Աղաղակենք՝ «Օսման Քաւալա Առանձին Չէ»

1110zarakolou

ՌԱԿԸՊ ԶԱՐԱՔՕԼՈՒ

 

1110zarakolou«Լման տարի մը եղած է Օսման Քաւալայի ձերբակալութեան: Մեծ ամօթ մըն է, որ կը շարունակուի: Ալ աւելի մեծ ամօթ է այս անարդարութեան դէմ համապատասխան հակազդեցութեան մը բացակայութիւնը: Թերեւս այս անտարբերութիւնը կարելի է անակնկալի տեղի տուած շոքային իրավիճակով բացատրել: Թերեւս Օսման Քաւալան ձերբակալող մտայնութիւնն ալ ճիշդ այս տպաւորութիւնը ձգել փափաքած է:

«Նոյնիսկ Օսման Քաւալան ձերբակալեցին» միտքը կրնայ հասարակութիւնը ամբողջովին անդամալոյծ դարձնել:

«Օսման Քաւալա անտէր չէ» կարգախօսով բողոքի թոյլ փորձեր կը լսուին: Իսկ միւս կողմէ Օսման Քաւալա կը մնայ անտէրութեան մէջ:

Բնական է, քանի որ ան ո՛չ իր կողքին կեցող եկեղեցի մը կամ մզկիթ մը ունի, ո՛չ կուսակցութիւն մը կամ ակումբ մը:

Այս երեւոյթը կը յիշեցնէ Սեւան Նշանեանին՝ առանց երկրէն ներս կամ համաշխարհային արժանի զօրակցութիւն տեսնելու երեք տարի բանտարկուած մնալու պատկերը:

Կարելի է ըսել, որ համալսարանական տարիներու երկու կրքոտ ընկերները նոյն ճակատագիրը կը բաժնեն:

1110kavala

Օսման Քաւալա

Ոմանք զինք կը նկարագրեն «ֆիլանթրոփիստ» եզրով: Բառի ստուգաբանութիւնը կու գայ յունարէնէն եւ կը նշանակէ մարդ արարածին հանդէպ սէրը: Արդի ժամանակներուն, այս բառը կը բացատրուի անհատի մը իր կարողութիւնները օտարի մը օգնական ըլլալու համար կամաւոր կերպով տրամադրելուն:

Օսման Քաւալա երկրի ամենաբարձր մակարդակով անուանուեցաւ տեղացի Սորոս:

Նախագահ Էրտողանի կրկնապատկերը Հունգարիոյ նախագահ Օրպանն է, որ նոյնպէս կը սիրէ Սորոսը հալածել: Հունգարիոյ 1930ական թուականներուն յատուկ ֆաշականութիւնը վերակենդանացած է:

Բաց հասարակութեան մասին խօսիլը անգամ սկսած է յանցանք համարուելու:

Հասարակական կազմակերպութիւնները հալածելու համար Էրտողանի բարեկամը՝ Օրպան նոյնիսկ նոր օրինագիծ մը պատրաստած է: Այս չարագործութեան պատրուակն ալ գաղթականներուն օգնական ըլլալով կը բացատրուի: Արդարեւ, Հունգարիոյ մէջ հակասեմիթ քարոզչութիւնն ալ հասած է իր ամենաբարձր մակարդակին:

Ըստ երեւոյթին, պետերը չեն ախորժիր հասարակական կազմակերպութիւններէն: Ալիեւն ալ չէ սիրած զանոնք: Մարդու իրաւունքներու բազմաթիւ պաշտպաններ կա՛մ բանտարկուեցան կամ ալ ստիպուեցան երկրէն հեռանալու:

Նոյնն է Փութինի կամ Վենեզուելլայի նախագահի պարագան:

Ինչ լաւ է Ատնան Քաշըքճըի նողկալի արեւանգման դէմ ձայն բարձրացնելը:

Բայց ո՞վ պիտի հաւատայ, որովհետեւ բոլորս գիտենք, թէ ի՛նչ տեսակի կեղծաւորութիւն մըն է այդ դաւադրական ոճիրին դէմ խօսիլը, երբ երկրին մէջ այդ տեսակի ոտնձգութիւններու բազմաթիւ օրինակներ կ՛ապրուի:

Թող մէկը, խնդրե՛մ, պատասխանէ այս հարցումին: Օսման Քաւալա ամբողջ տարի մը բանտին մէջ պահող մտայնութեան եւ Սէուտական Արաբիոյ դեսպանատան մէջ Քաշըքճըի անհետացման միջեւ ի՞նչ տարբերութիւն կայ:

Արդեօք «Ես կրնամ, բայց դուն՝ ո՞չ» ըսել կ՛ուզեն:

Կամ ալ «Բայց մենք չենք սպաննա՞ծ» պիտի ըսեն:

Ի՞նչ է այս երկու անընդունելիներուն տարբերութիւնը: Յիշենք, որ զօրավար Էվրէնն ալ անցեալին «Ի՞նչ, այսինքն չկախենք ու սնուցե՞նք» հարցուցած էր: Երկու օր առաջ, Սորոսի Նիւ Եորքի բնակարանը պայթուցիկ ծրար մը ղրկուած էր: «Թուիթըր»ի միջոցաւ Սորսի հետ զբաղողներէն մէկն ալ Թրամփն է: Սորոսի «Բաց հասարակութիւն» հիմնարկի բանբեր Լորա Սիլվըր պայթուցիկ սարքի առաքումէն ետք, այս պատահարները մեկնաբանեց՝ «Երկրի թունաւոր քաղաքական միջավայր»ին վերագրելով: «Միացեալ Նահանգներու եւ աշխարհի զանազան երկիրներու մէջ քաղաքականութիւնը մատնուած է ատելութեան պատգամի ճնշումին: Այս ծայրայեղութիւնը կը խրախուսէ նաեւ բռնութիւնը: Նոյնիսկ նման սուտի եւ վարչական համակարգի բռնատիրութեան դատապարտուելու երեւոյթին մէջ միայն կարծիք յայտնելը մահուան սպառնալիքներ ստանալու համար բաւարար կը համարուի»:

Վերադառնլով Օսման Քաւալայի հարցին՝ անգամ մը եւս պիտի անդրադառնանք Քաւալան պաշտպանելու համար ազդեցիկ արշաւի մը բացակայութեան երեւոյթին: Բարեբախտաբար, այս տարի Հրանդ Տինքի մրցանակատուչութեան առթիւ ան յիշուեցաւ «Լոյսեր»ու ցանկին վրայ:

Ինչպէս ըսինք վերեւը՝ դիւրին չէ Օսման Քաւալան որոշ կաղապարի մը մէջ տեղադրելը: Ան ո՛չ լրագրող է, ո՛չ հրատարակիչ, ո՛չ գրող, բայց վերջին երեսուն տարիներուն՝ անհամար հրատարակչութեան պարբերականներուն եւ հանրագիտարաններուն հրատարակութեան նպաստած անձ մը, առանց որեւէ ակնկալութեան զարգացումին ճամբայ բացող մէկը: Իսկ իբրեւ մտաւորական՝ կը գերազանցէ մեզմէ շատերը: Մեր ալ մաս կազմած բոլոր այդ խմբակցութիւնները պարտին շատ աւելի ուժգին ձայն բարձրացնել այս կարեւոր գործիչին աջակցելու համար:

Այս առթիւ պարտք կը համարեմ շնորհակալութիւն յայտնել Քորի Կութսթաթին եւ Օսման Օքքանին, որոնք այս մասին ահազանգ հնչեցուցին բոլորիս հաշուոյն:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top