Երեւանի 2800ամեակի Հանդիսաւոր Նշում

1022yerevan2800

1022yerevan2800

Կիրակի, 21 Հոկտեմբերին տեղի ունեցաւ Երեւանի հիմնադրութեան 2800ամեակի նշումը՝ այլազան ձեւի նախաձեռնութիւններով: Այս առիթով Երեւանի քաղաքապետը եւ երկրին քաղաքական ղեկավարութիւնը յղեցին իրենց շնորհաւորական ուղերձները:

Հայաստանի Հանրապետութեան նախագահ Արմէն Սարգսեան շնորհաւորեց Երեւանի 2800ամեակը:

Նախագահը իր շնորհաւորանքին մէջ նշեց. «Շնորհաւոր 2800ամեայ յոբելեանդ, սիրելի՛ Երեւան:

Շնորհաւոր բոլորիս տօնը, սիրելի՛ երեւանցիներ, սիրելի՛ հայրենակիցներ՝ Հայաստանի, Արցախի եւ արտերկրի մէջ:

Երեւանը կը սիրենք անկախ մեր ծննդեան վայրէն, անկախ մեր ապրելու վայրէն:

Երեւանը մեր մէջ է, ինչ որ մեզ կը յուզէ ու կը ջերմացնէ:

Երեւանը մեր ներկան է՝ երէկուան յիշողութեամբ ու վաղուան վստահութեամբ:

Երեւանը յաւերժական պատմութիւն է ու յաւերժական երիտասարդութիւն:

Սրտցաւ ըլլանք մեր անցեալի ժառանգութեան եւ հոգատար՝ մեր ապագային հանդէպ:

Հաւատարիմ մնանք Երեւանին:

Ծնունդդ շնորհաւոր, Երեւա՛ն, իմ սէ՛ր»:

Երեւանի քաղաքապետ Հայկ Մարութեան, իր կարգին, շնորհաւորական ուղերձ յղեց Էրեբունի-Երեւանի հիմնադրման 2800ամեակին առիթով: Ուղերձին մէջ կը նշուի հետեւեալը.

«Սիրելի՛ երեւանցիներ, կը շնորհաւորեմ ձեզ Երեւանի հիմնադրման 2800ամեակին առիթով: Այս ո՛չ միայն Երեւանի բնակիչներուն, այլ նաեւ տօնն է բոլոր այն մարդոց, որոնք կը սիրեն Երեւանը եւ զայն կը նկատեն իրենց հարազատ վայրը: Չէ որ Երեւանը ամբողջ հայութեան մայրաքաղաքն է: Կը փափաքիմ, որ մեր Երեւանը, հակառակ իր պատկառելի տարիքին, ըլլայ միշտ երիտասարդ եւ ուժերով լի քաղաք: Այս օրերուն շնորհաւորանքներ կը ստանամ աշխարհի բազմաթիւ անկիւններէ. կը շնորհաւորեմ ձեզ, սիրելի՛ երեւանցիներ: Կ՛ուզեմ յատկանշել, որ այսօր կանուխ առաւօտեան կը սկսին մեր տօնական միջոցառումները, Երեւանի տարբեր հատուածներու մէջ, պիտի իրագործուին զանազան հանդիսութիւններ, նորաձեւութեան ցուցադրութիւն, թեմատիկ բեմեր, հեծանուավազք, որուն մեկնարկին պիտի մասնակցիմ նաեւ ես: Ամբողջ օրը պիտի շրջիմ մայրաքաղաքին մէջ, պիտի հանդիպիմ ձեզի, պիտի շնորհաւորենք միմեանց ու միասին պիտի տօնենք մեր քաղաքի յոբելեանը: Համոզուած եմ, որ շատ յիշարժան ու յագեցած օր պիտի անցընենք: Երեկոյեան ժամը 7։30ին Հանրապետութեան հրապարակին վրայ տեղի պիտի ունենայ գլխաւոր ձեռնարկը՝ տօնական կալա համերգը, որ, յոյսով եմ, դրական լիցքեր ու հաճելի ակնթարթներ կը պարգեւէ ձեզի: Տօնական երեկոն յագեցած պիտի ըլլայ օրուան խորհուրդով ընտրուած երեւանեան երաժշտութեամբ, նաեւ պատմական անդրադարձով, Երեւանի կենսագրութիւնը եւ մեր օրերու մայրաքաղաքը ներկայացնող բեմականացումներով, իսկ աւարտին՝ հրավառութիւն:

Անգամ մը եւս սրտանց կը շնորհաւորեմ, սիրելի՛ երեւանցիներ, կը սիրեմ ձեզ, բոլորիս՝ բարձր տրամադրութիւն»։

Հայաստանի Հանրապետութեան վարչապետի պաշտօնակատար Նիկոլ Փաշինեան եւս շնորհաւորեց Երեւանի տօնը: «Շնորհաւոր տօնդ, Երեւա՛ն: Կը սիրեմ քեզ», «Ֆէյսպուք»ի իր էջին վրայ գրած է Փաշինեան եւ տեղադրած տեսահոլովակ մը, որուն մէջ խորհրդարանի ներկայիս գործող կազմի ընտրութիւններուն մասնակցած «Ելք» դաշինքի անդամները կը կատարեն «Երեւան-Էրեբուն»ի երգը:

Հայաստանի Ազգային ժողովի նախագահ Արա Բաբլոյեան նոյնպէս շնորհաւորական ուղերձ մը յղեց Երեւանի հիմնադրման 2800րդ տարեդարձին առիթով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top