Փոմփէօ Խաշոկճիի Հարցը Կը Քննէ Ռիատի Իշխանութեանց Հետ

1017saud

1017saud

ՊՈԼԻՍ, ՌԻԱՏ, «Պի.Պի.Սի.», «Ռոյթըրզ».- Միացեալ Նահանգներու արտաքին գործոց նախարար Մայք Փոմփէօ Հոկտեմբեր 16ին ժամանեց Սէուտական Արաբիա, թագաւոր Սալմանի հետ քննարկելու Պոլսոյ Սէուտական Արաբիոյ հիւպատոսարանին մէջ առեղծուածային կերպով անհետացած ընդդիմադիր լրագրող Ճամալ Խաշոկճիի հարցը:

Փոմփէօ շնորհակալութիւն յայտնեց թագաւորին՝ «Խաշոկճիի անհետացումը մանրամասն եւ թափանցիկ կերպով հետաքննելու հարցով ցուցաբերուած աջակցութեան համար»:

Կ՛ակնկալուի, որ Փոմփէօ Ռիատէն անցնի Թուրքիա, ուր մէկ օր առաջ թուրք իրաւապահներ զննած էին սէուտական հիւպատոսարանը, իսկ Երեքշաբթի օր՝ հիւպատոսին բնակարանը։

Ըստ Թուրք իրաւապահներուն՝ լրագրողը հիւպատոսարանին մէջ սպաննուած է հարցաքննութեան ընթացքին տեղի ունեցած խոշտանգումներուն հետեւանքով: Ռիատ ցարդ կը հերքէ նման պնդումներ։

Այլախոհ լրագրողը, որ նախապէս մօտիկ եղած էր թագաւորական տոհմին, վերջերս սկսած էր քննադատելու յատկապէս թագաժառանգ եւ պաշտպանութեան նախարար Մուհամմատ պըն Սալմանը, որ անոր սպանութեան գլխաւոր մեղսակիցը կը նկատուի շատերու կողմէ։ Խաշոկճի նաեւ դատապարտած էր Եմենի դէմ սէուտական ռազմական գործողութիւնները։ Ան անցեալ տարուան Սեպտեմբերին հեռացած էր Ռիատէն եւ ապաստանած էր Թուրքիա եւ Միացեալ Նահանգներ, ուրկէ կը յղէր արաբական եւ արեւմտեան լրատուամիջոցներուն մէջ լոյս տեսնող իր յօդուածները:

Միւս կողմէ, Գերմանիոյ, Բրիտանիոյ եւ Ֆրանսայի արտաքին գործոց նախարարները միացեալ յայտարարութեամբ մը շեշտեցին, որ Խաշոկճիի անհետացման հարցով յստակ պատասխան կ՛ակնկալեն Սէուտական Արաբիոյ իշխանութիւններէն, նոյն ժամանակ նշելով, որ իրենք կ՛արտայայտեն նաեւ Եւրոմիութեան անդամ երկիրներուն մտահոգութիւններն ու պահանջները: Ըստ յայտարարութեան՝ կարիք կայ անաչառ եւ վստահելի հետաքննութեան, որ պիտի բացայայտէ միջադէպի մեղաւորները եւ ապահովէ անոնց պատիժը:

Մինչ այդ, «Սի.Էն.Էն.» կայանը հաղորդեց, թէ Ռիատ կը պատրաստուի պաշտօնապէս ընդունիլ, որ լրագրողը «սխալմամբ» սպաննուած է հիւպատոսարանին մէջ, որուն համար կարգ մը պաշտօնատարներ պատասխանատու պիտի նկատուին։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top