է հաղորդակից լինենք Սփիւռքի խնդիրներին, համատեղ մշակենք լուծման տարբերակներ, խորացնենք կապը սփիւռքեան կառոյցների հետ, ընդլայնենք համահայկական ծրագրերի մշակման եւ իրականացման գործում սփիւռքեան անհատների եւ կազմակերպութիւնների մասնակցութեան շրջանակը՝ ամրապնդելով եւ որակական նոր մակարդակի բարձրացնելով հայրենիք-սփիւռք գործակցութիւնը, քանզի ուժեղ է Հայաստանը, երբ ուժեղ է Սփիւռքը եւ ուժեղ է Սփիւռքը, երբ ուժեղ է հայրենիքը:

Սիրելի՛ հայրենակիցներ,

Մէկ անգամ եւս շնորհաւորում եմ բոլորիս համազգային այս մեծ տօնի առթիւ: Տօն, որ այս տարի, առաւել քան երբեւէ, լիարժէք իմաստ եւ բովանդակութիւն է ձեռք բերել՝ ընդգծելով մեր դարաւոր երազանքի իրական նշանակութիւնն ու կարեւորութիւնը: Ուրեմն, կեցցէ՛ հայ ժողովրդի միասնական կամքով արտայայտուած անկախութիւնը:

Կեցցէ՛ Հայաստանի Հանրապետութիւնը, կեցցե՛ն Արցախն ու Սփիւռքը, կեցցե՛նք մենք, որ ապրում եւ ապրելու ենք ազատ, անկախ եւ երջանիկ Հայաստանում:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top