Հայաստանի Տնտեսական Աշխուժութեան Ցուցանիշին Աճը Կը Կազմէ 7.7 Տոկոս

ԵՐԵՒԱն.- 2018ի Յունուարէն Օգոստոս ամիսներուն, Հայաստանի տնտեսական աշխուժութեան ցուցանիշին աճը՝ նախորդ տարուան նոյն ժամանակահատուածին հետ համեմատած՝ կազմած է 7.7 տոկոս:

Հայաստանի Ազգային վիճակագրական ծառայութեան տրամադրած տուեալներուն համաձայն՝ արդիւնաբերական արտադրանքին ծաւալը աճած է 4.4 տոկոսով, շինարարութեան ծաւալը՝ 8.5 տոկոսով, առեւտուրի շրջանառութեան ծաւալը՝ 9.7 տոկոսով: Զգալի աճ արձանագրուած է ծառայութիւններու ոլորտին մէջ՝ կազմելով 18.9 տոկոս: Քիչ չափով նուազում կը նկատուի գիւղատնտեսութեան ոլորտին մէջ. մասնաւորապէս, գիւղատնտեսութեան համախառն արտադրանքին ծաւալը 2017ի Յունուար-Օգոստոս ամիսներուն հետ համեմատած՝ նուազած է 1 տոկոսով:

Ելեկտրականութեան արտադրութեան ոլորտին մէջ, 2018ի Յունուարէն Օգոստոս ամիսներուն ցուցանիշը նախորդ տարուան նոյն ժամանակահատուածին հետ համեմատած՝ աճած է 1.3 տոկոսով, իսկ սպառողական գիներու հաշիւին ցուցանիշը աճած է 2.5 տոկոսով:

2018ի առաջին 8 ամիսներուն, Հայաստանի մէջ միջին ամսական անուանական աշխատավարձը կազմած է 168,467 դրամ, որ նախորդ տարուան նոյն ժամանակահատուածին հետ համեմատած՝ աճած է 3.7 տոկոսով: Պետական հիմնարկներու մէջ, միջին ամսական անուանական աշխատավարձը աճած է 1.8 տոկոսով, ոչ պետականինը՝ 3.7 տոկոսով:

Արտաքին առեւտրաշրջանառութեան ծաւալին աճը, ընթացիկ տարուան առաջին 8 ամիսներուն, կազմած է 26.4 տոկոս. մասնաւորապէս, արտածումը՝ 16.5 տոկոս, ներածումը՝ 32 տոկոս:

Դրամի փոխարժէքը ամերիկեան տոլարին նկատմամբ 2018ի Յունուարէն Օգոստոս ամիսներուն եղած է 482.01:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top