Ներկայացուցիչներու Տան Դեմոկրատական Նորընտիր Մեծամասնութիւնը Պիտի Խափանէ Թրամփի Նախագահական Լիազօրութիւնները

haroutsassounian

 

ՅԱՐՈՒԹ ՍԱՍՈՒՆԵԱՆ

 

haroutsassounian6 Նոյեմբեր, 2018ին տեղի ունեցած միջանկեալ ընտրութիւնները զգալիօրէն կը սահմանափակեն նախագահ Թրամփի՝ Միացեալ Նահանգներու ղեկավարումը որպէս բռնապետութիւն:

Իր նախագահութեան առաջին երկու տարիներուն ընթացքին, Թրամփ յաճախ չարաշահեց իր լիազօրութիւնները՝ ստորագրելով հրահանգներ եւ վերահսկելով Միացեալ Նահանգներու գործադիր եւ օրէնսդիր իշխանութեան մարմինները՝ Ամերիկայի Ներկայացուցիչներու տան եւ Ծերակոյտի հանրապետական մեծամասնութեան շնորհիւ: Այդ ընթացքին Թրամփ վիրաւորական բազմաթիւ յայտարարութիւններ կատարեց եւ գործեց անպէս, ինչպէս ինք բարեհաճեցաւ՝ անտեսելով քաղաքական, իրաւական եւ բարոյական որեւէ վարքագիծ։

Սակայն նախագահի սանձարձակ գործունէութիւնը հասաւ իր աւարտին…: Ներկայացուցիչներու տան մէջ, դեմոկրատական նորընտիր մեծամասնութեամբ Թրամփ այլեւս չի կրնար իր ուզածը ընել: Ան չի կրնար առաջարկել որեւէ օրինագիծ՝ առանց ստանալու համաձայնութիւնը Ներկայացուցիչներու տան դեմոկրատներուն, որոնք կը հետապնդեն նախագահին եւ անոր կառավարութեան անդամներու անօրէն գործողութիւնները, ինչպէս նաեւ կը պաշտպանեն յատուկ դատախազի՝ Ռուսիոյ հետ գաղտնի համաձայնութեան մը քննութիւնը, որ տեղի ունեցաւ 2016ի Միացեալ Նահանգներու նախագահական ընտրութիւններուն: Ներկայացուցիչներու տան նորընտիր դեմոկրատական մեծամասնութիւնը կրնայ դատարան կանչել Թրամփի ընտրարշաւի գործընկերները, բան մը, որ հանրապետական նախորդ մեծամասնութիւնը արգելափակած էր, եւ նաեւ պահանջել՝ հրապարակ հանել նախագահի հարկային յայտարարագիրները, զորս Թրամփ կտրականապէս մերժած էր հրապարակել՝ ծածկելով իր գործարքները օտար երկիրներու մէջ։

Այս նոր իրավիճակը պիտի ունենայ յստակ երկու հետեւանքներ: Յառաջիկայ երկու տարիներուն ընթացքին Միացեալ Նահանգներու կառավարութիւնը պիտի յայտնուի փակուղիի մէջ: Դժուար թէ Թրամփի նախաձեռնած որեւէ օրինագիծ հաստատուի Ներկայացուցիչներու տան կողմէ։

Երկրորդ՝ հիասթափելով իր գործողութիւններուն արգելափակումով, Թրամփ, բաղդատած անցեալին հետ՝ յաւելեալ կոպտութեամբ պիտի յարձակի դեմոկրատներու վրայ: Նախագահը արդէն յայտարարած է, որ եթէ դեմոկրատները հետապնդեն զինք, ինք իր հերթին կը հետապնդէ զանոնք…: Այս կը նշանակէ, որ նախագահ Թրամփի զայրոյթը եւ թշնամանքը կը հասնին նոր բարձունքներու, դրդելով զինք վիրաւորական նոր «թուիթներ» ուղարկելու եւ շատ աւելի վիրաւորական ելոյթներ ունենալու իր քաղաքական հանրահաւաքներուն ընթացքին։

Յառաջիկայ երկու տարիներուն Թրամփ այնքան զբաղած պիտի ըլլայ իր քաղաքական հակառակորդները հարուածելով, որ պիտի չկարենայ լիարժէքօրէն ուշադրութիւն դարձնել ներքին եւ արտաքին քաղաքականութեան վրայ: Յոյսով ենք, որ այսպէս ալ կը սահմանափակուի անոր հասցուցած վնասը՝ Միացեալ Նահանգներուն եւ ամբողջ աշխարհին…

 

ԱՄԵՐԻԿԱՀԱՅ

ԹԵԿՆԱԾՈՒՆԵՐԸ՝

ՄԻՋԱՆԿԵԱԼ

ԸՆՏՐՈՒԹԻՒՆՆԵՐՈՒՆ

 

Դրական կողմը այն էր, որ  6 Նոյեմբեր 2018ի միջանկեալ ընտրութիւններուն, առնուազն ութ ամերիկահայեր յաղթեցին՝ տեղական, պետական եւ դաշնակցային քաղաքական պաշտօններ գրաւելով:

Ամերիկահայ Աննա Էշու (դեմոկրատ, Քալիֆորնիա) վերընտրուեցաւ Ներկայացուցիչներու տան մէջ, նոյնպէս՝ Քալիֆորնիայէն դեմոկրատ Ճեքի Կանչելեան Սփիր: Ամերիկահայ Էնթընի Պրինտիս (դեմոկրատ, Նիւ Եորք) 1293 ձայնով կը գերազանցէր գործող հանրապետական քոնկրեսական Քլաուտիա Թենիի ընտրութիւններու գիշերը՝ տակաւին սպասելով հազարաւոր ձայներու հաշուարկին: Եթէ Պրինտիս յաղթէ, ան կը դառնայ Միացեալ Նահանգներու Ներկայացուցիչներու տան մէջ գործող երրորդ ամերիկահայը։

Միացեալ Նահանգներու պատմութեան մէջ եղած են Ներկայացուցիչներու տան մէջ ընտրուած միայն եօթը ամերիկահայեր, անոնք են.

– Թոմաս Քորվին (1831-1840, 1859-1861), հանրապետական, Օհայօ:

– Սթիւըն Տէրունեան (1953-1965), հանրապետական, Նիւ Եորք:

– Ատամ Պենիամին (1977-1982), դեմոկրատ, Ինտիանա:

– Չարլզ Փաշայեան (1979-1991), հանրապետական, Քալիֆորնիա:

– Աննա Էշու (1993-այժմ), դեմոկրատ, Քալիֆորնիա:

– Ճոն Սուինի (1999-2007), հանրապետական, Նիւ Եորք:

– Ճեքի Սփիր (2008-այժմ), դեմոկրատ, Քալիֆորնիա:

Անհաւատալիօրէն, հայ եւ հունգարական ծագում ունեցող Թոմաս Քորվին եղած է բարձրակարգ քաղաքական գործիչ, դիւանագէտ եւ միակ ամերիկահայը, որ 1845-1850 դարձաւ Միացեալ Նահանգներու ծերակուտական  (հանրապետական, Օհայօ): Բացի Ներկայացուցիչներու տան մէջ եւ Ծերակոյտին մէջ ունեցած ծառայութենէն, ան Օհայոյի նահանգապետն էր (1840-1842) եւ Միացեալ Նահանգներու ֆինանսներու նախարարը (1850-1853): Ան նաեւ եղած է Ամերիկայի դեսպանը Մեքսիքոյի մօտ (1861-1864):

Քոնկրեսի հանրապետական թեկնածու Տենի Թարխանեան, Նեւատայէն, պարտուեցաւ 6 Նոյեմբերի ընտրութիւններուն՝ դեմոկրատ Սիւզի Լիի դիմաց, հաւաքելով ձայներուն 43.4 տոկոսը,  իսկ Լի՝ 51.4 տոկոս:

Քոնկրեսի հանրապետական թեկնածու Ճոնի Նալպանտեան (Կլենտէյլ), պարտուեցաւ գործող դեմոկրատ քոնկրեսական Էտըմ Շիֆի դիմաց: Նալպանտեան հաւաքեց 23.5 տոկոս քուէ, իսկ Շիֆ՝ 76 առ հարիւր:

Լոս Անճելըսի Սան Ֆերնանտօ հովիտի շրջանի դեմոկրատ Ատրին Նազարեան յաղթեց հանրապետական իր մրցակից Ռոքսանա Հոկին, Քալիֆորնիոյ նահանգային խորհրդարանին մէջ: Նազարեան հաւաքեց 77.9 առ հարիւր քուէ, իսկ Հոկ՝ 22.1 առ հարիւր։

Էլիզապէթ Ուորըն (չշփոթել ծերակուտական Էլիզապէթ Ուորընի հետ)՝ Հայոց Ցեղասպանութեան վերապրածներու ծոռնուհին, Քալիֆորնիոյ նահանգային խորհրդարանի ընտրութիւններուն պարտուեցաւ դեմոկրատ Թաշէ Պոնըր Հորուաթի դիմաց:

Հանրապետական Ռիթա Թոփալեան նահանգային ծերակոյտի ընտրութիւններուն պարտուեցաւ դեմոկրատ Պապ Արխելեթայի դիմաց, որ յաղթեց քուէներուն 65 առ հարիւրով:

Քալիֆորնիայէն դուրս, Միշիկընի նահանգային խորհրդարանի 26 տարեկան դեմոկրատ թեկնածու Մարի Մանուկեան յաղթեց իր հակառակորդին՝ Միշիկընի Հանրապետական կուսակցութեան նախկին նախագահ Տէյվիտ Վոլքինսընին՝ ձայներուն 57 տոկոսով, ընդդէմ Վոլքինսընի 43 տոկոսին: Մանուկեանին կը զօրակցէին նախագահ Պարաք Օպամա, ծերակուտական Կերի Փեթըրս եւ ընտրուած նահանգապետ Կրեչըն Ուիթմըր:

Այլ ամերիկահայ թեկնածու մը՝ Մէյնի նահանգային խորհրդարանի դեմոկրատ ներկայացուցիչ Սառա Կիտէօ, վերընտրուեցաւ։

Աննա Աստուածատրեան-Թուրքոթ վերընտրուեցաւ Մէյնի քաղաքապետական խորհուրդին մէջ: Պաքուէն գաղթական Թուրքոթ Արցախի անկախութեան եռանդուն պաշտպաններէն է։

Վերջապէս, Լորիկ Չարխուտեան, Մերիլենտի նահանգային օրէնսդիր մարմինի դեմոկրատ թեկնածուն, ընտրուեցաւ՝ դառնալով Մերիլենտի խորհրդարանի առաջին ամերիկահայ ներկայացուցիչը։

Ամերիկահայերուն մեծ մասը, որ 6 Նոյեմբերին պայքարեցաւ քաղաքական պաշտօններու համար՝ յաղթեց: Նոյնը կը վերաբերի նաեւ ամերիկահայ համայնքի օտարազգի աջակիցներուն: Ամերիկայի Հայ Դատի յանձնախումբը հաղորդեց, որ իր զօրակցութիւնը վայելող քոնկրեսական թեկնածուներուն 92 տոկոսը յաղթեց: Ասիկա հրաշալի լուր է…

Միւս կողմէ, ամերիկահայերը գոհ են, որ Քոնկրեսին մէջ Թուրքիոյ զօրակցող խումբի համանախագահ, քոնկրեսական Փիթ Սեշընզ (հանրապետական, Թեքսաս) չկրցաւ վերընտրուիլ՝ հակառակ թրքամէտ հովանաւորներու նուիրատուութիւններուն…

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top