Զախարովա «Կոպիտ Խախտում» Կը Նկատէ Ռուսիոյ Հայ Քաղաքացիները Ատրպէյճանէն Արտաքսելու Դէպքերը

0112zakh

 

0112zakh

ԵՐԵՒԱՆ, «Արմէնփրէս».- Ռուսիոյ արտաքին գործոց նախարարութեան պաշտօնական ներկայացուցիչ Մարիա Զախարովա մեկնաբանեց Պաքուի օդակայանէն ազգութեամբ հայ Ռուսիոյ քաղաքացիները արտաքսելու դէպքերը:

Ան նշեց, որ նման արտաքսումները այդ մարդոց տարրական իրաւունքներու «կոպիտ խախտում» մըն է:

«Ես այդ մասին մեծ քանակութեամբ հաղորդագրութիւններ տեսայ, ներառեալ՝ ընկերային ցանցերու վրայ: Տօնական օրերուն ընթացքին նոյնպէս նման միջադէպ արձանագրուած է: Մենք պարբերաբար այդ հարցը դրած ենք Ատրպէյճանի ղեկավարութեան առջեւ եւ ըսած ենք, որ նման դէպքեր դժբախտաբար աւանդոյթ սկսած են դառնալու՝ սխալ եւ վատ աւանդոյթ», աւելցուց Զախարովա:

Ան նշեց, որ անցեալ տարի ազգային պատկանելիութեան նկատառումներով Ատրպէյճանի մէջ այցելութիւնը մերժելու նուազագոյնը 16 դէպք արձանագրուած է:

«Նշուած փաստերը, մեր կարծիքով, կը համարուին Ռուսիոյ քաղաքացիներու իրաւունքներու կոպիտ խախտում», ընդգծեց Զախարովա, աւելցնելով, որ անոնք կը հակասեն ռուս-ատրպէյճական շարք մը համաձայնագիրներու ոգիին եւ բարեկամական յարաբերութիւններուն:

Ան յայտնեց նաեւ, որ Պաքու վստահեցուցած է, որ իրավիճակը պիտի սրբագրուի:

Նշենք, որ 29 Դեկտեմբերին, Ռուսիոյ քաղաքացի Քրիստինա Գէորգեան տեղեկացուցած էր, թէ 13 ժամ պահուած է Պաքուի օդակայանին մէջ՝ աւելցնելով, որ իրեն նման երկու ընտանիքներու չէ արտօնուած Պաքու մտնել՝ ազգականներէն մէկուն հայկական մականունին պատճառով:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top