Թուրքիոյ Տնտեսութիւնը Քանդել Սպառնացող Թրամփ Էրտողանի Հետ Քննեց Սուրիոյ Իրադարձութիւնները

0116trump erdo

0116trump erdo

ԱՆԳԱՐԱ, «Ազատութիւն».- Թուրքիոյ նախագահ Ռեչեփ Էրտողան պնդեց, որ իր ամերիկացի պաշտօնակից Տանըլտ Թրամփի հետ 14 Յունուարի գիշերը տեղի ունեցած հեռաձայնային զրոյցի մը ընթացքին համաձայնեցան կարեւոր հարցերու շուրջ:

Թուրքիոյ նախագահը այս մասին յայտարարութիւն մը կատարեց 15 Յունուարի կէսօրին՝ իշխող Արդարութիւն եւ բարգաւաճում կուսակցութեան պատգամաւորական խմբակցութեան անդամներուն հետ շաբաթական հանդիպման ընթացքին:

«Նախագահ Թրամփի հետ մենք պատմական կարեւորութեամբ փոխըմբռնման հասանք: Թրամփ անգամ մը եւս վերահաստատեց, որ Սուրիոյ հիւսիսը տեղակայուած ամերիկեան ստորաբաժանումները դուրս պիտի բերուին: Այդ խօսակցութեան ընթացքին, Միացեալ Նահանգներու նախագահին հետ համաձայնեցանք շարունակել Սուրիոյ վերաբերող շփումները՝ մասնաւորաբար Թուրքիոյ կողմէ ապահովութեան գօտի ստեղծելու հեռանկարին շուրջ: 20 մղոննոց այդ ապահովութեան գօտին ստեղծելու մասին ես խօսելու սկսած եմ Օպամայի ժամանակաշրջանէն», նշեց Էրտողան:

Յիշեցնենք, որ վերոնշեալ զրոյցէն մէկ օր առաջ, Թրամփ սպառնացած էր Թուրքիոյ տնտեսութիւնը քանդել, եթէ թրքական ուժերը Ամերիկայի դաշնակից Սուրիոյ քրտական ուժերուն վրայ յարձակին ամերիկեան ուժերը հեռացնելէ ետք։

Անդրադառնալով այդ սպառնալիքին, Էրտողան Թուրքիոյ համար տհաճ որակեց «Թուիթըր»ի վրայ Թրամփի աշխուժութիւնը, սակայն ան աւելցուց, որ Սպիտակ տան ղեկավարը Թուրքիոյ մէջ կը նկատուի թիւ մէկ բանակցային գործընկերը:

«Ինծի եւ շրջապատիս կը տխրեցնեն ընկերային ցանցերուն վրայ Թրամփի կողմէ կատարուած պնդումները: Սակայն, անցեալ գիշեր տեղի ունեցած մեր հեռաձայնային զրոյցը կրնամ դրական որակել: Մենք պէտք է ըմբռնենք, որ Սուրիայէն ամերիկեան զօրքերը հեռացնելու որոշումին դէմ Միացեալ Նահանգներու մէջ որոշ խօսակցութիւններ ծաւալած են», յայտարարեց վարպետօրէն պաղարիւն դարձած Էրտողան:

Աւելի ուշ, Թրամփ գրեց, թէ Էրտողանի հետ քննած է «բոլոր հարցերը», ներառեալ՝ «վերջին երկու շաբաթներուն «Իսլամական պետութեան» մնացորդներուն դէմ պայքարին մէջ արձանագրուած մեր յաջողութիւնները, ինչպէս նաեւ 20 մղոննոց ապահովութեան գօտի մը ստեղծելու հարցը»։

Իր դիրքը անգամ մը եւս 180 աստիճանով փոփոխութեան ենթարկելով՝ Թրամփ աւելցուց. «Քննարկեցինք նաեւ Միացեալ Նահանգներու եւ Թուրքիոյ միջեւ տնտեսական յարաբերութիւնները զարգացնելու կարելիութիւնները, նկատի ունենալով, որ զանոնք ընդարձակելու համար զգալի ներուժ գոյութիւն ունի»:

Յիշեցնենք, որ Էրտողան նախապէս բուռն կերպով մերժած էր հիւսիսային Սուրիոյ քիւրտերուն աջակցող Թրամփի կեցուածքը: Թուրք-ամերիկեան տարակարծութիւնները պատճառ դարձած էին Էրտողանի եւ Թրամփի Ազգային ապահովութեան խորհրդատու Ճան Պոլթընի միջեւ հանդիպումի ջնջումին՝ Իսրայէլի մէջ վերջինիս կատարած՝ «ամերիկեան ուժերուն հեռացումէն առաջ պէտք է քիւրտ դաշնակիցներու ապահովութիւնը երաշխաւորել» յայտարարութեան համար: Էրտողան նշած էր, որ Պոլթըն «մեծ սխալ գործեց» այդ յայտարարութեամբ։

Էրտողան անցեալ տարուան Հոկտեմբերին յայտարարած էր, որ «քանի մը օրէն» Եփրատի արեւելեան ափին վրայ գտնուող քիւրտերուն դէմ լայնածաւալ զինուորական գործողութեան պիտի դիմէ, սակայն, աւելի ուշ յետաձգած էր որոշումին գործադրութիւնը:

Վերջապէս, Միացեալ Նահանգներու արտաքին գործոց նախարար Մայք Փոմփէօ Ռիատէն յայտարարեց, թէ Թուրքիոյ վերաբերեալ Թրամփի կատարած վերջին յայտարարութիւնները չեն կրնար ազդել Սուրիայէն ամերիկեան ուժերը հեռացնելու ծրագիրին վրայ:

Ան չկրցաւ բացատրել, թէ ճիշդ ի՛նչ կը նշանակէ Թուրքիան տնտեսապէս քանդելու մասին Թրամփի գրառումը՝ նշելով. «Այդ մասին դուք պէտք է հարցնէք անձամբ նախագահին»:

Authors

Discussion Policy

Comments are welcomed and encouraged. Though you are fully responsible for the content you post, comments that include profanity, personal attacks or other inappropriate material will not be permitted. Asbarez reserves the right to block users who violate any of our posting standards and policies.

*

Top