Դեմոկրատները Իրենց Հակակշիռին Տակ Առին Ներկայացուցիչներու Տունը, Սակայն Ոչ Ծերակոյտը

1108HR

 

1108HR

 

ՈՒԱՇԻՆԿԹԸՆ, «Պի.Պի.Սի.», «Եահու Նիուզ».- Միացեալ Նահանգներու տարածքին տեղի ունեցած 6 Նոյեմբերի քոնկրեսական ընտրութիւնները եկան որոշ հաւասարակշռութիւն մը հաստատելու երկրին քաղաքական կեանքին մէջ, 8 տարիներու ընթացքին առաջին անգամ ըլլալով Դեմոկրատ կուսակցութեան հակակշռին տակ դնելով Ներկայացուցիչներու տունը։

Արդարեւ, նախնական արդիւնքներուն համաձայն՝ դեմոկրատ թեկնածուները արդէն իսկ ապահոված են 222 աթոռներ 435 աթոռ ունեցող Ներկայացուցիչներ տան մէջ, հանրապետականներուն 199 աթոռներուն դիմաց, մինչ մնացեալ աթոռներուն ճակատագիրը ցարդ յստակ չէ։

Դեմոկրատները արդէն իսկ սկսած են Սպիտակ տան կողմէ օրէնքերու խախտումներու եւ յանցագործութեանց հետաքննութիւններ սկսելու նախապատրաստական աշխատանքերուն, որոնք հաւանաբար պիտի առաջնորդուին Էտըմ Շիֆի (որ հաւանաբար ստանձնէ Ներկայացուցիչներու տան Հետախուզական հարցերու յանձնախումբին ատենապետութիւնը), Մեքսին Ուոթըրզի (Ելեւմտական սպասարկութեան յանձնախումբի ատենապետի հաւանական թեկնածու) եւ Ըլայժա Քամինկզի (Օրինախախտումներու եւ կառավարութեան բարեկարգումի յանձնախումբի հաւանական ատենապետ) կողմէ:

Միւս կողմէ, Ծերակոյտը պիտի շարունակէ մնալ հանրապետականներու հակակշիռին տակ, առնուազն երկու քուէներու տարբերութեամբ։ Ծերակոյտի ընտրութեանց չորս աթոռներու արդիւնքները տակաւին վերջնականացած չեն։

Այս տարուան ընտրութեանց յատկանշական տուեալներէն մէկն էր մասնակցութեան բարձր համեմատութիւնը (47 տոկոս), ինչ որ 1970էն ի վեր ամէնէն բարձրն էր։

Նաեւ, կին թեկնածուները յատկանշական յաղթանակներ ապահովեցին եւ պատմութեան մէջ  մեծագոյն թիւով ներկայացուցիչները պիտի ունենան Ներկայացուցիչներու տան մէջ (ներկայ 107ին փոխարէն, առնուազն 118)։

Արդարեւ, Նիւ Եորքի մէջ ընկերվարական գաղափարախօսութեամբ ընտրութեանց մասնակցած 28ամեայ Ալեքսանտրիա Օքասիօ-Քորթեզ դարձաւ Ներկայացուցիչներու տան պատմութեան ամենաերիտասարդ անդամը, մինչ Մինիսոթայէն եւ Միշիկըէն ընտրուեցան առաջին իսլամ կին քոնկրեսականները, յաջորդաբար՝ Իլհան Օմար (Սոմալիայէն արտագաղթած) եւ Ռաշիրա Թլէյպ (Տիթրոյիթ ծնած ամերիկացի-պաղեստինցի), երկուքն ալ՝ Դեմոկրատ կուսակցութենէն։

Դեմոկրատ երկու այլ թեկնածուներ՝ Շարիս Տէյվիտզ եւ Տեպ Հաալընտ հանդիսացան Ներկայացուցիչներու տան անդամ ընտրուած առաջին բնիկ ամերիկացի կիները, յաջորդաբար Քենզասէն եւ Նիւ Մեքսիքոյէն։

Նաեւ, Այաննա Փրեսլի դարձաւ Մեսեչուսեցէն ընտրուած առաջին սեւամորթ կին քոնկրեսականը, իսկ Մարշա Պլեպըրն հանդիսացաւ Թենըսիէն Ծերակոյտի անդամ ընտրուած առաջին կին թեկնածուն։

Քալիֆորնիոյ մէջ, փոխկառավարիչ Կեւըն Նիւսըմ նահանգապետ ընտրուեցաւ, իսկ 85ամեայ ծերակուտական Տայէն Ֆայսնթայն 5րդ անգամն ըլլալով պահեց իր աթոռը, պարտութեան մատնելով նահանգային Ծերակոյտի նախագահ Քեւըն Տէ Լէոնը։

Քալիֆորնիացիները նաեւ մերժեցին բնակարաններու վարձքերու աճը սահմանափակելու իրաւասութիւնը տեղական կառավարման մարմիններուն յանձնել միտող թիւ 10 առաջադրութիւնը, ինչպէս նաեւ թիւ 6ը, որ կ՛առաջարկէր ջնջել վառելանիւթի վրայ դրուած յաւելեալ տուրքը, որմէ գոյացած եկամուտը կ՛օգտագործուի ճամբաներու եւ կամուրջներու կառուցման եւ նորոգութեանց համար։

 

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top