Ամերիկա Արցախի Տագնապին Խաղաղ Լուծումը Կը Ջատագովէ

1109macrisGreg

1109macrisGregԵՐԵՒԱՆ, «Արմէնփրէս».- Միացեալ Նահանգները կ՛աջակցի Հայաստանի եւ Ատրպէյճանի միջեւ վստահութեան հաստատման ու երկխօսութեան ընդլայնման ուղղուած ջանքերուն, որոնք կրնան կայունացնել ապահովական կացութիւնը եւ ստեղծել բանակցութիւններու համար առաւել կառուցողական մթնոլորտ, 8 Նոյեմբերին յայտարարեց ԵԱՀԿի մօտ Միացեալ Նահանգներու առաքելութեան ղեկավարի տեղակալի պաշտօնակատար Կրեկըրի Մաքրիս, ԵԱՀԿի մնայուն խորհուրդի նիստին ընթացքին։

Ան ընդգծեց, որ իբրեւ համանախագահող երկիր՝ Միացեալ Նահանգները կ՛ողջունէ ԵԱՀԿ Մինսկի խմբակի համանախագահներուն, ինչպէս նաեւ ԵԱՀԿի գործող նախագահի անձնական ներկայացուցիչին գործունէութիւնը՝ վերահաստատելով իր ամուր աջակցութիւնը անոնց աշխատանքին, հասնելու համար Արցախի հակամարտութեան խաղաղ կարգաւորման:

Մաքրիս նշեց, որ Միացեալ Նահանգները ոգեւորուած է Հայաստանի եւ Ատրպէյճանի  ղեկավարներու եւ արտաքին գործոց նախարարներու մակարդակով վերջերս տեղի ունեցած կառուցողական շփումները, որոնք «ուղղակի եւ դրական արդիւնքներ կու տան», որովհետեւ վերջին երկու ամիսներուն շփման գիծի երկայնքին եւ հակամարտութենէն տուժած գօտիներուն մէջ բռնութեան նուազեցում կը նկատուի:

«Կողմերը պէտք է օգտուին ընձեռուած առիթէն՝ գտնելու ուղիներ հակամարտութեան կարգաւորումը յառաջ մղելու համար», շեշտեց ան:

Մաքրիս ընդգծեց, որ համանախագահները կողմերուն առաջարկած են լարուածութիւնը մեղմացնելու եւ հաղորդակցութիւնները բարելաւելու քանի մը քայլեր, որոնց Ամերիկա ամբողջական աջակցութիւն կը ցուցաբերէ եւ յայտնեց այն համոզումը, որ արտաքին գործոց նախարարներուն միջեւ հանդիպումները կրնան դրական ազդեցութիւն գործել առաջարկուած միջոցները կեանքի կոչելու գործին մէջ:

«Այս հակամարտութիւնը արդէն շատ երկար ժամանակ է, որ կը շարունակուի։ Եկած է պահը, որ կողմերը զերծ մնան փոխադարձ մեղադրանքներէ եւ նախապատրաստեն իրենց բնակչութիւնը՝ խաղաղութեան», նշեց ան:

Դիւանագէտը յիշեցուց, որ Ամերիկա մեծ կարեւորութիւն կու տայ տարածաշրջանին մէջ հակամարտութեանց, ներառեալ՝ Արցախի հակամարտութեան կարգաւորման մէջ ԵԱՀԿի ջանքերուն եւ պնդեց, թէ այդ պատճառով է, որ վերջին շաբաթներուն ամերիկացի բարձրաստիճան պատուիրակներ Հայաստան եւ Ատրպէյճան առաքած է։

«Միացեալ Նահանգները կը հաւատայ այն տեսակէտին, որ այս հակամարտութիւնը ռազմական կարգաւորում չի կրնար ունենալ: Ներկայ իրավիճակը եւս անընդունելի է: Միացեալ Նահանգները յանձնառու է շարունակելու իր աշխատանքը կողմերուն հետ՝ յանուն տեւական եւ խաղաղ հանգուցալուծման, որ հիմնուած պիտի ըլլայ ուժի չկիրառման, տարածքային ամբողջականութեան, հաւասար իրաւունքներու եւ ժողովուրդներու ինքնորոշման իրաւունքի սկզբունքներուն վրայ», եզրակացուց Մաքրիս:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top