«Որպէս Նախարար Ճիշդ Կը Համարէ՞ք, Որ Ընտրական Օրէնսգիրքի Նախագիծը 24 Ժամուան Մէջ Ընդունուի. Արմէն Ռուստամեան՝ Արտակ Զէյնալեանին

 

ԵՐԵՒԱՆ.- Հայաստանի Հանրապետութեան Ազգային ժողովը, կառավարութեան առաջարկով՝ գումարեց արտակարգ նիստ մը, որուն օրակարգը եղաւ «Հայաստանի Հանրապետութեան Ընտրական օրէնսգիրք»՝ Հայաստանի Հանրապետութեան սահմանադրական օրէնքին մէջ փոփոխութիւններ եւ լրացումներ կատարելու մասին օրէնքի նախագիծը:

Արտակ Զէյնալեան ներկայացուց նախագիծը՝ յայտնելով, որ կառավարութիւնը Ազգային ժողովին ներկայացուցած է 22 Հոկտեմբեր 2018ին գումարուած Ազգային ժողովի արտակարգ նիստի օրակարգային հարցին երկրորդ ընթերցումով քննարկումը կազմակերպելու առնչութեամբ որոշումի նախագիծը:

«Նախագիծով կ՛առաջարկուի առաջին ընթերցումով անոր ընդունումէն ետք 24 ժամեայ համակարգով կազմակերպել երկրորդ ընթերցում: Նախագիծի ծրարին շուրջ գրաւոր առաջարկներու եւ գլխադասային յանձնաժողովի եզրակացութեան համար կ՛առաջարկուի սահմանել 3ական ժամ», ըսաւ Զէյնալեան:

ՀՅԴի պատգամաւոր Արմէն Ռուստամեան, օգտուելով հարցնելու իր իրաւունքէն՝ նախարարի պաշտօնակատարին հարցուց, թէ արդեօք տրամաբանական կը համարէ՞, որ սահմանադրական օրէնքը, Ընտրական օրէնսգիրքը ընդունուի շտապ կերպով:

«Այսօր առաջին ընթերցումը կը կատարուի, վաղը՝ երկրորդը, երբ ակնյայտ կը դառնայ, որ բազմաթիւ հարցեր կան եւ համաձայնութեան գալու հարց ալ կայ: Ես ընդհանրապէս չեմ յիշեր, որ Ընտրական օրէնսգիրքը երբեք այսպիսի հապշտապութեամբ որեւէ Ազգային ժողովի մը մէջ ընդունուած ըլլայ, երբ Ընտրական օրէնսգիրքին մէջ տեղի կ՛ունենան արմատական փոփոխութիւններ: Կ՛ուզէի լսել ձեր կարծիքը՝ որպէս արդարադատութեան նախարար, սահմանադրական օրէնքը այսպէս փոխելը ճի՞շդ է», հարցուց Ռուստամեան:

Արդարադատութեան նախարարի պաշտօնակատար Զէյնալեան ըսաւ, որ այլ՝ սովորական պայմաններու մէջ համաձայն կը գտնուէր Ռուստամեանի հետ, եւ թէ Ընտրական օրէնսգիրքը եւ որեւէ օրէնսդրական գործ նախընտրելի է աւելի երկար քննարկել, ձգել, որ անիկա առաւել հասուննայ եւ ընդունուի՝ ըստ կարելւոյն անթերի կերպով, յատկապէս Ընտրական օրէնսգիրքը:

«Սակայն երկրին մէջ իրավիճակը ֆորսմաժորային (իրավիճակներու արագ փոփոխութիւն) է, եւ այս շրջագիծին մէջ է, որ այսպիսի լուծում առաջարկուած է: Ես ձեզի հետ, ընդհանուր առմամբ, համաձայն եմ, բայց սովորական պայմաններու պարագային, անոր համար ալ կառավարութիւնը այսպիսի լուծում կ՛առաջարկէ», ըսաւ Զէյնալեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top