ԹԱՐԳՄԱՆՉԱՑ ՏՕՆԻ ՇԱԲԱԹԱՎԵՐՋԻՆ՝ Հիւսիսային Ամերիկայի Եւ Արեւմտեան Թեմի Յոբելենական Հանդիսութիւն Սան Ֆրանսիսքոյի Մէջ

Գռուզեան-Զաքարեան-Վասպուրական վարժարանի աշակերտներ եւ անձնակազմը պատուոյ հիւրերուն հետ

ՍԱՆ ՖՐԱՆՍԻՍՔՕ.- Ս. Թարգմանչաց տօնին շաբաթավերջը Սան Ֆրանսիսքոյի հայ համայնքը ապրեցաւ յիշատակելի երեք օրեր, մանաւանդ որ այս տարուան տօնախմբութիւնը կը զուգադիպէր Հիւսիսային Ամերիկայի մէջ Մեծի Տանն Կիլիկիոյ կաթողիկոսութեան հովանաւորութիւնը վայելող թեմի հիմնադրութեան 60ամեակին եւ Արեւմտեան թեմի հիմնադրութեան 45ամեակին։ Այս առիթով կազմակերպուած հանդիսութիւնները կը վայելէին առաջնորդ Մուշեղ արք. Մարտիրոսեանին հովանաւորութիւնը, նախագահութիւնն ու ներկայութիւնը։

Սրբազանը Սան Ֆրասնսիքօ ժամանեց Ուրբաթ, 12 Հոկտեմբերին, եւ առաջին հերթին այցելեց Ազգային Գռուզեան-Զաքարեան-Վասպուրական վարժարանը, ուր զինք դիմաւորեցին աշակերտներն ու դաստիարակները։ «Խաչատուրեան» Հայ կեդրոնի «Սարոյեան» սրահին մէջ տեղի ունեցաւ Ս. Թարգմանչաց տօնակատարութիւն, պատրաստուած աշակերտներուն եւ ուսուցչական կազմին կողմէ։ Վարժարանի տնօրէնուհի Կրէյս Անտոնեան, բարի գալուստի խօսք արտասանելով, ուրախութիւն յայտնեց սրբազան հօր այցելութեան համար, որ տեղի կ՛ունենար այս իւրայատուկ ազգային-կրօնական տօնին առիթով։ Աշակերտները ասմունքներով ու երգով ծաղկեցուցին հանդէսը, նաեւ իրենց ձեռքերով պատրաստուած արուեստի աշխատանք մը նուիրեցին սրբազանին։

Խօսք առաւ Ս. Գրիգոր Լուսաւորիչ եկեղեցւոյ հոգեւոր հովիւ Պարոյր վրդ. Շէրնէզեան, որ բարի գալուստ մաղթեց սրբազան հօր եւ շնորհաւորեց զայն՝ Ս. Թարգմանչաց վարդապետներու տօնին առիթով։ Ան հրաւիրեց սրբազանը, որպէսզի իր պատգամը եւ օրհնութիւնը բաշխէ աշակերտներուն, ծնողներուն եւ ուսուցչական կազմին։

Առաջնորդը յուշանուէրներ նուիրեց վարժարանին մէջ հայերէն, հայոց պատմութիւն, մշակոյթ եւ գրականութիւն դասաւանդող տասը ուսուցիչներու եւ շնորհաւորեց բոլորը՝ այս տօնին առիթով եւ վեր առաւ Ս. Թարգմանչաց տօնին կարեւորութիւնը մեր կեանքին մէջ։ Ան աշակերտները յորդորեց ուխտել, որ միշտ տէր պիտի կանգնին հայ լեզուին եւ պատմութեան, զայն գործածելով եւ պահելով։ Ան «Պահպանիչ» աղօթքով օրհնեց վարժարանը, տնօրէնութիւնը, ուսուցչական կազմը, աշակերտութիւնը եւ ծնողները։

 

ՅՈԲԵԼԵՆԱԿԱՆ ՀԱՆԴԻՍՈՒԹԻՒՆԸ

 

Երեկոյեան, նախագահութեամբ առաջնորդին եւ կազմակերպութեամբ Ս. Գրիգոր Լուսաւորիչ եկեղեցւոյ հոգեւոր հովիւին, հոգաբարձութեան եւ տիկնանց միութեան, «Սարոյեան» սրահին մէջ տեղի ունեցաւ հանդիսութիւն մը՝ նուիրուած Հիւսիսային Ամերիկայի թեմի 60ամեակին եւ Արեւմտեան թեմի 45ամեակին։ Ներկայ էր Ազգային վարչութեան անդամներէն Կարպիս Պէզճեան։

Հանդիսութիւնը սկսաւ Ս. Թարգմանչաց վարդապետաց յիշատակի արարողութեամբ։ Հանդիսավարը՝ Սեւակ սրկ. Պատոյեան բարի գալուստ մաղթեց առաջնորդին եւ ներկաներուն։ Ողջոյնի խօսք արտասանեց հոգաբարձութեան ատենապետ Ռոստոմ Այնթապլեան, որ իւրայատուկ եւ պատմական նկատելով երեկոն, յիշեց բոլոր այն անձնաւորութիւնները, որոնք ներդրում ունեցան թեմի կազմաւորման եւ զարգացման մէջ։ Ան երախտագիտութեան յատուկ խօսք ուղղեց սրբազանին, որ ստանձնած է թեմի ծառայութեան մեծ բաժինը։

Բանախօսն էր Ֆրեզնոյէն հրաւիրուած, երկար տարիներու եկեղեցական ու թեմական կեանքի մէջ ներդրում ունեցած Մարք Ա. սրկ. Շիրինը։ Ան ընդհանուր գիծերու մէջ ներկայացուց թեմի պատմութեան ծալքերն ու կարեւորութիւնը։

Յանուն Ազգային վարչութեան, Կարպիս Պէզճեան շնորհաւորանքի խօսք մը արտասանեց եւ վկայեց, թէ որքան աշխատանքներ կ՛իրականացուին թեմին մէջ։

Գեղարուեստական յայտագիրը ճոխ էր ասմունքով, կատարողութեամբ՝ Անժելա Կիրակոսեանի, եւ երգերով՝ կատարողութեամբ Գռուզեան-Զաքարեան-Վասպուրական վարժարանի աշակերտներուն, նուագակցութեամբ վաստակաշատ երաժիշտ՝ Սեդա Գիզիրեանի։

Սրտի խօսքը փոխանցեց հայր Պարոյրը, որ այս տօնը կարեւոր նկատեց «ոչ միայն տօնելու եւ անցնելու» տրամադրութեամբ, այլ մանաւանդ ներշնչուելու եւ գործի լծուելու նախանձախնդրութեամբ։ Հայր սուրբը շնորհակալութիւն յայտնեց առաջնորդին, իր տարիներու անսակարկ ծառայութեան համար։ Եկեղեցւոյ հովիւը, հոգաբարձութիւնը եւ տիկնանց միութիւնը արուեստի գործ մը՝ իբրեւ յուշանուէր յանձնեցին սրբազան հօր։

Հանդիսութեան աւարտին, առաջնորդը փոխանցեց իր պատգամը՝ ըսելով. «Այսօր ուխտի օր է, ուխտի վերանորոգման օր, յիշելու օր, յիշատակումի օր, վերանորոգումի ու վերանորոգուելու օր, վերընծայումի եւ վերընծայուելու օր»։ Ապա, անդրադառնալով զոյգ յոբելեաններուն՝ յորդորեց անխոնջ ծառայութիւնը շարունակել աննկուն կամքով, տոկուն հաւատքով, ծով համբերութեամբ եւ ապագայատեսիլ յոյսով։ «Թարգմանիչ վարդապետներու աւանդին իբրեւ հաւատարիմ ժառանգորդները եւ Մեծի Տանն Կիլիկիոյ կաթողիկոսութեան նուիրեալ զօրակիցները, եկէ՛ք ներշնչուինք Թարգմանչաց աւանդով, մեր հայրապետներու տեսիլքով եւ ծառայական առաքելութեամբ, վերանորոգուինք եւ հաւատարիմ տնտեսներ ըլլանք անոնց ժառանգութեան եւ աւանդին», ըսաւ առաջնորդը՝ յատուկ գնահատանք ուղղելով բանախօսին, գնահատեց հայր սուրբը, հոգաբարձութիւնը եւ տիկնանց միութիւնը այս գեղեցիկ երեկոյին համար, օրհնեց աշակերտները եւ դպրոցի բոլոր նուիրեալները։

Հանդիսութիւնը աւարտին հասաւ սրբազան հօր «Պահպանիչ» աղօթքով եւ «Կիլիկիա»ի երգեցողութեամբ։ Ապա, ներկաները վայելեցին տիկնանց միութեան պատրաստած հիւրասիրութիւնը։

 

ՅՈԲԵԼԵՆԱԿԱՆ ԸՆԴՈՒՆԵԼՈՒԹԻՒՆ

 

Շաբաթ յետմիջօրէին, Սան Ֆրանսիսքոյի հայ համայնքի նուիրեալներէն՝ տոքթ. եւ տիկին Յակոբ եւ Սիւզի Գույումճեանները, իրենց բնակարանին մէջ հիւրընկալեցին եկեղեցւոյ համայնքի զաւակները, զոյգ յոբելեաններուն առիթով. ընդունելութիւնը կազմակերպուած էր ի պատիւ առաջնորդ սրբազան հօր։

Հիւրընկալ ամոլին կողմէ բարի գալուստ մաղթեց տոքթ. Յակոբ Գույումճեան, որ շնորհակալութիւն յայտնեց այս առիթը իրենց շնորհուած ըլլալուն համար։ Ան յաջողութիւն մաղթեց եկեղեցւոյ բոլոր նուիրեալներուն եւ առաջնորդին՝ յառաջիկայ բոլոր ծրագիրներուն մէջ։

Հոգաբարձութեան ատենապետը եւս բարի գալուստ մաղթեց բոլորին եւ շնորհակալութիւն յայտնեց հիւրընկալ ամոլին՝ այս նախաձեռնութեան համար։ Ան յատկապէս անդրադարձաւ սրբազան բծախնդիր եւ նուիրեալ աշխատանքին, որուն համար եկեղեցւոյ անունով երախտագիտութիւնը յայտնեց։

Հոգեւոր հովիւը, իր կարգին, անդրադարձաւ առաջնորդին երկարամեայ ծառայութեան եւ շնորհակալութիւն յայտնեց, որ արբազանին նախաձեռնութեամբ ինք եւս մաս կը կազմէ թեմի պատմութեան եւ ծառայութեան։ Ան յոյս յայտնեց, որ բոլոր ներկաները իրենց մեծ կամ փոքր բաժին կը բերեն եկեղեցւոյ ծառայական կեանքին։

Սրբազանը շնորհակալութիւն յայտնեց հիւրընկալ ամոլին, հայր սուրբին, հոգաբարձութեան եւ տիկնանց միութեան, որոնք այս գեղեցիկ երեկոն կազմակերպեցած էին։ Սրբազանը վերանորոգուելու եւ առաւել յանձնառու դառնալու պատգամ փոխանցեց ներկաներուն, նշեց, թէ որքան գոհունակ է, որ իր ծառայական կեանքի հսկայ բաժինը նուիրած է Արեւմտեան թեմի հոգեւոր եւ ազգային կեանքին։ Առաջնորդը օրհնեց հիւրընկալ ամոլը, ներկաներն ու եկեղեցւոյ բոլոր անդամները եւ ընդգծեց, որ այսօր առիթ եւ հրաւէր է վերանորոգուելու հաւատքով, ներշնչուելու մեր նախնիներուն ժառանգութեամբ, եւ ուխտելու տոգորուիլ ծառայութեան ոգիով, ի խնդիր պայծառ ապագայի մը կերտումին։

 

Ս. ՊԱՏԱՐԱԳ

 

Կիրակի, 14 Հոկտեմբերին, առաջնորդը Ս. պատարագ մատուցեց Ս. Գրիգոր Լուսաւորիչ եկեղեցւոյ մէջ։ Խնդրանօք եկեղեցւոյ հոգեւոր հովիւին եւ հոգաբարձութեան, դպրաց կարգ ստացան եկեղեցւոյ մէջ ծառայող 18 պատանիներ եւ պարմանուհիներ, ձեռամբ առաջնորդ սրբազան հօր։

Քարոզէն առաջ, ընծայեալները Ս. խորան բարձրացան, խարտաւիլակութեամբ հայր սուրբին, ու ստացան դպրութեան չորս աստիճանները։ Սրբազանը, օրհնելով նորոգ ձեռնադրուած դպիր-դպրուհիները, ուղղեց իր պատգամը։ Ան ողջունեց եւ շնորհաւորեց եկեղեցւոյ մեծ ընտանիքը ու յորդորեց ձեռնադրեալներն ու անոնց ծնողները, որպէսզի ուխտեն մնալ հաւատարիմ իրենց ծառայութեան մէջ։ Առաջնորդը յիշեց Թարգմանիչ վարդապետները, որոնք մեծ պատգամ մը ունին մեր բոլոր սերունդներուն, ապա կանգ առաւ օրուան աւետարանական ընթերցումին վրայ, թէ ինչպէս այրի կինը իր ամբողջ ունեցածը դրաւ տաճարի գանձանակին մէջ, ու հաւատացեալները յորդորեց նոյն նուիրումը ցուցաբերելու եկեղեցւոյ հանդէպ։ Սրբազանը շնորհաւորեց ծնողներն ու մեծ ծնողները՝ իրենց զաւակներուն ու թոռներուն ձեռնադրութեան առիթով, իսկ Պատարագի աւարտին, վկայագիրներ յանձնեց 18 ընծայեալներուն։

 

ՍԻՐՈՅ ՍԵՂԱՆ

 

Արարողութենէն ետք, հաւատացեալները հաւաքուեցան եկեղեցւոյ «Վասպուրական» սրահին մէջ, ուր ձեռնադրեալներուն ծնողները պատրաստած էին սիրոյ սեղան, ի պատիւ առաջնորդին։ Հոգեւոր հովիւն ու հոգաբարձութիւնը երախտագիտութիւն յայտնեցին սրբազան հօր, որ յանձն առաւ ձեռնադրել եկեղեցւոյ փոքր սպասաւորները, ինչպէս նաեւ շնորհակալութիւն յայտնեցին ծնողներուն, ճաշկերոյթի կազմակերպման համար։

Աւարտին, սրբազանը յիշեց, թէ 50 տարիներ առաջ, ինք եւս իբրեւ դպիր ընծայուեցաւ Ս. խորանին, Անթիլիասի Դպրեվանքին մէջ, եւ մաղթեց, որ դպիրները իրենց ծառայութիւնը կը շարունակեն բազմաթիւ տարիներ։ Ան նաեւ ուրախութիւն յայտնեց, որ պտղալից եւ արդիւնաբեր շաբաթավերջ մը ունեցաւ Սան Ֆրանսիսքոյի հայ համայնքին հետ, որուն համար բարձր գնահատեց եկեղեցւոյ բոլոր մարմիները։

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top