Համազգայինի «Պարոյր Սեւակ» Մասնաճիւղի «Նայիրի» Պարախումբի Ելոյթը

1030nayiri2

ՎԻԼՄԱ ԳՈՒՅՈՒՄՃԵԱՆ

Ժողովրդական պարը ազգի մը կենցաղային առօրեայի արտացոլումն է, պատմութիւնն է, աւանդութիւնը, մտերիմ յարաբերութիւնը, տրամադրութիւնը, մնայուն արժէքը եւ հասանելին՝ բոլորին սիրտերուն: Հայկական պարը կենսալից է, աշխոյժ, գեղեցիկ շարժում, ճկունութիւն, ե՛ւ նազանք ե՛ւ առնականութիւն, նաեւ ազգային ոգին եւ ինքնութիւնը պահպանելու մատչելի ու հաճելի ազդակ, հետեւաբար, պարարուեստի ուսուցումը անհրաժեշտ է նոր սերունդին համար՝ զիրենք ներգրաւելու հայկական երաժշտութեան, երգին, հարուստ տարազներու ծանօթացման եւ պարային արուեստին մէջ:

Մեր ստեղծագործ ժողովուրդը պարած է հարսանիքներու, ռազմական յաղթանակներու, այգեգործութեան ժամանակ, աւանդական տօնահանդէսներու. պարած են՝ արտայայտելով իրենց մարտական ոգին եւ կենսուրախ տրամադրութիւնները:

Լոս Անճելըսի գրեթէ բոլոր հայկական դպրոցներուն մէջ կը դասաւանդուին այս գեղեցիկ արուեստները: Նոյնպէս մշակութային միութիւններ (ի մասնաւորի Համազգայինը) եւ անհատներ տարբեր շրջաններու մէջ հիմնած են պարարուեստի ուսումնարաններ, ուր տարբեր տարիքներու հայ մանուկներ, պատանիներ եւ երիտասարդներ համախմբուելով՝ կը սորվին հայկական ժողովրդային պարերը:

Համազգային Հայ Կրթական Մշակութային Միութեան Սան Ֆերնանտօ հովիտի «Պարոյր Սեւակ» մասնաճիւղին նախաձեռնութեամբ, 6 Հոկտեմբեր, 2018ին, երեկոյեան ժամը 7ին CSUN-ի Plaza Del Sol սրահին մէջ տեղի ունեցաւ «Նայիրի» պարարուեստի դպրոցի տարեկան ելոյթը:

Ամիսներու երկար ու սպառիչ փորձերէ ետք, 65 խանդավառ փոքրեր, պատանիներ, պարմանուհիներ եւ երիտասարդներ, տարբեր տարիքային խումբերով, բեմ բարձրացան եւ հանդիսատեսին ներկայացուցին հայկական ժողովրդական եւ ժամանակակից պարեր: Բեմին գունագեղ պաստառները, սքանչելի լուսաւորումը, տարազներու այլազանութիւնը եւ եղանակներու ընտրութիւնը հաճելի մթնոլորտ ստեղծեցին եւ խանդավառեցին նայիրիականներուն ծնողներն ու հարազատները. անոնք ջերմ ծափահարութիւններով ողջունեցին պարողները, մանաւանդ հինգ-վեց տարեկան սիրուն աղջնակներուն, որոնք երեկոյին առաւել փայլք եւ հմայք բերելով՝ գրաւեցին ներկաներուն սիրտերը:

Ելոյթը սկսաւ մասնաճիւղի ատենապետ Ժագ Արմուտիքեանի յարգանքի ջերմ խօսքով՝ նուիրուած Շարլ Ազնաւուրի յիշատակին: Երիտասարդուհիներու բացման պարէն ետք հեզասահ յաջորդականութեամբ միջակ, կրտ-սեր խումբերը, ինչպէս նաեւ տղաներու խումբը ներկայացուց «Բալենի», «Շալախօ», «Հովիւի երազ», «Վաղարշապատի պար», «Քոչարի», «Աւարայր» եւ այլ պարեր: Հետաքրքրական նորութիւն էր սպանական ֆլամենկօ պարը Յարութ Փամպուքճեանի «Թէ Աչերս Քեզ Որորնեն» երգին ընկերակցութեամբ: Տղաները թէեւ թիւով քիչ էին, սակայն իրենց առնական ու պարային ուժեղ շարժումներով հիացմունք յառաջացուցին: Ելոյթի աւարտին, պարախումբի բոլոր անդամները բեմ բարձրացան եւ հայկական միասնական ուժն ու ոգին արտայայտող թաւշեայ յեղափոխութիւնը խորհրդանշող «Դուխով» երգի ներքոյ պարեցին: Երգին եւ պարին տպաւորիչ ազդեցութիւնը զգալի էր բոլոր պարողներուն ուրախ եւ գոհ դէմքերուն վրայ:

«Նայիրի»ի պարուսոյցներն են՝ Քաթրին Հայրապետեան եւ Արի Լիպարիտեան, որոնք մեծ գնահատանքի արժանի են հայկական պարարուետը տարածելու եւ աւանդելու իրենց կատարած  աշխատանքին համար: Գնահատանքի արժանի են մանաւանդ քուլիսային աշխատանքներու պատասխանատու ծնողները, որոնք իրենց գործը հիանալիօրէն կատարացին, սկսած մազայարդարումով, փոքրերուն տարազներ հագցնելով եւ կարգապահութիւնը պահելով. նոյնպէս արժանի է Մարօ Գասպարեան, որ յստակ բացատրութիւններով ներակայացուց պարերը:

Ելոյթի աւարտին վարչութեան անդամ Գարմէն Լիպարիտեան «Պարոյր Սեւակ» մասնաճիւղին, «Նայիրի» պարարուեստի դպրոցին եւ պարուսոյցներուն յանձնեց գնահատագիրներ Լոս Անճելըսի քաղաքային խորհուրդի անդամներու՝ Փօլ Գորեցի եւ Ճեսի Կապրիէլի կողմէ:

Պարախումբերուն փորձերը կը շարունակուին Ազգային Ֆերահեան վարժարանի «Տիգրանեան» սրահին մէջ: Յաւելեալ տեղեկութիւններու համար, դիմել Գաթրին Հայրապետեանին կամ «Պարոյր Սեւակ» մասնաճիւղի վարչութեան:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top