Հայ Մշակոյթի Ամսուան Նուիրուած Տօնակատարութիւն Յովսէփեան Վարժարանին Մէջ

1107hovsepian3

 

ԱՆԻ ՄԱՐՍԷԼԵԱՆ

 

Հոկտեմբեր ամիսը, մեղրահամ ու անուշաբոյր աւարտ ու վերջաբան մը ունեցաւ Յովսէփեան վարժարանին մէջ:

26 Հոկտեմբերի երեկոյեան, խուռներամ բազմութիւն մը լեցուցած էր «Կիրակոս» սրահը. ծնողներ եւ աշակերտներ անհամբեր էին ու խանդավառ՝ վայելելու հայ Մշակոյթի ամսուան նուիրուած օրուան հանդիսութիւնը:

Վարժարանիս տնօրէն Շահէ Մանկրեան, առաջին հերթին բեմ հրաւիրեց եօթներորդ եւ ութերորդ դասարանի աշակերտները, որոնք արտասանեցին Մուշեղ Իշխանի «Հայ Լեզուն Տունն Է Հայուն» բանաստեղծութիւնը՝ պարզելով բազմերանգ դրօշակներ զանազան երկիրներու, ուր ջարդէն ճողոպրած հայ ազգի զաւակները կ՛ապրին, կը գործեն ու կը ստեղծագործեն, վառ պահելով իրենց լեզուն, կրօնքը, ինքնութիւնը եւ մշակոյթը:

Յայտագիրը ճոխ էր ու հայաշունչ։ Դասարանային հերթականութեամբ բեմ բարձրացող Յովսէփեանի տաղանդաւոր աշակերտները արտասանեցին հայ գիրերու գիւտին ու հայ ժողովուրդին նուիրուած արտասանութիւններ, առաւել հիանալի կատարողութեամբ հնչեցուցին հայ մշակոյթին, մայր հայրենիքի ու 2800ամեայ մայրաքաղաք Երեւանին նուիրուած երգեր՝ «Հայերէն երգենք», «Իմ պապիկի Հայաստան», «Ջան Երեւան», «Երեւան Էրեբունի» եւ այլն, ղեկավարութեամբ՝ երգի ուսուցչուհի Ալենուշ Եղնազարի, դաշնամուրի ընկերակցութեամբ՝ Յովիկ Ոսկանեանի:

Հայկական Եռագոյնի երանգը տիրապետած էր բեմի յարդարումին եւ աշակերտներու պարային տարազներուն՝ փոքրիկ Հայաստանի մը վերածելով հանդիսութեան վայրը:

Ջերմ ծափահարութեան եւ գնահատանքի արժանացան պարուսոյց Փաթիլ Ալպարեանի պատրաստած «Հզօր Հայաստան», «Մենք պէտք է կռուենք», «Մի նամակ մի համբոյր», «Երեւան սիրոյ քաղաք» եւ վերջապէս «Դուխով» պարերը:

Ծնողներու հպարտանքի զգացումները աննկարագրելի էին եւ անբացատրելիօրէն երախտագէտ էին Յովսէփեան դպրոցի տնօրէնութեան եւ ուսուցչական կազմին, յատկապէս հայերէնի ուսուցչուհիներուն, որոնք հայեցի դաստիարակութեամբ եւ անձնուիրութեամբ, կրցան սերմանել հայ աշակերտի հոգւոյն մէջ սէրը հանդէպ իր լեզուին, մշակոյթին ու հայրենիքին՝

համոզուելով, թէ հայ լեզուն ու մշակոյթը նոր սերունդի զաւակներուն դժուար ուղին լուսաւորող կտակն ու փարոսն են:

Վարժարանիս տնօրէն Շահէ Մանկրեան շնորհակալութիւն յայտնեց ձեռնարկի յաջողութեան սատարող բոլոր ուսուցչուհիներուն, պարուսոյցին եւ ներկաներուն, ապա բարի երթ մաղթեց բոլորին:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top