Շիֆ Եւ 8 Քոնկրեսականներ Քալիֆորնիոյ Ներդրումները Թուրքիայէն Ետ Քաշող Բանաձեւը Ստորագրելու Կոչ Կ՛ընեն Պրաունին

ADAM SCHIFF

ADAM SCHIFF

ՈՒԱՇԻՆԿԹԸՆ.- Սեպտեմբեր 19ին, քոնկրեսական Էտըմ Շիֆ եւ Քալիֆորնիայէն 8 այլ քոնկրեսականներ նամակ յղած են Քալիֆորնիոյ նահանգապետ Ճերի Պրաունին, որպէսզի ան ստորագրէ նահանգային Ծերակոյտին եւ խորհրդարանին կողմէ վաւերացուած թիւ 1597 բանաձեւը:

Բանաձեւը կը պահանջէ նահանգին ներդրումները դուրս բերել Թուրքիայէն՝ իբրեւ հակազդեցութիւն Հայոց Ցեղասպանութիւնը ուրանալու Անգարայի վարքագիծին: Անիկա յատկապէս կ՛արգիլէ Քալիֆորնիոյ պաշտօնեաներու եւ ուսուցիչներու թոշակներու հիմնադրամներուն (CalPERS – CalSTRS) որեւէ ներդրում կատարել թրքական կառավարութեան պատկանող, կամ անոր կողմէ կառավարուող, կամ անոր հետ առնչուող տնտեսական ձեռնարկութիւններու մէջ:

Պրաուն, մինչեւ Սեպտեմբերի վերջաւորութիւն, ժամանակ ունի ստորագրելու բանաձեւը, որ նահանգային խորհրդարանին ներկայացուած էր իր անդամներէն՝ Ատրին Նազարեանի կողմէ։

Շիֆ եւ միւս քոնկրեսականները իրենց նամակին մէջ կը շեշտեն, թէ բանաձեւը յարմար պատասխան մըն է Անգարայի ուրացման քաղաքականութեան, ինչպէս նաեւ՝ Թուրքիոյ մէջ շարունակուող մարդկային իրաւանց ոտնակոխումներուն։

Նամակը ստորագրած են նաեւ Ճեքի Սփիր, Թոնի Քարտենազ, Սալուտ Քարպահալ, Ճիմ Քոսթա, Աննա Էշու, Կրէյս Նափոլիթանօ, Զոյի Լոֆկրեն եւ Պրետ Շըրմըն։

Արեւմտեան Ամերիկայի Հայ Դատի յանձնախումբը շնորհակալութիւն յայտնեց քոնկրեսական Շիֆին եւ անոր պաշտօնակիցներուն, որ այս նամակով նեցուկ կանգնած են նշեալ բանաձեւին ստորագրութիւնը ապահովելու ջանքերուն՝ աւելցնելով. «Կոչ կ՛ընենք կառավարիչ Պրաունին, որ անսայ այս կարեւոր բանաձեւը ստորագրելու Քալիֆորնիոյ հազարաւոր քաղաքացիներու փափաքին։ Անգարային պէտք չէ արտօնել, որ Ցեղասպանութեան ուրացումը շարունակէ՝ Քալիֆորնիայէն կատարուած ներդրումներուն եկամուտով»։

Յիշեցնենք, որ Հայոց Ցեղասպանութիւնը շարունակաբար հերքող Թուրքիոյ դէմ պատժամիջոցներ կիրառելու սոյն քայլը, աւելի կանուխ նաեւ մշակուած էր Հայ Երիտասարդաց Դաշնակցութեան եւ հայ ուսանողական միութիւններու կողմէ, որոնք ապահովեցին անոր վաւերացումը Քալիֆորնիոյ համալսարանի 9 մասնաճիւղերուն մէջ։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top