Նիկոլ Փաշինեան Լիբանան Տուած Իր Աշխատանքային Այցելութեան Սկսաւ Հանդիպելով Իշխանութեան Երեք Պետերուն Հետ

1022pashinian-aoun

1022pashinian-aoun

Հայաստանի Հանրապետութեան վարչապետի պաշտօնակատար Նիկոլ Փաշինեանի գլխաւորած պատուիրակութիւնը 20 Հոկտեմբերին երկօրեայ աշխատանքային այցելութեամբ հասաւ Լիբանան եւ հանդիպում ունեցաւ Լիբանանի նախագահ զօր. Միշել Աունի, վարչապետ Սաատ Հարիրիի եւ խորհրդարանի նախագահ Նեպիհ Պըրրիի հետ: Կէսօրէն առաջ ժամը 11ին, նախագահ Աունի հետ ունեցած տեսակցութեան ընթացքին երկկողմանի համաձայնութիւն գոյացաւ երկու բարեկամ երկիրներուն միջեւ գոյութիւն ունեցող յարաբերութիւններու առաւել սերտացման ուղղութեամբ աշխատանք տանելու, առաւել աշխուժացնելու աշխատանքը կառավարական միացեալ յանձնախումբերուն՝ տարբեր բնագաւառներու մէջ:

Նախագահ Աուն ողջունեց վարչապետի պաշտօնակատար Փաշինեանի Լիբանան այցելութիւնը եւ շնորհաւորեց զայն՝ նախորդ շաբաթ Երեւանի մէջ գումարուած Ֆրանսախօս երկիրներու կազմակերպութեան 17րդ վեհաժողովի յաջողութեան համար, շնորհակալութիւն յայտնելով այն ջերմ ընդունելութեան համար, որուն արժանացաւ Լիբանանի պատուիրակութիւնը Հայաստանի մէջ կեցութեան օրերուն: Ան դրուատեց Լիբանանի եւ Հայաստանի սերտ յարաբերութիւնները, յատկապէս ՖԻՆԻՒԼի միջազգային խաղաղապահ ուժերու շարքերուն մաս կազմող հայ խաղաղապահ ուժերուն առաքելութիւնը: Նախագահ Աուն նաեւ յատուկ կերպով անդրադարձաւ այն կարեւոր եւ ազդու դերակատարութեան, որ ունին լիբանանահայերը Լիբանանի քաղաքական եւ տնտեսական բնագաւառներուն մէջ, մանաւանդ որ անոնք կը հանդիսանան Լիբանանն ու Հայաստանը իրար կապող կամուրջ մը:

1022pashinian-Berri

Լիբանանի նախագահը շեշտը դրաւ նաեւ երկու ժողովուրդներուն ապրած արհաւիրքներուն նմանութեան վրայ, երբ հայութիւնը ենթարկուեցաւ ահաւոր Ցեղասպանութեան, իսկ լիբանանցի ժողովուրդը՝ սովի, երկրի շրջափակման իբրեւ հետեւանք՝ աւելցնելով, որ երկու ոճիրները գործողը նոյն ենթական էր: Նախագահ Աուն նաեւ անդրադարձաւ երկու երկիրներուն միջեւ կնքուած համաձայնութիւններուն կարեւորութեան՝ աւելցնելով, որ պէտք է իրենց լրումին հասցուին անոնցմէ այն, որ պատրաստ է, սակայն ցարդ չէ ստորագրուած: Ապա ան խօսեցաւ Նիւ Եորքի մէջ վարչապետի պաշտօնակատարին ներկայացուած լիբանանեան նախաձեռնութեան մասին՝ հիմնելու «Մարդու հանդիպումի եւ երկխօսութեան» ակադեմիա՝ յոյս յայտնելով, որ Հայաստան կ՛ըլլայ առաջիններէն նման հիմնարկի մը հաստատման համաձայնութիւնը ստորագրող:

Հայաստանի վարչապետի պաշտօնակատար Նիկոլ Փաշինեան շնորհակալութիւն յայտնեց նախագահ Աունին՝ զինք ընդունելու եւ Ֆրանսախօս երկիրներու կազմակերպութեան 17րդ վեհաժողովին մասնակցութեան համար, ինչպէս նաեւ հաստատեց, որ Լիբանան շատ կարեւոր դեր ունի այդ կազմակերպութեան մէջ: Ան դիտել տուաւ, որ Լիբանանի եւ Հայաստանի միջեւ յարաբերութիւններուն աւելի թափ պէտք է տալ, յատկապէս տնտեսական բնագաւառին մէջ, ինչպէս նաեւ համապատասխան նախարարութիւններուն միջեւ կապերը սերտացնել:

Փաշինեան, իր կարգին հաստատեց, որ իր երկիրը կողմնակից է լիբանանեան նախաձեռնութեան՝ «Մարդու հանդիպումի եւ երկխօսութեան» ակադեմիա հիմնելու, մանաւանդ որ անիկա մշակոյթներու եւ կրօններու միջեւ երկխօսութեան դուռ կրնայ բանալ: Ան նաեւ շեշտեց, որ Հայաստան պիտի շարունակէ մաս կազմել Լիբանանի հարաւը տեղակայուած ՖԻՆԻՒԼի միջազգային խաղաղապահ ուժերու շարքերուն՝ կայունութեան ու ապահովութեան հաստատման ի խնդիր՝ աւելցնելով, որ Հայաստանի պաշտպանութեան նախարարը հարաւ պիտի այցելէ այս զօրակցութեան ամրապնդումը հաստատելու համար:

Նիկոլ Փաշինեան նաեւ լուսարձակի տակ առաւ լիբանանցի եւ հայ ժողովուրդներուն դարաւոր յարաբերութիւնները, որոնց մէջ կան հասարակաց բազմաթիւ կէտեր՝ յոյս յայտնելով, որ լիբանանանեան-հայկական կառավարական միացեալ յանձնախումբերը մօտիկ ապագային կը կարենան ժողովներ գումարել, սերտել համագործակցութեան կարելիութիւնները եւ համապատասխան գործնական որոշումներ կու տան:

Ապա Փաշինեան եւ Աուն անդրադարձան շրջանային կացութեան եւ վերջին զարգացումներուն: Աւարտին, Նիկոլ Փաշինեան ողջոյնի գիր մը արձանագրեց Պաապտայի պատուոյ հիւրերու յատուկ մատեանին մէջ:

1022pashiniaharirir

Լիբանանի Առաջին տիկին Նատիա Աուն, իր կարգին ընդունեց վարչապետ Փաշինեանի կողակիցը՝ Աննա Յակոբեանը եւ շնորհակալութիւն յայտնեց անոր Հայաստանի մէջ իրենց նկատմամբ ցուցաբերուած ջերմ ընդունելութեան համար: Անոնք նաեւ լուսարձակի տակ առին երկկողմանի արժէքաւոր յարաբերութիւնները, որոնք պատմական անցեալ ունին: Աննա Յակոբեան ուրախութիւն յայտնեց Լիբանան գտնուելուն համար եւ դրուատեց լիբանանցի ժողովուրդը, անդրադարձաւ Լիբանանի մէջ հայութեան դերակատարութեան: Ապա անոնք զրուցեցին մարդկային եւ ընկերային տարբեր նիւթերու մասին:

Նախագահ Աունի հետ հանդիպումէն ետք, Նիկոլ Փաշինեան հանդիպում ունեցաւ Լիբանանի խորհրդարանի նախագահ Նեպիհ Պըրրիի հետ:

Շնորհակալութիւն յայտնելով ջերմ ընդունելութեան համար՝ Փաշինեան բարձր գնահատեց Պըրրիի ներդրումը հայ-լիբանանեան բարեկամութեան ամրապնդման ուղղուած նախաձեռնութիւններու իրականացման գործին մէջ:

Պըրրի, իր կարգին ողջունեց Նիկոլ Փաշինեանի այցելութիւնը Լիբանան՝ նշելով, որ անիկա կարելիութիւն պիտի տայ նոր թափ հաղորդելու երկու երկիրներու բարեկամական  յարաբերութիւններուն:

Զրուցակիցները կարեւոր նկատեցին լիբանանահայ համայնքի դերակատարութիւնը՝ իբրեւ երկու երկիրները կապող եւ յարաբերութիւնները ամրապնդող օղակ: Փաշինեան նշեց, որ բարեկամ Լիբանանը թէ՛ պատմութեան ողբերգական պահերուն եւ թէ այսօր Հայաստանի կողքին է՝ իր նպաստը բերելով Ցեղասպանութեան յանցագործութեան դատապարտման:

Պըրրի, իր հերթին բարձր գնահատեց Լիբանանի հայերուն դերակատարութիւնը եւ ներդրումը երկրի զարգացման գործին մէջ: «Մեր եղբայր հայերը ներկայացուած են Լիբանանի խորհրդարանին ու կառավարութեան մէջ եւ իրենց կարեւոր նպաստը կը բերեն Լիբանանի յառաջընթացին», ըսաւ ան:

Շրջանային անվտանգութեան ապահովման ուղղութեամբ շարունակական ջանքերու շրջագիծին մէջ, Փաշինեան եւ Պըրրի կարեւոր նկատեցին Հայաստանի մասնակցութիւնը Հարաւային Լիբանանի մէջ ՖԻՆԻՒԼի ուժերու խաղաղապահ առաքելութեան:

Նոյն օրը, կէսօրէն ետք ժամը 1:30ին, Նիկոլ Փաշինեան հիւրը եղաւ Լիբանանի վարչապետ Սաատ Հարիրիի, որուն հետ քննարկեց տեղական, միջազգային մակարդակի վրայ արձանագրուած զարգացումները, ինչպէս նաեւ երկու երկիրներուն միջեւ յարաբերութիւնները: Հանդիպումին ներկայ գտնուեցան նաեւ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի եւ զբօսաշրջութեան նախարար Աւետիս Կիտանեան:

Նիկոլ Փաշինեան շնորհակալութիւն յայտնեց Սաատ Հարիրիին ջերմ ընդունելութեան համար եւ ըսաւ. «Ասիկա իմ առաջին այցելութիւնն է եղբայրական Լիբանան՝ հնագոյն քաղաքակրթութիւններու պատմութեամբ լի երկիր մը: Վստահ եմ, որ այս այցելութիւնը լաւագոյնս պիտի նպաստէ տարբեր ոլորտներու մէջ երկկողմանի համագործակցութեան օրակարգային հարցերու շուրջ քննարկման: Անշուշտ, մեր երկիրներուն միջեւ կապերու խորացման եւ ամրապնդման գործին մէջ իր զգալի ներդրումը ունեցած է նաեւ ձեր հայրը՝ հանգուցեալ Ռաֆիք Հարիրին, որ Հայաստանի մեծ բարեկամն էր»:

Վարչապետ Սաատ Հարիրի նշեց, որ Լիբանանը բարձր կը գնահատէ բարեկամ Հայաստանի հետ համագործակցութիւնը եւ շահագրգռուած է անոր հետագայ ամրապնդումով: Ան կարեւոր նկատեց լիբանանահայ համայնքի դերակատարութիւնը Լիբանանի զարգացման, ինչպէս  նաեւ հայ-լիբանանեան կապերու խորացման գործին մէջ:

Նիկոլ Փաշինեան եւ Սաատ Հարիրի գոհունակութեամբ արձանագրեցին, որ երկու երկիրներուն միջեւ գոյութիւն ունի քաղաքական երկխօսութեան բարձր մակարդակ եւ պէտք է աշխուժօրէն աշխատիլ տնտեսական բաղադրիչը եւս այդ նշաձողին հասցնելու ուղղութեամբ: Այս առումով, զրուցակիցները կարեւոր նկատեցին տնտեսական համագործակցութեան միջկառավարական յանձնախումբի գործունէութեան աշխուժացումը: Փաշինեան ներկայացուց Հայաստանի մէջ գործարար միջավայրի բարելաւման, ներդրումներու պաշտպանութեան պետական երաշխիքներու ապահովման նպատակով Հայաստանի կառավարութեան կողմէ ձեռնարկուող քայլերը եւ առաջարկեց կազմակերպել լիբանանցի գործարարներու այցելութիւնը Հայաստան՝ պայմաններուն տեղւոյն վրայ ծանօթանալու նպատակով:

Ապա Փաշինեանի ի պատիւ ճաշ տրուեցաւ վարչապետարանին մէջ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top