«ԻՐԱՒՈՒՆՔ»Ի ՀԱՐՑԱԶՐՈՅՑԸ ՀՅԴ ԲԻՒՐՈՅԻ ԱՆԴԱՄ ԱՐՄԷՆ ՌՈՒՍՏԱՄԵԱՆԻ ՀԵՏ

0222armenrustamian

0222armenrustamian

«Ամէն Մէկը Պէտք Է Գնահատի Քաղաքական Ուժի Անցած Երկարատեւ Ճանապարհը, Նրա Հնարաւորութիւնները»

 

Վարեց՝ ՀՐԱՆՏ ՍԱՐԱՖԵԱՆ

 

Արտահերթ խորհրդարանական ընտրութիւնների ՀՅԴ նախընտրական ցուցակն ամբողջութեամբ հրապարակուեց: Այս մասին տեղեկացրեց ԱԺ ՀՅԴ խմբակցութեան ղեկավար Արմէն Ռուստամեանը եւ անկեղծացաւ, որ ռեյտինգային ցուցակներն են հիմնականում դժուարացնում ցանկի կազմումը, որովհետեւ որոշման իրաւունքը պատկանում է եւ նախապատուութիւնը տրւում է տեղերում ՀՅԴական մարմիններին, եւ իրենք են կողմնորոշուելու, թէ ում պէտք է առաջադրեն:

 

ՀՐԱՆՏ ՍԱՐԱՖԵԱՆ.- Պարոն Ռուստամեան, ՀՀԿն ասում է, որ իրենք են միայն իրական ընդդիմութիւն այս իշխանութեանը, քանի որ միւսները ողջունել են Նիկոլ Փաշինեանի շարժումն ու իրականացրած իշխանափոխութիւնը: Այս առումով չէ՞ք կարծում, որ ՀՅԴն եւս կարող է գրպանային ընդդիմութիւն ընկալուել:

ԱՐՄԷՆ ՌՈՒՍՏԱՄԵԱՆ.- Քաղաքագիտական առումով՝ ընտրութիւնների ընթացքում ասել՝ ով է ընդդիմադիր, ով՝ ոչ, ճիշդ չէ, որովհետեւ ընդդիմութիւնը որոշւում է, երբ իշխանութիւնն է ձեւաւորւում: Երբ իշխանութիւնը կը ձեւաւորուի, այդ ժամանակ էլ պարզ կը լինի, թէ ով է ընդդիմութիւնը: Հիմա բոլորը հաւասար պայմաններում իրենց ծրագրերով պէտք է մրցեն միմեանց հետ: Ճիշդ տրամաբանութիւնը սա է: Երեւի, այդպէս են արտայայտւում՝ ելնելով նրանից, որ ըստ էութեան, յայտնի է, որ Նիկոլ Փաշինեանի գլխաւորած ուժն այսօր ֆաւորիտն է, եւ, ամենայն հաւանականութեամբ՝ նա կարող է ունենալ մեծամասնութիւն եւ, ըստ այդմ, դառնալ իշխանութիւն: Բայց մենք արդէն յայտարարել ենք, որ թէպէտ այս իշխանութեան շարժման ժամանակ ունեցել ենք մեր դերակատարութիւնը, բայց դուրս ենք եկել կառավարութիւնից: Հետեւաբար, մենք էլ ենք լինելու ընդդիմութիւն, այսինքն‘ չենք պատրաստւում կազմել կոալիցիայ մի քաղաքական ուժի հետ, որտեղ մեր ձայնը վռճորոշ չէ: Եւ առհասարակ‘ մենք այլեւս այդպիսի կոալիցիաների մէջ չենք լինի, որտեղ առանց Դաշնակցութեան կարող են որոշումներ ընդունուել: Սա է մեր անցած ճանապարհի ամենագլխաւոր գնահատականը: Այո՛, մենք հասել ենք լուրջ յաջողութիւնների, բայց նաեւ մնացել ենք այն պատասխանատուութեան տակ, որի համար ուղղակի պատասխանատու չէինք, որովհետեւ ՀՅԴն չի եղել ամբողջական իշխանութիւն, բայց ընկալուել է բոլորի կողմից, որ այդպէս է:

 

ՀՐԱՆՏ ՍԱՐԱՖԵԱՆ.- ՀՀԿն, մասնակցելով ընտրութիւններին, ասում է, որ ովքեր դէմ են Նիկոլ Փաշինեանի իշխանութեանը, իրենց օգտին են քուէարկելու: Իսկ ՀՅԴի ընտրազանգուածն ովքե՞ր են լինելու:

ԱՐՄԷՆ ՌՈՒՍՏԱՄԵԱՆ.- Մեր ընտրազանգուածը Դաշնակցութեան անցած ճանապարհը գնահատող, նրա գաղափարներին հաւատացող եւ ամբողջ ընթացքում ՀՅԴի ասածի եւ արածի համադրումն ու համապատասխանութիւնը տեսնող ընտրազանգուածն է: ՀՅԴն մինչեւ հիմա իր քաղաքական յստակ ուղուց երբեք չի շեղուել: Եւ սա մենք ապացուցել ենք մեր անցած ճանապարհով: Իսկ եթէ որոշ մարդկանց մօտ դեռեւս ինչ-որ կասկածանք կայ, այս ընթացքում ցոյց կը տանք, որ եղել է այնպէս, ինչպէս արդէն ասացի: ՀՅԴն ինչ խնդիր դրել է, իր նուազագոյնով հասել է առաւելագոյնի: Իսկ նոր ուժերը դեռ պէտք է ձեւաւորուեն, հէնց նոյն Նիկոլ Փաշինեանի գլխաւորած շարժումը շատ ճանապարհ ունի բիւրեղանալու, ամրանալու համար: Այնպէս որ, մեր հիմնական դերակատարութիւնը լինելու է երկու հիմնական խնդրի լուծումը՝ անվտանգ երկրի զարգացումն ու արդարութիւնն ապահովել երկրի ներսում, այդ թւում՝ սոցիալական, ընկերային եւ ընդհանրապէս, որպէսզի քաղաքացին պաշտպանուած զգայ իր պետութեան մէջ:

 

ՀՐԱՆՏ ՍԱՐԱՖԵԱՆ.- Յամենայնդէպս, նման յայտարարութիւններով է հանդէս գալիս նաեւ «Սասնայ ծռեր» կուսակցութիւնը, որոնք եւս պատրաստւում են մասնակցել այս ընտրութիւններին: Մտավախութիւն չունէ՞ք, որ խորհրդարանում ՀՅԴ խմբակցութիւնը կարող է փոխարինուել «Սասնայ ծռերով»:

ԱՐՄԷՆ ՌՈՒՍՏԱՄԵԱՆ.- Խորքում, բացի, այսպէս ասած, գենետիկ հակադաշնակցականներից, բոլորը մօտ են դաշնակցութեան գաղափարներին: Այսպիսի բան չկայ, որ ազգը, պետութիւնն իրենց երազած երկիրը պատկերացնեն ու չգան ազատ, անկախ Հայաստանի գաղափարին: Ի վերջոյ, մենք հանրապետութիւն ենք ստեղծել զրոյից ու հիմա ունենք երրորդ հանրապետութիւնը, կարծում եմ՝ արդէն չորրորդի մէջ ենք: Այս ամէնը հետեւանքն է Դաշնակցութեան գործունէութեան եւ ազգային ուժերի նուիրուածութեան ու համախմբման: Այս առումով՝ բնական է, մենք այս դաշտում պէտք է ունենանք լուրջ համակիրներ: Ինչ վերաբերում է նրան, թէ ով է ընտրուելու, ժողովրդի ընտրութեան հարցն է, որեւէ քաղաքական ուժի չեմ ուզում կանխակալ գնահատական տալ: Ամէն մէկը պէտք է գնահատի քաղաքական ուժի անցած երկարատեւ ճանապարհը, նրա հնարաւորութիւնները:

 

ՀՐԱՆՏ ՍԱՐԱՖԵԱՆ.- Այնուամենայնիւ, չէ՞ք կարծում, որ ձեր քաղաքական ուժի նկատմամբ առկայ անվստահութիւնը պայմանաւորուած էր ՀՅԴի վերջին շրջանի քայլերով:

ԱՐՄԷՆ ՌՈՒՍՏԱՄԵԱՆ.- Ցանկացած կուսակցութիւն թէկուզ 128 օր լինի, տեսէ՛ք, թէ քանի սխալներ թոյլ կը տայ: Բա 128 տարի Դաշնակցութիւնը գործել է: Իհարկէ, եղել են նաեւ սխալներ: Եւ, ինչպէս ասացի, հիմնական սխալներից մէկը եղել է այն, որ ՀՅԴն կոալիցիայ է կազմել, որտեղ վճռորոշ ձայն չի ունեցել: Չէր կարելի կոալիցիայ կազմել, որտեղ կարող են առանց քեզ որոշումներ կայացուեն: Դրա պատճառով մենք չենք կարողացել լիարժէք լուծել մեր առջեւ դրուած խնդիրները, հիմա այդպիսի բան չի կրկնուի: Վերջինը մի քիչ մէջը տրամաբանութիւն ունէր: 3/5-ի պահանջ կար, առանց մեզ չէին կարողանում ձեւաւորել այդ 3/5-ը: Երբ սահմանադրական օրէնքներ պէտք է փոխուէին, այդ ժամանակ առանց ՀՅԴ չէին կարողանում, այդտեղ դերակատարութիւն կար, բայց մնացած հարցերում դերակատարութիւնը եղել է ՀՀԿինը, մեր դերը վճռորոշ չի եղել:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top