«Պատերազմները Միայն Կորուստ, Տառապանք Եւ Աւեր Կը Բերեն». Նիկոլ Փաշինեան

1114paris

1114paris

Աշխատանքային այցելութեամբ Փարիզ գտնուող Հայաստանի վարչապետի պաշտօնակատար Նիկոլ Փաշինեան 11 Նոյեմբերին մասնակցեցաւ Փարիզի խաղաղութեան համաժողովի աշխատանքներուն: Ֆորումը տեղի ունեցաւ Համաշխարհային Ա. պատերազմի աւարտին (1918) կնքուած զինադադարի 100ամեակին նուիրուած ձեռնարկներու շրջագիծին մէջ:

Համաժողովը բացուեցաւ Փարիզի խաղաղութեան համաժողովի ղեկավար կոմիտէի փոխնախագահ Թրիշա Շեթթիի եւ Ֆրանսայի Հանրապետութեան նախագահ Էմանուէլ Մաքրոնի ողջոյնի խօսքերով: Այնուհետեւ ելոյթ ունեցան Գերմանիոյ վարչապետ Անկելա Մերքել եւ Միացեալ Ազգերու Կազմակերպութեան գլխաւոր քարտուղար Անթոնիօ Կութերէշ:

Նիկոլ Փաշինեան Փարիզի խաղաղութեան համաժողովին հանդէս եկաւ ելոյթով, որուն մէջ ան, ի միջի այլոց ըսաւ. «Մենք այստեղ հաւաքուած ենք յիշատակելու Համաշխարհային Ա. պատերազմի աւարտի 100ամեակը: Ասիկա բացառիկ նշանակութիւն ունեցող առիթ մըն է, որ կոչուած է ոգեկոչելու մեր հաւաքական յիշողութիւնը եւ արտայայտելու խաղաղութեան մեր ընդհանուր ուղերձը:

Այսօր մենք՝ իբրեւ այդ պատերազմի մասնակից ազգերու առաջնորդներ, առաջին հերթին պէտք է խօսինք Համաշխարհային Ա. Պատերազմի դասերուն մասին:

Երբ պետութիւն մը պատերազմ կը մղէ կամ կը փորձէ իր հարցերը լուծել ռազմական ճամբով, ուրեմն անիկա կը հաւատայ իր ուժերուն եւ յաղթանակին: Այդուհանդերձ, Համաշխարհային Ա. պատերազմը համամոլորակային ողբերգութիւն էր՝ անոր մէջ ներգրաւուած բոլոր ժողովուրդներուն համար, եւ, վերջապէս, անիկա յանգեցաւ զայն յղացած պետութիւններու քայքայումին:

Գոյութիւն ունի համոզում մը, որուն համաձայն՝ աշխարհաքաղաքական եւ ռազմական տեսանկիւնէն, պատերազմներու ընթացքին միշտ կ՛ըլլան յաղթողներ եւ պարտուողներ: Սակայն, մարդկային տեսանկիւնէն, ոչ ոք կը յաղթէ: Պատերազմները միայն կորուստ, տառապանք եւ աւեր կը բերեն»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top