Ռուսիա Սուրիոյ Պիտի Տրամադրէ «Էս. 300» Հակաօդայիններ

0925Russia-Israel

 

0925Russia-Israel

ԵՐԵՒԱՆ, «Ազատութիւն».- Ռուսիոյ պաշտպանութեան նախարար Սերկէյ Շոյկու Սեպտեմբեր 24ին յայտարարեց, թէ յառաջիկայ օրերուն, Ռուսիա Սուրիոյ իշխանութիւններուն պիտի փոխանցէ հակաօդային պաշտպանութեան «Էս. 300» համակարգեր:

«Երկու շաբթուան ընթացքին, Սուրիոյ պիտի փոխանցուի «Էս. 300» արդիական համակարգեր, որոնք ի վիճակի են 250 քիլոմեթր հեռաւորութեան վրայ օդային թիրախներ յայտնաբերելու եւ միաժամանակ հարուածելու անոնցմէ քանի մը հատը: Համակարգերը լրջօրէն պիտի ամրապնդեն սուրիական հակաօդային պաշտպանութիւնը: 2013ին, Իսրայէլի խնդրանքով, մենք դադրեցուցած էիք այս համակարգերու մատակարարումը: Այսօր, սակայն, կացութիւնը փոխուած է, եւ այդ մէկը մեր մեղքով չէ՛», աւելցուց պաշտպանութեան նախարարը՝ ակնարկելով անցեալ շաբաթ իսրայէլեան ռազմական օդանաւերու կողմէ ռուսական օդանաւի զգետնումին:

Նշենք, որ Ռուսիոյ խորհրդարանը Սեպտեմբեր 23ին յայտարարեց. «Իսրայէլեան օդուժին դիմաց պէտք է փակել Սուրիոյ օդային տարածքը, ուր կը գտնուին ռուս զինուորներ։ Պէտք է վար առնել իսրայէլեան օդանաւերը, եթէ խախտեն Սուրիոյ օդային տարածքը: Կարելի չէ իսրայէլացիներուն ներել ռուսական օդանաւին զգետնումի դէպքը։ Իսրայէլացիները զգուշացումներէ չեն հասկնար, ուստի պէտք է անոնց նկատմամբ խիստ քայլեր որդեգրել»։

Մինչ այդ, Ռուսիոյ պաշտպանութեան նախարարութիւնը, Լաթաքիոյ ծովեզերքին մօտ ռուսական օդուժի օդանաւի զգետնումին վերաբերեալ մանրամասնութիւններ հրապարակեց: Նախարարութեան բանբեր Իկոր Քոնաշինքով յայտնեց, թէ Սուրիոյ մէջ ռուսական օդանաւին վար առնուելուն ամբողջական պատասխանատուութիւնը կը կրէ իսրայէլեան օդուժը: Ան յայտնեց, որ Իսրայէլ ապակողմնորոշած է Ռուսիան՝ իր օդային հարուածի վայրին վերաբերեալ սխալ տեղեկութիւն հաղորդելով, ինչ որ արգելք հանդիսացած է, որ ռուսական օդանաւը ժամանակին հասնի ապահով տարածք: Ռուսիոյ պաշտպանութեան նախարարութեան բանբերը կրկնեց, թէ իսրայէլեան օդանաւերը պահուըտած են ռուսական օդանաւին ետին:

Քոնաշինքով նաեւ ըսաւ, որ ռուսական զինուորական ոստիկանութիւնը հսկողութեան 6 կէտեր ունի Կոլանի մէջ, անջատման գիծին վրայ, եւ որ Իրանի համակիր խմբաւորումներու աւելի քան հազար անդամներ ու 24 հրթիռային համակարգեր՝ Ռուսիոյ պաշտպանութեան նախարարութեան միջնորդութեամբ հեռացուած են Կոլանէն:

Նաեւ, Շոյկու հեռաձայնային զրոյց մը ունեցած է իր ֆրանսացի պաշտօնակից Ֆլորանս Պարլիի հետ, անոր տեղեկութիւններ փոխանցած է Սուրիոյ մէջ ռուսական օդանաւի զգետնումին մասին եւ շնորհակալութիւն յայտնած ջախջախման վայրին մէջ որոնումներու աշխատանքին օժանդակելու առնչութեամբ Ֆրանսայի արտայայտած պատրաստակամութեան համար, նշելով, որ Մոսկուան այդ մէկը կատարելու բաւարար կարողութիւն ունի: Երկու կողմերը նաեւ քննարկած են Իտլիպի մէջ ապահովական գօտի ստեղծելու շուրջ Ռուսիոյ եւ Թուրքիոյ նախագահներուն գոյացուցած համաձայնութեան մանրամասնութիւնները:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top