Գրիգոր Պետրոս Ի. Կաթողիկոս Պատրիարքին Հրաւէրով Եղբայրական Ագապ՝ Հռոմի Քահանայապետական Վարժարանին Մէջ

0000ROME

0000ROME

Հռոմէն Ժագ Քէշիշեան կը հաղորդէ, որ շաբաթ, 13 Հոկտեմբերի յետմիջօրէին, Հռոմի քահանայապետական Լեւոնեան հայ վարժարանին մէջ տեղի ունեցաւ եղբայրական ագապ մը՝ հրաւէրով Տանն Կիլիկիոյ կաթողիկէ հայոց Գրիգոր Պետրոս Ի. կաթողիկոս պատրիարքին:

Անոր ներկայ գտնուեցան բարձրաստիճան հիւրեր՝ սիւնհոդոսական եպիսկոպոսներու ընդհանուր քարտուղար կարտինալ Լորենզօ Պալտիզերի, Սրբադասման խորհուրդի նախագահ կարտինալ Ճովաննի Անճելօ Պեքչու, Արեւելեան եկեղեցիներու խորհուրդի նախագահ կարտինալ Լէոնարտօ Սանտրի, Իտալիոյ եպիսկոպոսաց ժողովի նախագահ կարտինալ Կալթիերօ Պասեթի, մարոնի համայնքի պատրիարք կարտինալ Պշարա Ռայի, քաղդէացւոց կաթողիկէ համայնքի պատրիարք կարտինալ Լուիս Ռաֆայէլ Սագօ, յոյն կաթողիկէ համայնքի պատրիարք Եուսեֆ Ա. Ապսի, Աղեքսանդրիոյ ղպտի կաթողիկէ համայնքի պատրիարք Իպրահիմ Իսահակ Սիտրագի, Պէյրութի լատիններու թեմի պապական նուիրակ Սեզար Եսայեան, Բերիոյ թեմի հայ կաթողիկէ առաջնորդ Պետրոս արք. Միրիաթեան, Թեհրանի քաղդեացւոց կաթողիկէ թեմի առաջնորդ Ռամզի արք. Կարմու, Դամասկոսի հայ կաթողիկէ թեմի պատրիարքական փոխանորդ Յովսէփ եպս. Առնաութեան, քահանայապետական Լեւոնեան վարժարանի մեծաւոր Նարեկ Ծ. վրդ. Նաամոյեան, Վատիկանի մէջ ասորի կաթողիկէ պատրիարքի ներկայացուցիչ Ժորժ Ծ. վրդ. Մասրի, վարդապետներ եւ վարժարանին ժառանգաւորները:

Ֆրանսերէնով խօսք առաւ Գրիգոր Պետրոս Ի. կաթողիկոս պատրիարքը՝ կրկնելով սրբազան քահանայապետին խօսքը. «Եկեղեցին երկու թոքերով կը շնչէ՝ Արեւելքով եւ Արեւմուտքով», ապա ան աւելցուց. «Մենք՝ իբրեւ արեւելեան ժողովուրդ, որ Ցեղասպանութենէն ետք շատ բաներ կորսնցուցինք եւ կրցանք կրկին անգամ մեր ոտքերուն վրայ կենալ ու մեր գոյութիւնը փաստել, այսօր կը տեսնենք, թէ ինչպէ՛ս պատմութիւնը կը կրկնուի Իրաքի եւ Սուրիոյ մէջ: Հետեւաբար մեր հաւատքի վկայութեամբ պիտի փորձենք յաղթահարել ամէն չարիք»:

Այնուհետեւ հոգեւոր տէրը անդրադարձաւ կարտինալ Աղաճանեանին՝ ըսելով. «Մենք կը հաւատանք, որ կարտինալ Գրիգոր Պետրոս Աղաճանեան սուրբ մըն է, եւ ասոր հիման վրայ կը փորձենք շուտով սրբադասել զինք, որպէսզի օրինակ հանդիսանայ մեր եկեղեցւոյ պատմութեան եւ հաւատքին»:

Եղբայրական ջերմ մթնոլորտի աւարտին, կարտինալ Սանտրի խօսք առաւ եւ բոլորին անունով գոհաբանութիւն եւ շնորհակալութիւն յայտնեց ամենապատիւ հոգեւոր տիրոջ, եպիսկոպոսներուն, վարժարանի մեծաւոր հօր եւ ժառանգաւորներուն՝ այս գեղեցիկ առիթին համար:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top