Պէյրութ Այցելած Ամերիկացի Պաշտօնատարը Անընդունելի Կը Նկատէ «Հըզպալլա»ի Գործունէութիւնը 

0116Hale

0116Hale

ՊԷՅՐՈՒԹ, «Ռոյթըրզ».- Միացեալ Նահանգներու արտաքին գործոց նախարարի քաղաքական հարցերու օգնական Տէյվիտ Հէյլ 14 Յունուարին, Լիբանանի մէջ հանդիպումներ ունեցաւ նախագահ Միշէլ Աունի, Խորհրդարանի նախագահ Նեպիհ Պըրրիի, վարչապետ Սաատ Հարիրիի եւ այլ պաշտօնատարներու հետ, ընկերակցութեամբ Լիբանանի մօտ Միացեալ Նահանգներու դեսպան Էլիզապէթ Ռիչըրտի:

«Այնքան ատեն որ Միացեալ Նահանգներ կը զօրակցի Միջին Արեւելքի մէջ արդար եւ ամբողջական խաղաղութեան, Լիբանանի մէջ կացութիւնը պիտի հանդարտի եւ հարաւային Լիբանանի սահմաններուն վրայ խաղաղութիւնը պիտի ամրապնդուի», հանդիպումին ընթացքին ըսաւ նախագահ Աուն՝ մաղթելով, որ հարաւային Լիբանանի սահմանագծումը մօտիկ ապագային կը վերսկսի: Ան նաեւ շնորհակալութիւն յայտնեց Միացեալ Նահանգներուն, որ կ՛օժանդակէ լիբանանեան բանակին:

Իր կարգին, Հէյլ Աունին ներկայացուց Միացեալ Նահանգներու արտաքին գործոց նախարար Մայք Փոմփէոյի Միջին Արեւելք այցելութեան նպատակները, ինչպէս նաեւ անդրադարձաւ Սուրիոյ զարգացումներուն մասին ամերիկեան տեսակէտներուն՝ հաստատելով, որ Ուաշինկթըն միշտ պատրաստ է նեցուկ կանգնելու Լիբանանին:

Իր կարգին, Պըրրի ակնարկեց իսրայէլեան ուժերուն կողմէ լիբանանեան գերիշխանութեան դէմ ամէնօրեայ դրութեամբ գործուող ոտնձգութիւններուն, խստօրէն դատապարտելով իսրայէլեան ուժերուն կողմէ սահմանային գիծին վրայ աշխատանքի ձեռնարկելու ամբարտաւանութիւնը:

Պըրրի նաեւ շեշտեց Սուրիոյ տագնապին քաղաքական լուծում մը ապահովելու անհրաժեշտութիւնը։

Հէյլ Հարիրիի հետ քննեց Լիբանանի մէջ տիրող կացութիւնը, ինչպէս նաեւ շրջանային զարգացումները: Հանդիպումէն ետք Հէյլ հաստատեց, որ լիբանանցիները քաղաքական մեծ որոշումներ պէտք է տան, շեշտելով, որ Ուաշինկթըն ամէն ջանք ի գործ կը դնէ «դիմադրելու համար իրանեան վտանգաւոր արարքներուն, որոնք կը գործադրուին ամբողջ շրջանին մէջ», այդ արարքներէն մէկը նկատելով «ահաբեկչական կազմակերպութիւններու տրամադրուող աջակցութիւնը, որոնց շարքին է նաեւ «Հըզպալլա»ն»:

«Կարելի չէ ընդունիլ, որ զինեալ խմբաւորում մը գետնափոր փապուղիներ պատրաստէ եւ կայունութեան սպառնացող հազարաւոր հրթիռներու պահեստանոց մը ունենայ», շեշտեց Հէյլ: Ան ըսաւ, որ միջազգային ընտանիքը մօտէն կը հետեւի այս բոլորին, յատկապէս Լիբանանի կառավարութեան կազմութեան հոլովոյթին: «Այդ կառավարութեան կազմութիւնը Լիբանանի պարտականութիւնն է, սակայն կառավարութեան բնոյթը բոլորին համար կարեւոր է: Մենք կը վստահինք այս դժուար օրերուն ընթացքին Լիբանանի ղեկավարներուն կարողութեան, ինչպէս նաեւ կը զօրակցինք, որ ընթացաւարտ կառավարութիւնը աշխատանքները շարունակէ՝ պահպանելու համար Լիբանանի նկատմամբ միջազգային վստահութիւնը», եզրափակեց Հէյլ:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top