Հայաստան Պէ՞տք Է Քաղաքացիութիւն Շնորհէ Օտարերկրացի Ներդրողներու

haroutsassounian

ՅԱՐՈՒԹ ՍԱՍՈՒՆԵԱՆ

 

haroutsassounianՀայաստանի վարչապետի պաշտօնակատար Նիկոլ Փաշինեան արտասահմանեան ներդրողներու ներգրաւումը կը համարէ իր նոր կառավարութեան առաջնահերթութիւնը։

Տակաւին կանուխ է որոշելու, թէ արդեօք օտարերկրացի ներդրողները շահագրգռուա՞ծ են գործարարութեամբ զբաղելու Հայաստանի մէջ կամ ոչ: Նոր ներդրողներու բացակայութեան ընդհանուր բացատրութիւնը հետեւեալն է՝ անոնք կը սպասեն 9 Դեկտեմբեր 2018ին կայանալիք խորհրդարանական ընտրութիւններու արդիւնքներուն: Կ՛ակնկալուի, որ վարչապետի պաշտօնակատարի կուսակցութիւնը ստանայ երեսփոխանական աթոռներու մեծամասնութիւնը: Կառավարութեան պաշտօնատարները կը կարծեն, որ այդ մէկը պիտի խրախուսէ օտարերկրացիները, որպէսզի սկսին ներդրումներ կատարելու Հայաստանի մէջ։

Այսուամենայնիւ, գոյութիւն ունի լրացուցիչ միջոց, որով Հայաստան կրնայ համեմատաբար արագ ներգրաւել օտարերկրացի նոր ներդրողներ՝ անոնց առաջարկելով քաղաքացիութիւն։

Աշխարհի վրայ շատ են այն երկիրները, որոնք նման քաղաքացիութիւն կ՛առաջարկեն օտարերկրացիներու. անոնցմէ են՝ Միացեալ Նահանգները, Եւրոպան եւ երրորդ աշխարհի երկիրները։

Այս տարուան սկիզբը հետաքննութեամբ զբաղող «Հետք» կայքը յօդուած հրապարակած էր «Արթոն Քեփիթըլ»ի (Arton Capital) մասին, որ մասնագիտացած է «քաղաքացիութիւն ներդրումներու միջոցով» ծրագիրներու մէջ, ամբողջ աշխարհի տարածքին: Ներգաղթի քաղաքականութեան զարգացման միջազգային կեդրոնի հրաւէրով ընկերութեան պատուիրակութիւնը անցեալ տարի այցելած էր Հայաստան: Այցելութենէն ետք «Արթոն Քեփիթըլ»ի կայքը կը գրէ հետեւեալը. «Ներդրումներու միջոցով քաղաքացիութեան հայեցակարգի գաղափարը ընդունուած է Հայաստանի տնտեսական զարգացման եւ ներդրումներու նախարարութեան, արտաքին գործոց նախարարութեան, նախագահի աշխատակազմի, Կեդրոնական դրամատան, ոստիկանութեան, գաղթականական պետական ծառայութեան բարձրաստիճան պաշտօնեաներու եւ Ռազմավարական նախաձեռնութիւններու կեդրոնին կողմէ»։

Պուլկարահայ Արմանտ Արթոն «Արթոն Քեփիթըլ»l ընկերութեան նախագահն է, իսկ Էմիլ Շահմուրատեան՝ առեւտուրի զարգացման գծով փոխնախագահը: «Արթոն Քեփիթըլ» գրասենեակներ ունի տասնեակ մը երկիրներու մէջ: Իր ընկերութեան կայքին վրայ Արմանտ Արթոն կը յայտնէ հետեւեալը. «Իբրեւ հպարտ հայ, ինծի համար մեծ պատիւ է առաջարկել իմ տարիներու մասնագիտական փորձառութիւնըը եւ  հմուտ «նօ-հաու» (know how)ը՝ օգնել երկրին իր արտաքին ուղղակի ներդրումային նպատակներուն հասնելու համար: «Արթոն Քեփիթըլ»ը իր բարեգործական յանձնառութեան աջակցութեան համար խոստացած է խորհրդատուական վճարումները Հայաստան ապաստանած գաղթականներու իբրեւ օգնութիւն նուիրել: Առաւել քան 20 հազար սուրիացիներ, որոնք հիմնականին մէջ ազգութեամբ հայեր են, ապաստան գտած են Հայաստանի մէջ, 2011ի սուրիական պատերազմի սկիզբէն ի վեր»։

Նման ծրագիրներ առաջարկող երկիրները օտարերկրացիներէ կը պահանջեն քաղաքացիութիւն ստանալու համար ներդրումներու տարբեր մակարդակներ: «Արթոն Քեփիթըլ»ը Հայաստանին կ՛առաջարկէ՝ պահանջել 50 հազար տոլարի փոքր գումար՝ իբրեւ օտարերկրացիի համար քաղաքացի դառնալու նուազագոյն ներդրում: Այլ երկիրներ աւելի շատ կը պահանջեն օտարերկրացի ներդրողներէ, իսկ առաւել գրաւիչ երկիրները կը պահանջեն առաւել քան 10 միլիոն տոլարի ներդրում՝ քաղաքացիութիւն շնորհելու համար: Ընկերութիւնը կը գտնէ, որ յառաջիկայ վեց տարուան ընթացքին Հայաստան կը ստանայ 138 միլիոն տոլարի լրացուցիչ եկամուտ, եթէ իրականացնէ առաջարկուող ներդրումները՝ կապուած քաղաքացիութեան ծրագիրին։

Ըստ «Հետք»ի՝ «Արթոն Քեփիթըլ»ը խորհուրդ տուած է, որ «Հայաստան հաւանական ներդրողներու առաջարկէ երկու տարբերակ՝ 50 հազար տոլարի ուղղակի ներդրում պետական որեւէ հիմնադրամի մէջ կամ 100 հազար տոլարի ներդրում՝ կառավարութեան կողմէ ընտրուած դրամագլուխի կառավարման ընկերութիւններու կողմէ նիւթապէս հովանաւորուող հիմնադրամի մէջ՝ յստակ եկամուտի կարելիութեամբ: Ընկերութիւնը նաեւ կ՛առաջարկէ Հայաստանին՝ սահմանել երկու տեսակի վճարման սակ: Առաջինը կ՛ըլլայ մինչեւ 10 հազար տոլարի չվերադարձուող գործընթացի վճարում, իսկ երկրորդը, որուն գումարը չի նշուիր, կ՛ընդգրկէ դիմորդներու անձնական փաստաթուղթերու եւ եկամուտի աղբիւրներու ստուգումը»։

«Արթոն Քեփիթըլ»ը Հայաստան կատարած ուղեւորութեան զեկոյցին մէջ «Կարեւոր կը նկատէ երկրին դրական կողմերը, ինչպէս՝ անոր ամուր կապերը համաշխարհային տնտեսական կեդրոններու հետ, այլ նաեւ անոր աշխարհագրական եւ մշակութային մօտիկութիւնը ռազմավարական շուկաներուն: Հայաստան կ՛առաջարկէ ներդրողներու մուտք՝ դէպի Ռուսիա եւ գրեթէ բոլոր յետ-խորհրդային պետութիւններ, ինչ որ կը նշանակէ մօտաւորապէս 250 միլիոն հաւանական սպառող, ներառեալ՝ Կեդրոնական Ասիա, որոնց վրայ կ՛աւելնայ 82 միլիոնէ աւելի սպառող դրացի Իրանը, որուն հետ երկիրը բարի դրացիական յարաբերութիւններ ունի: Եւ եթէ երկիրը հասնի առանց վիզայի մուտք ունենալու Շենկենեան գօտի, որ կրնայ իրականանալ 5էն 7 տարի ետք, ապա Հայաստան կրնայ արդարացիօրէն պնդել, որ վերականգնած է իր պատմական դերը՝ իբրեւ Մետաքսէ ճամբուն վրայ Արեւմուտքը Արեւելքին կապող կանգառ: Ընդհանուր առմամբ, երկարաժամկէտ արժէքներ հետապնդող ներդրողները կրնան համոզուիլ Հայաստանի առաւելութիւններուն հիման վրայ: Ելքով (առանց մուտքի թոյլտուութեան) դէպի 60 եւ աւելի երկիրներ, իր առանձնայատուկ յարաբերութիւններով Ռուսիոյ հետ եւ աշխարհագրական դրացութեամբ Իրանի հետ, Հայաստանի քաղաքացիութիւն ստանալը կը դիտուի ոչ միայն իբրեւ մարդու ապագայի եւ անվտանգութեան ապահովման միջոց, այլ նաեւ իբրեւ ռազմավարական քայլ՝ առեւտուրի զարգացման եւ դիրքաւորման համար»։

Յատկանշական է, որ «Հետք»ը իր յօդուածին մէջ զգուշացուցած է, որ շատ օտարերկրացիներ, որոնք շահագրգռուած են քաղաքացիութիւն ձեռք բերելու համար ներդրումներ կատարելու գաղափարով, կրնան իրենց հետ բերել ամէն տեսակի ապօրինի գործողութիւններ, ինչպէս օրինակ՝ տուրքերէ խուսափիլը, դրամի լուացումը, կաշառակերութիւնը եւ կազմակերպուած յանցանք գործելը։

Հայաստանի կառավարութեան պաշտօնատար անձեր քաղաքացիութեան ծրագիրին համար պէտք է հաւասարակշռեն ներդրումներու շահերն ու թերութիւնները: Արտասահմանցի դիմորդները պէտք է մանրակրկիտ քննութեան ենթարկուին՝ մինչեւ իրենց ներդրումներուն դիմաց Հայաստանի քաղաքացիութիւն ստանալը։

 

ՅԱՐՈՒԹ ՍԱՍՈԻՆԵԱՆ

«Քալիֆորնիա Քուրիըր» թերթի հրատարակիչ եւ խմբագիր

 

Արեւելահայերէնի թարգմանեց՝

ՌՈՒԶԱՆՆԱ ԱՒԱԳԵԱՆ

Արեւմտահայերէնի վերածեց՝

ՍԵԴԱ ԳՐԻԳՈՐԵԱՆ

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top