Հայկական Ոսկրածուծի Հիմնարկի Առաքելութեան Մասին Դասախօսական Ճաշկերոյթ

0000LADIES LUNCHEON ABMDR2

ԱԶԳ. ԱՌԱՋՆՈՐԴԱՐԱՆԻ ՏԻԿՆԱՆՑ ՕԺԱՆԴԱԿ ՄԱՐՄԻՆԻՆ ԿԱԶՄԱԿԵՐՊՈՒԹԵԱՄԲ

 

 

Հանդիպումը սկսաւ առաջնորդին կողմէ սեղաններու օրհնութեան աղօթքով։ Հանդիսավարը՝ կազմակերպիչ մարմինի անդամներէն Մարալ Դարբինեան ողջունեց ներկաները եւ յայտնեց, որ նման ձեռնարկներ կը կազմակերպուին, նկատի ունենալով, որ ֆիզիքական սնունդի կողքին, անհրաժեշտ է միտքի սնունդը։ Ան նշեց, որ իբրեւ դասախօս հրաւիրուած է Հայկական ոսկրածուծի հիմնարկի անդամներէն՝ դոկտ. Վերժին Մատէնլեան, որ պիտի ներկայացնէ ոսկրածուծի փոխպատուաստում նիւթը, բժշկագիտական միջոց մը՝ որ մարդասիրական ու ազգօգուտ աշխատանքի լծած է Հայկական Ոսկրածուծի հիմնարկը եւ միջոց է մարդկային կեանքերու փրկութեան։

Ճաշէն ետք, հանդիսավարը յաջորդաբար բեմ հրաւիրեց Ազգ. Վահան եւ Անոյշ Շամլեան վարժարանի աշակերտներէն Անտրէ Կիրակոսեանը, Նանօր Շահինեանն ու Քէյթլին Պաղտասարեանը, որոնք դաշնակի վրայ նուագով եւ երգերով ներկայացուցին գեղեցիկ փունջ մը, երգերը՝ դաշնակի վրայ ընկերակցութեամբ իրենց ուսուցչուհիին՝ Սիւզի Փաշանեանի։ Մ. Դարբինեան շնորհակալութեան խօսք ուղղեց վարժարանի տնօրէնութեան ու ուսուցչուհիին, որոնք ընդառաջած էին կազմակերպիչներուն փափաքին եւ պատրաստած գեղարուեստական յայտագիրը, ապա, դասախօսը հրաւիրելէ առաջ՝ հակիրճ կերպով ներկայացուց անոր վաստակը։ Դոկտ. Վ. Մատէնլեան եղած է գիտաշխատող ու համալսարանի դասախօս, իսկ շուրջ 15 տարիէ ի վեր կը ծառայէ Հայկական ոսկրածուծի հիմնարկի յարկին տակ, ունեցած է նաեւ նոր սերունդներուն հայեցի դաստիարակութիւն ջամբելու դերակատարութիւն։

Դոկտ. Վ. Մատէնլեան, պաստառի վրայ նկարներու ցուցադրութեամբ՝ բացատրեց, թէ ինչո՛ւ եւ ինչպէ՛ս կը կատարուի ոսկրածուծի փոխպատուաստումը, իբրեւ միջոց՝ դժուար բուժելի հիւանդութիւններ դարմանելու։ Առանց մտնելու մասնագիտական տեղեկութիւններու ոլորտին մէջ, ան հասկնալի ու մատչելի ձեւով սպառիչ բացատրութիւններ տուաւ մասնաւորաբար արեան որոշ հիւանդութիւններէ տառապողներու մասին, որոնք կը կարօտին փոխպատուաստումի այս յատուկ ձեւին։ Այս նպատակին հասնելու համար, հիւանդները պէտք ունին կամաւոր կերպով արիւն նուիրողներու, որպէսզի անոնց մէջէն գտնուի յարմար անձը՝ փոխպատուաստումի համար։ Շուրջ 20 տարի առաջ կարիքը զգացուած է Հայկական Ոսկրածուծի հիմնարկի ստեղծման, որովհետեւ հայերու համար գրեթէ անկարելի է այլ ժողովուրդներէ պատուաստ նուիրող թեկնածուներ գտնելը։ Հիմնարկը լայնածիր աշխատանք տարած է, ունի շուրջ 29,000 արձանագրեալներ, օգտակար եղած է շուրջ 3500 հիւանդներու, իր աշխատանքը մեծ մասամբ կը կատարէ կամաւորներու միջոցով։ Վերջապէս, ան լուսաբանութիւններ տուաւ հիմնարկին կողմէ կամաւորներու արձանագրութեան աշխատանքին եւ նուիրաբերողներէն ակնկալութիւններու մասին, կոչ ուղղեց, որ շատեր միանան նուիրողներու ցանկին, իբրեւ մարդասիրական ու ազգասիրական գործ, նաեւ, եթէ իրենց շրջանակին մէջ նման պարագաներու մասին իմանան, անյապաղ կապ պահեն հիմնարկին հետ, որպէսզի կարելի ըլլայ արագ բուժում ապահովել։

Դասախօսութեան աւարտէն ետք, հանդիսավարը հրաւիրեց առաջնորդ սրբազանը արտասանելու իր օրհնութեան խօսքը։ Սրբազանը առաջին հերթին դրուատիքով արտայայտուեցաւ դասախօսին տպաւորիչ ու օգտաշատ ներկայացումին մասին, գնահատեց գեղարուեստական յայտագիրին մասնակցած աշակերտները, ապա անդրադարձաւ Հայկական Ոսկրածուծի հիմնարկի ծառայական առաքելութեան, նշելով, որ անիկա ոչ միայն մարդասիրական գործ է, այլ նաեւ՝ աստուածահաճոյ առաքելութիւն, հետեւելով մեր նմանը սիրելու եւ մեր կարելի միջոցներով օժանդակելու պատուիրանին։ Ան յատուկ գնահատանք ուղղեց հիմարկի հիմնադիր դոկտ. Ֆրիտա Ճորտընին ու անոր կողքին նուիրեալ ծառայողներուն, ու կոչ ուղղեց ներկաներուն, որ ընդառաջեն այս հիմնարկի գործակցութեան հրաւէրին։

Վերջապէս, առաջնորդ սրբազանը գնահատանքով արտայայտուեցաւ Տիկնանց օժանդակ մարմինի անդամներուն մասին՝ յիշեցնելով, որ անոնք այս ու նմանօրինակ ձեռնարկներով մասնակից են Ազգային առաջնորդարանի առաքելութեան, ապա նաեւ ողջունեց ներկաները, որոնց շարքին՝ մեր եկեղեցիներու տիկնանց միութիւններու եւ «Օրրան» կազմակերպութեան ներկայացուցիչները։

Աւարտին, առաջնորդը յարգելի դասախօսուհիին նուիրեց բանաստեղծ Ժագ Ս. Յակոբեանի «Յիսուսաբոյր» հատորէն օրինակ մը, նշելով, որ առաջնորդարանին կողմէ արժանացած էր երրորդ տպագրութեան։

Յայտագիրին պաշտօնական բաժինին աւարտէն ետք, ներկաներուն առիթ տրուեցաւ հարցումներով դիմելու դասախօսին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top