Նիկոլ Փաշինեան Գիւմրիի Մէջ Յարգանքի Տուրք Մատուցեց 1988ի Երկրաշարժի Զոհերու Յիշատակին

1208nigolgyumri

1208nigolgyumri

Վարչապետի պաշտօնակատար Նիկոլ Փաշինեան 1988ի երկրաշարժին 30րդ տարելիցին նուիրուած ձեռնարկներու ծիրին մէջ, Ուրբաթ օր Գիւմրիի մէջ յարգանքի տուրք մատուցեց երկրաշարժի զոհերու յիշատակին:

Փաշինեան ժամը 11:41ին ծաղկեպսակ զետեղեց Սուրբ Ամենափրկիչ եկեղեցւոյ տարածքին մէջ տեղադրուած յուշակոթողին եւ ներկայ գտնուեցաւ զոհերու յիշատակին մատուցուած հոգեհանգստեան արարողութեան:

Փաշինեան հանդէս եկաւ ելոյթով մը, որուն մէջ, ի միջի այլոց, ըսաւ. «Երկրաշարժէն 30 տարի ետք աղէտի գօտի հասկացութիւնը վերցուած չէ: Երբ կ՛ըսենք աղէտի գօտի, նախ պէտք է նկատի առնենք այն բանը, թէ որքանով վերականգնած է մարդոց վստահութիւնը իրե՛նց ուժերուն նկատմամբ, որքանով  վերականգնած է լաւատեսութիւնը վաղուան նկատմամբ, որքանով վերականգնած է յոյսը, որ զոհերուն կիսատ մնացած գործերը եւ երազները պիտի դառնան իրականութիւն: Աղէտի գօտիի վերականգնման այսպիսի հայեցակարգը աւելի կարեւոր է եւ անհրաժեշտ»:

Ան յոյս յայտնեց, որ մարդոց վստահութիւնը եւ լաւատեսութիւնը պիտի վերականգնի:

«Ձեր ցաւերը իմ սիրտին, ձեր կարիքները իմ միտքին, ձեր երազները իմ հոգիին մէջ են եւ վստահութիւն կը ներշնչեն՝ ըսելու, որ ամէն ինչ լաւ պիտի ըլլայ, ամէն ինչ իսկապէս շատ լաւ պիտի ըլլայ», ըսաւ Փաշինեան:

Ձեռնարկին ներկայ եղան նաեւ Հայաստանի Ազգային ժողովի նախագահը, կառավարութեան անդամները, Երեւանի քաղաքապետը, բարձրաստիճան այլ պաշտօնեաներ, Հայաստանի մէջ հաւատարմագրուած դիւանագիտական ներկայացուցիչներ, Ռուսիոյ արտակարգ իրավիճակներու նախարարի տեղակալ Նիքոլայ Գրեչուշքի եւ Քենզըսի նահանգապետ Ճեֆ Քոլեըր:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top